Kongti TNHH Changshin Viet Nam di huyen Vĩnh Cửu hu labaih 40.000 urang ngak daok pataom tame bruk pakacah ngak bruk, ngak tabiak pandap panda piah pablei tabiak dalam puac thun 2024. Ong Đặng Tuấn Tú – Akaok Kapul urang ngak di Kongti Changshin Viet Nam brei thau, gah ngak mbang pablei salih kuhria buh tabiak labaih 650 ty dong piah daong jien raya Tet Ula Naih 2025 ka urang ngak.

Dalam nan, jien daong brei ka urang ngak ralo glaong di abih hu do 2 mbang jien sa bilan, mboh jaik labaih 20 trieu dong. Brei ka dom urang bahrau tame ngak mala 1 thun, jeng hu brei jien daong raya Tet piah pachreih hatai.

Tui ong Tú, urang ngak mbang pablei salih kham merat ba abih prein piah khik kajap jien mek tame, raidiuk di urang ngak piah ka urang ngak bruk dalam puac thun biak pachreih hatai urang ngak.

 “Urang ngak mboh biak chreih sambai, tukvak masa kan kandah kongti jang kuhria brei kein lagaih di abih. Tuk ini pandap panda pablei tabiak hu siam, urang ngak dak harei dak chreih chrai tuk mboh kol dahlak khan pilih mek rilo urang mai ngak.”

Di huyen Long Thành, hu 196 kapul urang ngak labik dom urang ngak mbang blei salih dalam Pahasa kapul urang ngak di huyen pasang iek haong labaih 55.000 urang. Tukvak masa ini, Pahasa kapul urang ngak huyen Long Thanh hu padang danak dak kuria sangka raya Tet tani tanat ka urang ngak.

Amuk Đào Thị Kim Loan – Phaok Akaok Pahasa kapul Long Thành brei thau, dom urang ngak hu raidiuk daok kan kathaot, urang ngak kong mbang Tet raya di dom baoh sang apah daok jeng hu ieik glang sangka, daong brei:

“Brei peih ngak danak dak adaoh tamia, alin hadiah pandap ka, urang ngak bruk oh hu nao sang mbang raya Tet di palei. Langiu di nan, padang bruk pataom dom urang dalam baoh sang urang, danak dak rivang, alin hadiah pandap ka urang ngak bruk di baoh sang pah, kuhria labaih 7.000 paok pandap nda brei alin hadiah, yaok paok pandap nda brei hadiah hu yaom 1 trieu dong.”

Di angaok taneh huyen Trảng Bom hu labaih 110.000 urang ngak, dalam nan hu rilo urang kathaot rilo thun baloh oh ka hu nao sang mbang raya Tet. Piah daong, sangka ieik glang ka dom urang ini, Pahasa kapul huyen daong 2.000 harak radiah meng bruk kuria duah radaih juon pajeng atau daong radaih ka urang nao palei.  

Amuk Trần Thị Hồng Thảo – Akaok Pahasa kapul huyen Trảng Bom brei thau, kuhria dahlau kapul urang ngak daong labaih 14.000 paok pandap sangka, daong ka urang ngak, urang ngak kan kathaot ruak kan, njauk bala kayua ngak bruk mbak, baoh sang kathaot.

“Daong radaih brei nao palei mbang raya Tet, daong peih ngak 2 malam daoh tamia salam Tet alin hadiah ndap nda haong suak sam mek mayaom hadiah kol dahlak jeng brei peih ngak mbang pakacah ngak gheih phun mai, phun đào piah ngak makre harei raya Tet.”

Thun ini, Pahasa kapul tinh Dong Nai daong 1.000 harak ndik radaih apui ba urang ngak kathaot nao sang mbang raya Tet Ula Anaih 2025 meng kadung jien di Pahasa kapul Lien doan Lao dong tinh.

Dom bruk hu daong urang ngak dam dara hu palei di dom tinh meng Nghệ An ba tabiak gah Barak hu 2 thun ba tagok oh hu nao sang mbang Tet atau dom urang dam dara doan vien urang ngak cong doan kathaot.

Langiu di nan, harei raya Tet Ula Naih 2025, Akaok Taong Pahasa kapul Lien doan Lao dong Viet Nam neh rabha 70 harak ve ahaok par ka Lien doan Lao dong tinh Dong Nai piah peih ngak bruk daong urang ngak di dom tinh gah Barak hu 3 thun ba tagok oh ka nao sang mbang Tet./.