Bahrau yuak padai He Thu, padai pala njauk, pablei hu yaom glaong. Abih 4 urang anek jeng praong saong hu bruk ngak tani tanat. Bruk caga raok Kate di sang amuk La Thị Thu chreih chrai jang. Dom kaya pandap mbang di bangsa cam meng kal hu amuk Thu caga dahlau piah pok tagok ka mukkei dalam harei Kate. Amuk La Thị Thu, palei Hamu Tanran, xã Phước Hữu, huyện Ninh Phước brei thau:

“Thun ini padai jeng bahrau yuak hu yaom glaong saong hu nang suat nan pak sang jeng hu mbang Kate. Ngak tapei nung, ahar thuẫn, blaoh rilo tapei ahar tui adat cambat ilamo Cam. Harei Kate dom anek taco jeng pataom ginup. Daok pak sang jang uan tabuan, chreih chrai piah raok Kate, duh mukkei mukkaok’’.

Thun ini, piah raok salam urang Raglai ba khan ao Po mai padang ngak Harei Kate, rahra palei Hamu Tanran, xã Phước Hữu, huyện Ninh Phước hu padang ngak danak dak parang iek adaoh tamia, tamia bol bhap haong 350 urang hu mbaok tame. Dom kadha adaoh tamia ngak jeng bruk bui sambai chreih chrai ka Harei Kate.

Ba drei tame bruk raok uan Harei Kate, meng dahlau ini dom harei dom nghệ nhân daok di palei hmu Craok hu ngak tabiak rilo kaya pandap ndung bak ilamo Cam. Piah ngak gheih meta maong ka tuai damuai tuk mai rivang palei lan am hamu Craok, sa-ai Vạn Quan Phú Đoan hu ngak sa labik ilamo lan am, haong sang gak, daneing haluk piah tuai damuai thau ka raidiuk, adat cambat jeng yau bruk khik ramik ilamo Cam. Sa-ai Vạn Quang Phú Đoan, palei Hamu Craok, ban sit Phước Dân ndom lac:

“Kol dahlak hu padang ngak parang iak adaoh tamia ka tuai damuai mai ravang thau tal urang Cam hu bruk ngak lan. Tuk tuai mai tuai thau labik ilamo Cam meng kal, Kol dahlak caong tuai damuai thau ka nghệ thuật lan piah dak harei dak hu rilo urang mai tal palei lan am’’.

Huyện Ninh Phước, sa labik hu  mikva Cam daok rilo abih dalam tinh Ninh Thuan haong 51 rabau menuac. Meng ngak siam danak dak bruk ngak negar bo thun 2024,  Ninh Phước hu peih brei 34 tỷ dong piah ngak danak dak parilo bruk ngak mbang saong daong bruk ngak mbang gah nong nghiep. Meng nan, sang kathaot urak ini tok daok 700 sang, hu 1,84%. Ong Đàng Năng Tom, Phaok akaok UB bhap bini huyện Ninh Phước, Ninh Thuan brei thau:

 “Dom sarak di Ndang, karja hu buh jien ka co so ha tang, jeng yau daong mikva Cam patagok bruk ngak mbang. Tapa dom bruk ngak tabiak bahrau hu tagok jien mek tame di mikva, brei kein lagaih ka mikva Cam raok Harei Kate bui sambai, trei sir saong haniem phol.’’

Dalam tuk ini, rilo gah ngak mbang, pablei salih di tỉnh hu rilo bruk ngak pahla piah klah rabha haong dom urang sang kan kandah dalam bol bhap, daong ka mikva bui sambai, chreih chrai raok Harei Kate di bangsa. Harei ini, lambaok Tinh uy, HĐ bhap bini, UB bhap bini, Uy mban MT negar Việt Nam tinh Ninh Thuan hu mai rivang, tadhau ayuh Harei Kate tal dom halau janeng, urang hu angan je lac urang Cam tui agama Ahier.

Kate lac harei piah hadar tal dom po yang, dom po patao hu rilo prein rik daong, hu bol bhap pok meyaom; pahadar ong muk ong kei saong likau ka taneh ia saong rahra siam mekra salamat, hajan siam angin lagaih, yuak paik hu jien tame rilo. Meng dom yaom glaong ilamo siam gheih, tuai damuai atah jaik hu ba drei tame bruk bui sambai, chreih chrai di Harei Kate saong hu rilo bruk gheih caik hatai tuk mai tal harei Kate di bangsa Cam Ninh Thuan./.