Dom bilan tapa, bruk bui sambai hu mboh grauk labik daok bahrau  Đông Hòa, di phường Đông Hòa, ban Dĩ An, tỉnh Bình Dương. Tal ini, labaih 30 baoh sang di dom bol bhap rahra hu ngak salah blaoh. Yaok pluh baoh sang urang karei jeng sami samar tuh takai padang ngak sang bahrau.

Bhap bani dalam labik daok bahrau jaik abih lac bhap bani công giáo diuk rai di khu phố Ngãi Thắng, phường Bình An, ban Dĩ An. Mikva tabiak truh di labik daok klak ba tui hatai caong khin ka sa rai diuk bahrau siam gheih jang.

Amuk Nguyễn Thị Kim Liên (umo 58 thun) nan lac sa dalam dom baoh sang akaok meti panduan mai daok dalam sang bahrau. Ngan haong mblang taneh 271m2 taneh klak njauk karja mek, amuk hu bayar jien mek taneh jaik 8 tỷ đồng saong padang ngak sa baoh sang bahrau 1 trệt 2 lầu angaok mblang taneh prong 62m2. Ndom ka rai diuk bahrau, amuk Liên brei thau, kadha bo amek daok saneng nan lac taong abih 3 rai rah ngan haong 12 urang gam daok dalam baoh sang 62m2 mboh daok ganik ganong. Kayua yau nan ye caong khin hu palaghaih piah blei mbluak jang mblang taneh daok bahrau tra. Amuk Liên khan lac:

 “Meng akaok mereip ye thei jeng oh njauk hattai min ini lac sarak di Karja, jalan Karja ngak nan ye taong abih bhap bani, mikva giáo xứ Nghĩa Sơn thei jeng ngak tui, taong abih lac ngak tui sarak. Saong jeng hu Karja daong biak rilo dalam bruk panduan ba nao daok di labik bahrau nan lac kadha bo mikva giáo xứ thei jeng bui sambai”.

Piah kuhria caga ka bruk panduan ba bhap bani njauk pambak di danak dak Vành đai 3 nao tapa ban Dĩ An, karja puk palei hu peih ngak 266 mblang taneh di 3 labik daok bahrau. Dalam nan hu 215 baoh sang hu pabak brei taneh di labik daok bahrau Đông Hòa, daok veik nan meda ba brei daok di dom labik Biconsi saong Mì Hòa Hợp. Yau nan min, tukvak jak ba bhap bani, abih di nyu lac mikva giáo dân di Giáo xứ Nghĩa Sơn, gaok oh takik kan kandah.

Rilo thun pambuak pagam haong labik ini, mikva jeng bhian randap haong alam moi truong diuk rai jeng yau dom bruk ngak di agama di kalan kakuh Guise. Kayua yau nan ye, bruk panduan nao daok di labik karei daok ngak ka mikva mboh suh sak saong kuhri kuhria. Ngan haong bruk kham merat jak ba di Karja puk palei saong Linh mục Phạm Phú Trung, gam haong bruk mong mboh hu kadha siam gheih di dự án Vành đai 3 ngan haong bruk cak rok patgaok di tỉnh Bình Dương, binah rilo ye mikva thei jeng njauk hatai panduan nao daok  bahrau. Linh mục Phạm Phú Trung bui sambai khan lac:  

 “Labik daok bahrau phường Đông Hòa, mblang taneh nan dahlak mboh biak gheih, mbuan laghaih biak rilo. Mikva tagok nan daok, dahlak mboh thei jeng salamat. Yau nan min, dahlak jeng thau lac, bhap bani công giáo tuk nao atah sang thờ ye mikva mboh biak palai jamen. Dahlak caong khin lac mikva samar pataom mbaok tame haong bhap bani rah ra giáo xứ bahrau. Ndom ka bruk ngak ye caong khin ka mikva samar grap tanat”.

Gah karja puk palei, tuk pal hu thong tin ka danak dak jalan Vành đai 3 nao tapa puk palei, Thường vụ Thành ủy saong UBND ban Dĩ An hu brei thau bruk peih paha mblang taneh nan lac bruk ngak prong dang akaok.

Piah grap tanat tukvak peih ngak dự án, taong abih thong tin ka bruk peih paha mblang taneh bhian hu khan brei thau, samar drah ba tagok ka urang pal akaok ban. Taphia di bruk peih ngak dom sarak daong ba tui adat hukum, cambaih laih, puk pelei jeng duah ba tabiak jalan ngak ka nyu lagaih, abih di nyu lac sangka tal dom baoh sang hu rai diuk kan kandah saong mikva tui agama. Ong Võ Trọng Tài, Phaok Akaok UBND ban Dĩ An brei thau:

 “Khaol dahlak jeng hu duah jalan ngak ka nyu siam brei ka bruk mek taneh bayar jien, nan lac tuk bhap bani oh ka hu labik daok ye khaol dahlak pah chung cư brei daok oh abih jien dalam tukvak katut panak piah ka mikva tani tanat labik daok. Atau pah radaih piah panduan ba pandap panda, sang danaok, piah ka bhap bani pok jao mblang taneh avan jang. Dom sarak hu patabiak blaoh min daok kurang ye khaol dahlak brei panuac pabak gilac ka nyu lagaih haong dom hagait daok rah tabiak di anak meta ka bruk bayar jien mek taneh dalam ban. Meng nan jeng ngak brei ka bhap bani njauk hatai glaong”

Danak dak jalan Vành đai 3 TP.HCM nao tapa Ban Dĩ An hu 532 baoh sang urang njauk pambak tal. Tal ini, puk palei jeng hu pok jao mblang taneh jaik 93%, daok 40 baoh sang urang tra. Dĩ An brei thau lac tal puac thun ini meda pok jao taong abih mblang taneh hacih ka jabat padang ngak. Piah mek hu baoh jeng siam mekre ini, bruk jak ba saong dak padang sarak daong ka mikva ye hu brei ngak dahlau di abih./.