Tui Kapul Thanh Long tỉnh Long An, baoh thanh long Việt Nam daok njauk maraik gauk biak khang meng dom taneh ia dalam bhum, dalam nan hu Trung Quốc, darak pasa blei tame labaih 80% baoh thanh long di taneh ia drei. Min, Long An jeng daok maong thanh long lac phun pala praong, kayua baoh thanh long di tinh hu urang blei taong yaom glaong ka chất lượng saong mẫu mã, yaom kaom meda maraik gauk hu haong dom darak pasa karei.

Ong Trương Quang An, Akaok HĐQT- Yam ndok HTX Thanh Long Tầm Vu- Phó akaok kapul Thanh Long tỉnh Long An brei thau lac, tal tukvak ini, mblang taneh pala thanh long di tinh jeng daok khik tani tanat di tanut 8.900ha. Long An jeng thau, Trung Quốc lac darak pasa praong, patui di nan lac Hàn Quốc saong Nhật Bản. Yaom lac yaom baoh thanh long oh daok glaong yau dahlau, min mayah pala ngak oh njauk bilan, pasang iek lagaih baoh thanh long, haong yaom 25-30.000 đồng/kg, urang pala thanh long jeng daok hu laba saong tagok tani tanat. Ong Trương Quang An khan lac: " Pagap yau hatai caong di darak pasa 100 tấn ye drei tok ngak 90 tấn piah tani tanat yaom kaom. Tuk dahlau, tỉnh halei jeng pala ye cung tapa cầu, negar langiu jeng pala hu ye ngak habar piah hu yaom glaong veik. Daok urak ini, tok daok jalan ngak lac rami ramik sản lượng trun gah pabak bier jang hatai caong hasit ye baoh thanh long meng hu yaom."

 Kapul Thanh Long tỉnh Long An brei thau lac ginup prein pabak thanh long ka darak pasa EU saong dom darak pasa kan tame karei, njauk caik hatai di abih lac doanh nghiệp pablei thanh long tabiak negar langiu saong duah jalan pablei tabiak hu dom sarak kakei blei saong pataom blei tani tanat, yaom kaom lagaih piah ka urang nong pataom tame ngak praong.

Huyện Châu Thành, bhum pala rilo abih di Long An tal puac thun ini daok hu brei harak adat veik ka 85 mã số bhum pala, mã số kho saong hu tacei pato địa lý. Ong Nguyễn Văn Khải, Akaok UBND huyện Châu Thành brei thau: Yaok mã số bhum pala hu ngak bahrau ngan haong labaih 10ha. Meng 6.800ha daok tabiak baoh, huyện hu ba tame tui iek, khik ramik mblang taneh piah rami ramik baoh ka nyu lagaih. Tui ong Khải, gah điện lực daok peih bruk pasang iek hadom điện pabak ka bruk pala ngak thanh long. Tapa nan, pambuak bruk haong kanja rami ramik điện năng ka bhum pala thanh long truac gom tabiak baoh suan bilan: "Gah bruk khik ramik, huyen jeng daok pambuak haong dom doanh nghiệp pasang iek bruk truac gom di mikva, di var melam ye gah điện lực pabak đien ka thanh long meng bruk ini, kol drei meda pasang iek yaok melam, yaok tukvak mikva truac gom hadom hecta… tapa nan, adei saai hu ilamo meda thau khik ramik hu saong hu kuhri kuhria ka baoh thanh long tui yaok mbang pabak điện truac gom ini."

Piah ka baoh thanh long hu labik pablei tani tanat, gah ngak nong mboh lac, rahra njauk patagok mblang taneh pala thanh long tui jalan pataom gauk, lagaih haong hatai caong di darak pasa. Sở Công thương jeng hu pachreih ba, daong palagaih ka doanh nghiệp jhul khang bruk pablei tabiak tui jalan chính ngạch, hu harak gar pambuak gauk blei salih cambaih laih, trun dom bala dalam bruk pablei salih.

Langiu di darak pasa Trung Quốc, baoh thanh long daok hu pablei di Thái Lan, Singapore, Hàn Quốc, Nhật Bản, Ấn Độ, Australia, Châu Âu saong Hoa Kỳ. Urak ini, Sở Công thương tỉnh Long An hu mbaoh tangin pahadar haong dom Cty, tập đoàn di Hàn Quốc ka bruk roh duah, peih ngak dom danak dak di tỉnh Long An, jhul patagok bruk pablei salih, pambuak gauk duah jalan pablei kaya nong tame hệ thống parabha dalam taneh ia saong di dunya.

Langyah bruk cung cầu lagaih tui darak pasa jeng lac bruk ngak praong dalam pablei pandap panda, kaya nong. Gah thanh long jeng oh daok langiu bruk ini, tuk hu rilo ilamo tapa dom mbang gaok sarau kadau. Bruk ramik pasiam sản lượng saong chất lượng langyah hu siam bruk yaom kaom, caong hu rilo urang pala, HTX saong doanh nghiệp rik prein, ba tangin tame daong ka phun thanh long patagok hu kein laba, khang kajap dalam tukvak anak tal./.