Hoi dong Bhap bini Ban raya Ho Chi Minh hu patabiak Sarak ka 62, ba tabiak sarak daong patagok jirah rivang MICE (jirah rivang pambuak nyaom pataom, biai gauk, danak dak) tal abih thun 2030. Bhap bini gah ngak mbang pablei salih ndom lac sarak daong MICE hu ba tabiak njauk tukvak puac thun – pagam saong hatai caong kuhria iek veik taong abih, alin meyaom di gah ngak mbang pablei salih – hu “taong njauk” hatai caong di darak pasar.

Ong Nguyễn Đức Long Thành, Yam ndok Kongti Việt Golden Tourism ndom lac, Viet Nam lac sa dalam dom labik mai pasiam kinh te takre hadei di jit Covid-19, bruk ini ngak ka rilo gah ngak mbang pablei salih pakat dunya khin palih ruah Ban raya Ho Chi Mimh piah peih ngak dom danak dak MICE pambuak ba drei tame jirah rivang. Abih di nyu nan lac, tukvak Tet bhap bini di Viet Nam jaik tal brei ngak jeng prein dui pachreih praong haong tuai damuai pakat dunya:  “Khol dahlak hulin hu jalan ngak raok dom kapul ngak mbang pablei salih negar langiu mai Viet Nam dalam tukvak ini. Dahlak jie lac, meyah rilo gah ngak mbang pablei salih gam pambuak bruk, ngak jeng jalan kuhria tani tanat ka tukvak bahrau, ye meng thun 2026, jirah rivang MICE di Ban raya Ho Chi Minh saong dalam negar brei hu bruk sarok patagok tantu cambaih laih”.

Amuk Nguyễn Thị Khánh, Akaok kapul Jirah rivang Ban raya Ho Chi Minh jeng ndom lac, tanut daong di sarak urak ini meda oh ka pabak taong abih caong takre di dom kapul MICE praong, min ini hu maong yau lac bruk peih akaok meti njauk ngak.

“Tui So Jirah rivang Ban raya Ho Chi Minh ye ini lac bruk peih akaok meti, khol drei brei patui veik roh duah saong hu dom sarak dui pachreih jang piah dui pachreih hu rilo kapul tuai damuai MICE mai tal Ban raya. Gah jirah rivang Ban raya Ho Chi Minh daok kham merat piah hu dom jalan ngak cakrok samar piah dui pachreih rilo tuai damuai jang, abih di nyu nan lac tuai damuai jirah rivang MICE”.

Sarak ini hu maong yau lac bruk lagaih, brei kein lagaih pachreih tagok jirah rivang pakat dunya saong dui pachreih dom gah ngak mbang pablei salih, kapul tuai damuai praong mai tal Ban raya Ho Chi Minh tuk pambuak jirah rivang jalan tasik di Vung Tau saong majam logistics di Binh Duong. Min, tui amuk Huỳnh Phan Phương Hoàng, Phaok Taong Yam ndok Kongti Co phan Jirah rivang Vietravel, urak ini harak likau adat brei peih padang dom danak dak jirah rivang MICE di Ban raya Ho Chi Minh jeng lahik rilo tukvak, ngak ka gah jirah rivang gaok kan kandah dalam bruk pabak dom caong khin samar meng gah tuai damuai pakat dunya. Taphia nan, ha tang jalan mbak daok rilo bruk gar tavak jeng brei samar drah buh jien tame ngak, pasiam. Amuk Huỳnh Phan Phương Hoàng ndom meyai lac:

“Tổng hòa di Ban raya Ho Chi Minh bahrau ye khol drei hu biak rilo labik sang daok njauk tanut yau majam dom labik jirah rivang, hotel njauk tanut piah meda payak dom kapul tuai damuai praong mai tal ban raya. Min brei pataom buh jien tame ha tang piah dom danak dak rivang me-in jeng yau nyaom pataom, biai gauk, danak dak di tuai damuai MICE oh gaok kan kandah kayua gar jalan. Ini lac dom bruk gar tavak bo khol dahlak bhian ieu lac “taluk juk” tuk njauk gaok”.

Di var ndom meyai sua tangi haong dom gah ngak mbang pablei salih jirah rivang dalam ban raya hu peih tabiak bahrau ini, urang dang akaok So Jirah rivang Ban raya Ho Chi Minh sanya, ban raya brei bhian roh duah, pabak dom sarak MICE jak jeng di rilo negar yau ye Han Quoc, Japon… Di bruk taong yaom dom bruk pambuak tal bruk ngak mbang – jirah rivang, ban raya brei patui veik roh duah piah pasiam, peih praong sarak, pamaong tal padang labik dui pachreih dom kapul tuai damuai MICE siam lagaih saong karo kajap jang./.