Sang saai Tao Thị Coong, bangsa Lự, daok di puk Phiêng Chá, xã Nậm Tăm, huyện Sìn Hồ (Lai Châu) dahlau deih lac sang kathaot di abih dalam puk. Jien mek tame dalam sang tok maong tame bruk ngak hamu 1 vụ, nan ye bhian kurang anak, kurang likuk. Meng phun jien brei masaiy laba lap di Danak dak 8 ka “peih ngak bruk urang likei kumei yau samu gauk saong langyah dom bruk samar drah ngan haong urang kumei saong uranaih”, sang saai hu kanja bhum palei saong dom Pakat Kapul urang kumei daong ba, pato tacei jalan ngak mbang, duah jien. Kayua tari tareng, kham marat oh huac glaih glar, tal urak ini, sang saai hu bein phun mbang baoh praong labaih 3.000m2, danao raong ikan praong labaih 1.000m2 saong 5 drei kubau. Oh lac tabiak truh kan kathaot, sang saai daok jeng lac baoh sang angan je dalam puk palei, dalam xã.

"Hu Kapul Urang kumei dakwah pathau khan brei ka bruk urang likei kumei yau samu gauk, diuk pasang dahlak tuk halei jeng daong gauk dalam bruk ngak saong dom bruk yaok harei, sangka ieik glang ka anek mbik nao bac hu ginup".

Xa bhum ceik glaong Tà Ngảo, huyện Sìn Hồ, tỉnh Lai Châu hu 13 puk ngan haong 2 bangsa lac Mông, Dao daok. Kayua jalan sahaneng saong adat cambat oh daok lagaih di bangsa, nan ye dahlau deih, urang kumei luac thun tok thau nao ngak, dih tapui manek. Min, kayua dom pakat kanja, dom kapul nyaom, abih di nyu nan lac Kapul Urang kumei kham marat pathau khan pato pakai ka ilamo hukum saong daong ka phap ly, nan ye adei saai dak harei dak salih jalan sahaneng, dak harei brei mboh bruk urang likei kumei yau samu gauk dalam rahra.

Urang taha angan Vừ A Páo, akaok but pajaih talei Vừ di puk Thà Giằng Chải, xã Tà Ngảo brei thau: urak ini adei saai kumei di di ini hu mbaok tame dom mbang ginum biai dalam puk, ginum biai di dalam but pajaih saong hu mbaok tame rilo bruk ngak di rahra, bhap bini.

"Urang likei kumei yau samu gauk lac biak hu yaom glaong, oh ngak siam bruk urang likei kumei yau samu gauk meda gaok biak rilo kan kandah dalam bruk khik haniem phul dalam sang; bruk taong paoh dalam sang meda bhian rahtabiak, abih di nyu nan lac urang kumei saong uranaih. Meng di tuk dahlak ngak akaok but pajaih tal urak ini, dalam puk dahlak daok hu 127 sang, jaik 800 urang ye yaok urang ngak bruk urang likei kumei yau samu gauk lac biak siam. Oh hu urang likei halei taong urang kumei veik tra".

Kapul Urang kumei Sìn Hồ hiện hu labaih 180 kapul sit, labaih 16.000 urang, ngan haong labaih 95% lac urang bangsa takik. Amuk Lâm Bích Hiến, Phaok Akaok Kapul Urang kumei huyen brei thau lac: piah ka dom adei saai dak harei dak salih jalan sahaneng, salih ilamo, marat hatai jia tame rup drei yam tagok, dom thun tapa, dom pakat kapul hu kham marat dakwah pathau khan, pasang ieik dom asal kadha di Hukum urang likei kumei yau samu gauk tal dom urang dalam kapul saong rahra. bruk dakwah pathau khan hu peih ngak ngan haong rilo jalan ngak, yau ye sân khấu hóa, pakacah, mbang nyaom, ginum biai, ndem mayai nao mai,… Asal kadha dakwah pathau khan pataom tame bruk taong paoh gauk dalam sang, padang ngak baoh sang ilamo, baoh sang cak rok patagok karo kajap,…

" Kapul Urang kumei huyện Sìn Hồ jeng hu peih ngak dom bruk ngak, piah jhul khang bruk urang likei kumei yau samau gauk di dom gah. Kon dahlak hu peih bruk dakwah pathau khan, pato ilamo paglaong hatai sahaneng dalam bruk urang likei kumei yau samu gak ka urang jakar, urang kumei dalam kapul saong rahra di dalam bhum. Gam tui di nan, peih dom tal pasram ka ilamo raidiuk, ilamo hukum piah ka urang kumei cak rok patagok saong jia jang, tapa nan paglaong prein khang ka urang kumei".

Dom salih bahrau dalam jalan sahaneng ka bruk urang likei kumei yau samu gauk di rahra hu ba mai kein lagaih di Lai Châu, tuk dom bruk ngak baoh sang trei sir, samu gauk, cak rok, haniem phul dak harei dak rilo. Dom bruk ngak kapul, nyaom urang kumei, urang dalam kapul hu pasang, anek njin ma túy saong ngak suan adat hukum mboh rilo abih. Ini lac asal kadha piah padang ngak xa hoi saron mbon, cak rok patagok. Di rilo bhum palei, urang kumei daok ieu lac dom urang dang akaok di dalam bruk padang ngak palei pala bahrau, ba akaok nao dahlau dalam bruk cak rok patagok bruk mbang ngui duah jien, patruh eik patrun kan kathaot, meng nan rik tame biak rilo dalam bruk dak padang puk palei dak harei dak cak rok patagok, kaya mada, siam makre jang./.