Rilo thun tapa, rahra palei 6, xã Đắk Búk So, huyện Tuy Đức, tỉnh Đắk Nông biak hadah mbaok mata kayua hu Kalan kakuh Po Hung biak khang kajap, praong gireih tuk halei jeng hu cuh gilau. Kalan kakuh Po Hung hu padang ngak meng thun 2003, praong 250m2, kayua mikva palei Phú Thọ daok pak xã Đắk Búk So halain hatain alin taneh, rik jien padai padang ngak. Ong Chử Văn Chúc, Akaok Mban peih ngak Adat pacit daa Po Hung di pak ini brei thau, dom thun camriep bahrau padang tagok, tok hu rahra dalam xã Đắk Búk So mai kakuh di dom harei lễ Tết, abih di nyu nan lac harei ngak pacit. Hadei di nan, rahra di rilo puk palei karei dalam tinh jeng mai ravang iek, pok kakuh.

 “Taong abih mikva palei Phú Thọ tame pak ini ngak mbang lac biak atah. Dak atah hadom ye dak uan palei du nan. Blaoh mikva alin taneh, rik jien padai padang ngak kalan piah ngak labik kakuh po. Kol dahlak pataom gauk mai ini, nan ye jeng hu trun manieng hatai uan palei, piah ka rai hadei dom anek taco patui veik jalan nao di rai ame amaik, rai saai yau nan bo ngak bruk kakuh ini”.

Angaok ceik Phượng Hoàng dalam labik ju lit thác Prenn, phường 3, ban Đà Lạt, tỉnh Lâm Đồng jeng hu kalan kakuh dom Po Hùng, hu padang ngak di thun 2002 tui mẫu Kalan kakuh Po Hùng angaok ceik Nghĩa Lĩnh, tỉnh Phú Thọ, haong đền Thượng kakuh Lạc Long Quân saong Âu Cơ, đền Trung kakuh Patao rai ka tijuh saong đền Hạ kakuh Patao rai puac abih di dom rai Patao Hùng. Ini lac labik hu rilo bol bhap rahra di rilo labik duah mai piah hadar veik dom rai Po Hùng. Hu rilo mbang hu mbaok tuk ngak Adat pacit da-a Po Hùng pak ini, saai Nguyễn Thị Minh Hiếu, daok pak phường 3, ban Đà Lạt brei thau:

 “Lac sa rahra daok di Đà Lạt, yaok thun dahlak haong adei sa-ai dalam sang mai pak ini piah hu mbaok tame ngak adat. Dahlak caong lac tapa ini dom anek hu thau jang ka ilamo meng kan di bangsa Việt Nam, gam haong nan, jeng lac tuk piah ka kol dahlak hu mbaok tame dom bruk ngak ilamo dalam piah daong ngak brei pabak rilo jang dom ilamo siam gheih di bangsa Việt Nam".

Adat pacit daa Po Hùng jeng hu peih ngak biak praong prang yaok thun di Labik inem krung ilamo pakat negar Đình Lạc Giao, ban Buôn Ma Thuột, tỉnh Đắk Lắk, hu mbaok dom urang pan akaok tinh, dom so, dom gah saong bol bhap rahra. Yaok urang thei jeng brei mboh hatai iek praong cuh gilau pahadar, ngak adat kakuh Po Hùng meng atah. Thun ini, harei pacit daa Patao Po Hung hu peih ngak praong prang dalam 2 harei (lac harei 9 saong harei 10 bilan 3 saka ia bulan) ngan haong rilo bruk ngak yau ye papaok ahar bánh chưng, ngak bánh dầy, Adat Tiên thường saong Adat cuh gilai pok bingu, pok paling pandap tagok Po Hùng. Ong Lại Đức Đại, Phaok Yam ndok Sở Ilamo, Thể thao saong Du lịch tỉnh Đắk Lắk brei thau:

 “Tuk mai ngak Adat pacit daa Po Hùng di Đình Lạc Giao dalam ban Buôn Ma Thuột oh lac piah ka kol drei sahaneng tal Adat pacit da-a bo pak ini daok lac labik pambuak talei jumpataom Kinh – Thượng. Yaok thun, di harei pacit daa Po Hung 10-3, rahra biak sangka saong mai cuh gilau, likau ka taneh ia sron mbon, rahra salamat, likau ka prein yava hu khang kadang saong jeng pamaong tal bruk jumpataom gauk di pak kalan ini.”

Jeng tui ong Lại Đức Đại, Danak dak padang ngak Kalan kakuh Po Hung di bhum taneh Tây Nguyên pak tỉnh Đắk Lắk kayua UBND tỉnh Đắk Lắk peih ngak, hu payua ka Mintri Ilamo Thể thao saong Du lịch piah pok pathau tagok Thủ tướng Rajaei. Kalan kakuh Po Hung hu padang ngak tui jalan lac jak ba rahra rik jien tame di mblang taneh praong labaih 20ha, hu caik di mbuan ceik Cư Mblim, di dalam xã Ea Kao, ban Buôn Ma Thuột saong xã Ea Tiêu, huyện Cư Kuin. Bruk buh jien tame padang ngak Kalan kakuh Po Hung piah brei mboh hatai thau dhar phul praong glaong di rahra daok pak Tây Nguyên ngan haong dom rai dahlau hu buh prein padang taneh ia saong khik caga taneh ia. Gam haong nan, lac pabak ka hatai caong di rilo mikva daok pak tỉnh Đắk Lắk jang yau di dom tinh, ban pak Tây Nguyên.

Labik halei hu urang Việt daok, lac labik nan hu pok kakuh Po Hùng. Dom baoh kalan kakuh Po Hùng di Tây Nguyên hu daong ka rahra pak ini brei mboh hatai iek praong, iek glaong, hadar dhar phol dom Po Hùng./.