Bui sambai dalam baoh sang bahrau, ong Kim Cươl daok di palei Wath Pích, phuong Vĩnh Phước, ban sit Vĩnh Châu brei thau, dahlau daih sang ong kan kandah, sang danaok taik tahak, sa mbang hajan angin mai biak rambah. Hu karja daong brei 44 trieu dong saong hu meraiy Gilang paraik sarak kanja hu 40 trieu dong piah padang ngak sa baoh sang khang kajap, nan ye urak ini sahanang hatai ngak mbang. Bui sambai jang lac sang ong hu daong salih bruk ngak haong yaom jien daong lac 10 trieu dong. Ong Kim Cươl brei thau:

“Hu karja caik hatai sangka daong ka mikva Khmer kol dahlak, sang dahlak biak uan tabuan lo. Hu pasang iek daong sang daok, phun jien ngak mbang, dahlak meda kham merat ngak mbang yam tagok piah raidiuk hu tani tanat jang".

Rilo mikva urang bangsa Khmer ndom mayai lac, hu karja sangka daong sang daok, phun jien ngak mbang, pato bruk ngak,… mikva bangsa biak bui sambai. Pagap Yau ye sang amuk nai Sơn Thị Lện daok di palei Wath Pích, dahlau daih tuk hajan thac, angin yuk tame sang taik tahak, urak ini hu daong meng danak dak sang daok saong hu meraiy meng gilang paraik sarak kanja daong ka amuk padang hu baoh sang bahrau khang kajap. Amuk Sơn Thị Lện, brei thau, sang oh hu taneh ngak mbang, rilo meng lac nao ngak pah piah duah jien raong dom anek. Hu 6 drei pabui, anak tal ba nao pablei, amuk caong hu jien mek tame piah patui veik buh jien tame peih praong bruk ngak mbang raong glang:

“Dahlau daih raidiuk di dahlak rambah rambup lo, urak ini hu sang daok bahrau nan ye jeng trun manieng kan kandah. Dahlak kham merat raong pabui piah hu jien sangka ka sang dahlak, kham merat piah oh daok kathaot veik tra,  pato anek mbik kham merat ngak mbang piah harei hadei raidiuk hu tani tanat”.  

Phuong Vĩnh Phước hu labaih 65% lac mikva Khmer. Peih Ngak dom Danak dak bruk ngak daong ka mikva urang bangsa takik, Phuong hu 100 baoh sang hu pilih ruah piah daong sang daok, 15 baoh sang hu daong brei taneh daok, 187 baoh sang hu daong salih bruk ngak, yaok rituh baoh sang karei hu daong cak rok patagok bruk ngak mbang, danak dak ia hacih sa-at palei pala…meng gah daong ini, raidiuk rahra hu patagok, dom baoh sang kathaot hu trun samar, pagap yau dom sang kathaot di Phuong Vĩnh Phước tok daok 1,87%. Ong Vương Hồ Vũ, Phaok akaok Uy mban Bhap bini Phuong Vĩnh Phước brei thau:

“Piah bruk trun kathaot dalam tukvak masa anak tal hu khang kajap ye uy mban Bhap bini phuong patui veik peih bruk pambuak haong dom kapul ngak padang dom bruk ngak, dalam nan, pambuak haong dom kapul ngak tui jalan yaok sa kapul khik ramik tapol baoh sang piah ngak habar tacei ba bruk ngak, ka rahra bruk hu siam lagaih abih piah mikva yam tagok tabiak truh kathaot khang kajap”.

Ban sit Vĩnh Châu lac bhum palei hu rilo mikva bangsa takik ngan haong labaih 52% lac urang bangsa Khmer saong 17% lac urang bangsa Laow, ban sit hu bhum tapen tasik, lac labik kan kandah nan ye raidiuk di mikva jeng daok gaok rilo kan kandah, dom sang kathaot, sang jaik kathaot daok rilo. Dom thun jaik ini, ban sit Vĩnh Châu tuk halei jeng hu dom pakat uy Ndang, karja sangka caik hatai pato tacei, buh jien tame, daong biak rilo tapa dom Danak dak bruk ngak Negar patrun kathaot, Danak dak daong patagok kinh te xa hoi bhum mikva urang bangsa takik saong bhum ceik…meng nan bo jien padai saong hatai sahaneng di rahra pak ini daok dak harei dak patagok.

Gam haong dom bruk daong ba biak praong meng dom Danak dak bruk ngak negar ka bhum mikva urang bangsa takik, daok rik prein daong tame kein lagaih paglaong raidiuk di mikva dalam bhum palei saong jeng lac asal kadha ngak ka Vĩnh Châu brei patagok samar dalam tukvak anak tal./.