Dalam ginreih, labaih 30 anek saih naih gheih di 7 xã tapen negar tỉnh Đắk Nông hu cuh gilau, pok bingu di Labik pahadar dom Anh hùng liệt sĩ Đồn biên phòng pabah bambang negar Bu Prăng, xã Bu Prăng, huyện Tuy Đức, tỉnh Đắk Nông. Ini lac sa binah dalam danak dak “Mbang bac tapen negar” kayua Bol lin Biên phòng Đắk Nông peih tabiak ka dom anek saih. Pak ini, dom anek saih hu pang khan ka bruk mesuh metak, oh huac matai lahik di dom rai dahlau, abih di nyu nan lac 16 liệt sĩ di Đồn Biên phòng pabah mbang negar Bu Prăng Anh hung dang tagok mesruh piah pacang khik bhum tapen negar Bu Prăng. Dom ilamo sajarah ini ngak ka dom anek saih biak drut droi, pabak hatai anit ranam Taneh ia ka dom adei anek saih. Adei Y Dũng, anek saih tal 7A5, Sang bac THCS Nguyễn Huệ, xã Thuận An, huyện Đắk Mil, anek raong di Đồn biên phòng Thuận An khan lac.

“Tuk hu mbaok tame tal bac di cột mốc anek mboh biak hadah mbaok ka taneh ia anit ranam di drei. Anek biak caong khin hu rilo mbang bac yau ini veik. Hadei ini praong tagok anek caong khin jeng sa urang bol lin, piah pacang khik cột mốc saong pacang khik taneh ia di drei.”     

Hu mbaok tame danak dak “Mbang bac tapen negar”, gam haong cuh gilau, pok bingu di Labik pahadar dom anh hùng liệt sĩ, dom adei anek saih hu dom cei gru quân hàm hijao ba nao ravang, ba drei tame di jalan pasang iek, cột mốc tapen negar, labik tui iek menuac urang, radaih tame tabiak nao mai di jalan tapen negar… Ba drei tame, pang dom ilamo, dom kadha oh ka hu dalam tapuk siphau lac biak ginreih saong makna hu pabak hatai anit ranam taneh ia, palei negar saong daong prein ka dom adei anek saih bac ta-a. Mbang camereip hu mbaok tame danak dak “Mbang bac tapen negar” di cột mốc tapen negar ka 55, adei Triệu Thị Cẩm Nhung, anek saih tal 9A, Sang bac Tiểu học saong Trung học cơ sở Bế Văn Đàn, xã Thuận Hà, huyện Đắk Song biak chreih chrai ka dom bruk ba drei tame.

 “Anek mboh var bac biak bui sambai saong hu rilo kadha ba drei tame jang dut haong tuk anek bac pak sang bac. Tuk bo hu ba drei tame saong hu bac tapa kadha bac pak ini ye anek mboh hatai anit ranam taneh ia tagok glaong jang saong mboh drei brei hu hatai sahneng ka bruk pacang khik tapen negar jang.”

Thun ini lac thun camereip danak dak “Mbang bac tapen negar” hu Bol lin Biên phòng tỉnh Đắk Nông peih tabiak di taong abih dom đồn biên phòng di 7 xã tapen negar, daok dalam 4 huyện Cư Jút, Đắk Mil, Đắk Song saong Tuy Đức. Thiếu tá Nguyễn Văn Nga, urang Chính trị phaok Đồn Biên phòng Tuy Đức brei thau, tapa danak dak, kapul caong hu daong rahra, anek saih di tapen negar thau ka dom adat hukum brei ngak tui tuk nao mai, tame tabiak labik tapen negar, thau jang ka quyền hạn, chức năng, bruk ngak di Bol lin Biên phòng. Gam haong nan, pabak, pambak hatai anit ranam Taneh ia ka rahra saong anek saih di tapen negar.

“Jeng caong pambak hatai anit ranam tapen negar, quyền ngak po ginrieh di Taneh ia ngan haong dom adei anek saih. Kol dahlak caong pabak apui ka dom rai, dom adei anek saih saong rahra oh karei hagait di angaok tapen negar bo di dom xã dalam bhum ba gauk pacang khik khang kajap jalan tapen negar, cột mốc".

Dom mbang bac tapen negar nbiak siam lagaih, kein laba saong ndung bak makna nan daok hu pambak tabiak di dom xã bhum tapen negar di tỉnh Đắk Nông. Tapa dom mbang bac ba drei tame hu daong ka dom adei anek saih pabak hu rilo ilamo mboh di anak meta, gam haong nan pabak hatai anit ranam taneh ia, palei negar, daong pabak prein ka dom anek saih kham merat bac ta-a piah jeng dom menuac siam mekre. Jeng tapa nan, daong padang bruk khik caga biên phòng taong abih rahra di bhum tapen negar di Taneh ia./.