Hadei di ralo mbang yaih main di ban Buôn Ma Thuột haong di dom huyện dalam tỉnh Đắk Lắk, barau di ini, taka kịch “Khát vọng Dam Săn” hu peih yaih main ka urang ieik daok di ban raya Hồ Chí Minh. Phun kadah hu nhạc sĩ Nguyễn Cường pamaneh tui dak dalikan khan Dam Săn di bangsa Ê Đê, pok angan urang jak sanak Dam Săn gam haong hatai khin caong padang mbuôn palei haong caga kapul gauk darah praong khang di drei. Cei Dam Săn mek hu hatai Nai Ia Harei, bai a harei mai ka palei, truac tagok dalah apui anit ranam haong prei diuk di glai ceik bhum Tây Nguyên praong glaong. Muk Lưu Thị Hoa, daok di Ban Hồ Chí Minh khan lac:

 “Mbang cammareip akaok meti dalak hulin ieik ca kịch Khát vọng Dam Săn, mboh biak gheih. Meng halei maid rei ieik cải lương, ca kịch min tapi ka oh mboh kadha halei bingi gheih yau ini. Urang jak sak bangsa Dam Săn biah gheih ghang, urang khang kadang, praong glaong gireih sanak haong pacambak angan brei ka urang bac magru tui”.

Nghệ sĩ ưu tú Y Joel Knul khan lac, meng daok sit drei jeng hu pang ong muk mei daoh khan mboh biak takre hatai angan Dam Săn kayua gait gireih sanak, ba abih hatai ka mbun palei. Yau nan ye, tuk hu tame dang main ca kịch, saai mboh hatai biak bui sambaiuan tabuan. Yaok mbang main, mada daok pasram, saai jeng ba hatai yau ye ngak biak. Nyu yau ye darah di muk kei caik mai tame dalam ralo darah hatai phik di drei.

 “Drei tame rup Đam San, hu ralo kadha drei mboh drut hatai, kayua drei tame rup kadha di urang nan blaoh. Mboh ba abih hatai di nyu, labik yel tangin tagok biak drut hatai, tuk H’Nhí kuol ôhaong pal tangin Dam San biak drut druai, drei haok ia mata. Mboh sit biak min nyu biak dalam. Kadha ragu ragam di rapaneh ragam angan Nguyễn Cường mek tabiak di dalam kadha Khan Dam San” hu ilamu biak glaong”.

 Tui Nghệ sĩ ưu tú Y Joel Knul, tuk camareip dang rup angan cei Dam Săn brei ka urang karei. Min tal tuk taom mbaok jeng ye brei ngak ieik, nhạc sĩ Nguyễn Cường mek saai tame dang rup angan Dam San. Yaom lac sa urang daoh gam urang main phling, tuk tame pasram ca kịch, saai buh prei biak ralo. Kayua yau nan ye, tuk ca kịch Khát vọng Dam Săn peih main hu ralo urang ieik, anit ranam ieu lac sa janih hu angan dalam jalan dhua di saai. 

 “Nghệ sĩ ưu tú Y Joel bam ai dom ragam adaoh, dom ragu di bhap bini urang bangsa Ê Đê, dom ragam ragu pang biak gheih biak bingi biak krih birih hu ralo urang ieik urang thau. Biak caong khin saai mada ba ralo kadha, ba adaoh biak bini pang, biak gheih brei ka urang pang”.

 Muk Nguyễn Thụy Phương Hiếu, Pho Yam ndoc Sở Ilamu, Sukan padhit haong Jirah Đắk Lắk brei thau, nghệ sĩ Y Joel Knul hu brei pok angan Nghệ sĩ Ưu tú meng thun 2015, tuk meng umur 40 thun, urak ini jeng sa urang tukik umur thun di abih dut pachoh haong 4 urang nghệ sĩ ưu tú dalam tỉnh. Oh lac hu sap daoh gheih, ndam gam darah Tây Nguyên, Nghệ sĩ ưu tú Y Joel Knul daok ieu lac sa urang siam gheih, anit ranam haong bruk ngak, tuk halei jeng thau kham marat bac magru. Mbiah tal harei ini, cei Y Joel hu ganap tanut nghệ si, yau nan ye, pakat Sở ilamu daok paganap harak gal pok lakau tagok karja Nagar brei angan Nghệ sĩ Bhap bini ka saai.

“Nghệ sĩ ưu tú Y Joel Knul jang ba abih hatai jai kham marat paganap sampurna rup drei dalam daoh ka, dalam dom bruk ngak di dalam Kapuk daok tamia bangsa, gam haong kapul dak padang jak yum jum pataom yam tagok. Sở jeng daong dom janih brei ka Nghệ sĩ ưu tú Y Joel Knul hu bac magru pasram piah patagok glaong angan bruk ngak di drei, patabak sampurna piah hu jeng Nghệ sĩ Nhân dân masa meng anak”.

Gam haong dom janih ngak njauk ngak siam dalam bruk ngak, Nghệ sĩ Ưu tú Y Joel Knul mek hu dom janih jak jeng di jalan seni ilamu nghệ thuật, taduon raok hu ralo baoh siam makre di ralo urang. Gam haong bruk daoh ka, urak ini saai daok pabam dalam hatai brei ka gah ragam ragu Tây Nguyên haong ragam tamia, gam haong hatai caong khin pataom jeng ye pamaneh barau ragam adah brei ka Tây Nguyên, neh jeng ragam ragu barau brei ka mikva urang di Tay Nguyen pang ieik /.