Ðờn ca tài tử jeng daok lac sa dalam dom janih daoh me-in dui pachreih hu biak rilo rahra Bạc Liêu, jeng yau rilo tỉnh, ban gah meraong. Di Bạc Liêu, urak ini dom nghệ sĩ, nghệ nhân hu angan daok yam takai tui jalan rairah nao dahlau yau ye dom nghệ sĩ Ngọc Ðợi, Mỹ Hạnh, Giang Tuấn, Thạch Moly, Minh Chiến… Taong abih dom urang ini jeng hu menek tabiak saong praong tagok di Bạc Liêu. Meng dom rik daong di drei, dalam tukvak tamuh tabiak saong patagok đờn ca tài tử, Bạc Liêu biak njauk haong angan lac labik menek tabiak janih ilamu ini. Thun 2013, đờn ca tài tử hu UNESCO pok brei angan lac Inem krung ilamu phi vật thể lambaok di menuac sia dunya.

Bruk me-in đờn ca tài tử di tỉnh Bạc Liêu cakrok praong dalam, meng pasak ban Bạc Liêu tal dom xã bhum palei pala joa lange, bhum tapen tasik atah bayah. Ini lac janih daoh, me-in hu prein pambak tabiak khang kadang, lac bruk oh kurang hu di rilo bol bhap rahra. Di ban Bạc Liêu urak ini hu 18 kalup kapul đờn ca tài tử daok ngak bruk. Dalam nan, 4 nghệ nhân hu Karja pok brei angan Nghệ nhân Ưu tú. Bruk đờn ca tài tử di ban tuk halei jeng ba akaok dom huyện, ban sit di dom harei pataom, dom mbang pakacah di tỉnh Bạc Liêu. Nghệ nhân Ðỗ Ngọc Ẩn, daok di ban Bạc Liêu brei thau, ong kak kajap haong janih daoh me-in ini yau ralow darah. Ong khan lac, tapa jaik 35 thun kak kajap haong đờn ca tài tử, urak ini, taong abih menuac dalam sang ong thei jeng takre, bhian hu mbaok daoh me-in di sang, di dom kalup kapul dalam ban.

Amuk Trần Thị Lan Phương, Yam ndok Sở Ilamu, Thể thao saong Du lịch tỉnh Bạc Liêu khan lac, dalam tỉnh urak ini hu 150 kalup kapul đờn ca tài tử hu labaih 2.000 menuac, nghệ nhân, tài tử bhian hu mbaok daoh, me-in. Tapa nan nyu brei mboh prein khang di inem krung ini dalam raidiuk di bhap bini Bạc Liêu urak ini.

Piah khik ramik saong patagok yaom glaong đờn ca tài tử Nam Bộ, Bạc Liêu brei hu bruk ba tangin, rik prein tame di abih menuac sia. Tỉnh daok ngak pakhang, paglaong chất lượng ngak bruk di dom kalup kapul, dom nyaom đờn ca tài tử; ba bruk đờn ca tài tử tame me-in di pasak ilamu - thể thao dom huyện, ban sit, xã, phường, thị trấn, sang ilamu, labik thể thao puk, palei. Gam haong nan, tỉnh peih bruk jak ba dalam rahra rik daong padang Kadung jien daong  đờn ca tài tử haong angan ieu lac Kadung jien Lê Tài Khí – piah palagaih ka bruk khik ramik saong patagok janih daoh – ma-in ini.

Bruk đờn ca tài tử di bhum taneh Bạc Liêu dak harei dak cakrok saong jeng pandap du lịch biak gheih. Dom dam dara siam likei, siam binai, naih gheih, yaok harei pok sap daoh, ragu hò piah dui pachreih, taong takai tuai damuai atah jaik mai me-in bui sambai, ravang iek. Piah ngak ka thaot binguk bhum taneh, anek menuac  Bạc Liêu saong inem krung lambaok di menuac sia dunya dak harei dak hu rilo menuac thau tal./.