Bruk 4 urang ngak mbang di Kong ti Cổ phần Net Zero Carbon, Kong ti Cổ phần Công nghệ Nano BSB, Kong ti Cổ phần MTK Hữu Thành saong Spiro Carbon gam haong urang ngak nong ba tangin tame ngak padai Thu Đông angaok mblang hamu 18ha di xa Trường Long Tây, huyen Châu Thành A, tinh Hau Giang. Bruk ngak hu drak padai pajaih tui jalan ngak “Pala padai krah hadah that – thu tablak” (AWD). Abih bruk praong tagok di phun padai hu iek glang kayua tangin kakai di Kong ti Spiro Carbon. Taphia nan lac mblang hamu piah dut haong gauk praong 9ha. Dua mblang hamu jeng pandar pajaih padai OM5451. Ong Trần Minh Tiến, Taong Yam ndok Kong ti Cổ phần Net Zero Carbon brei thau: 

“Kol dahlak ba tabiak jalan ngak meng akaok tal iku, meng ngak taneh, trun pajaih, blaoh ieik glang phun padai. Bruk ngak di kol dahlak hu ba tabiak jalan ngak cambaih laih yaok harei lac sa urang ngak nong brei ngak hagait saong ngak biak siam mekre tani tanat ye meng mek hu bruk jak jeng glaong abih. Dom baoh sang urang ngak nong pambuak haong kol dahlak ye tal tuk ini abih tih hamu pala iek mboh jak jeng. Ngan haong jalan ngak ini kol dahlak ba tabiak hu rilo padai, padai hacih sa-at jang, hijao jang, patrun jien buh tame.

          Hadei jaik 100 harei, bruk ngak ini brei mboh lagaih. Padai ngak mek ini hu labaih 7,4 tấn sa ha, tagok glaong labaih 1 tấn sa ha dut haong hamu brei ngak ieik. Tui di nan daok mboh, tagok labaih 1,2 tấn sa ha dut haong padai kuhria bhian rah tapa di xa Trường Long Tây.

          Brei ka jien buh tame ngak, hamu dalam bruk ba tame ngak mboh brei trun hu 2,8 triệu đồng sa ha dut haong hamu brei ngak ieik., Pagap ye jien pajaih trun hu 780.000 đồng sa ha, jien khak trun 740.000 đồng sa ha, jru pacang khik phun padai trun 1,3 triệu đồng sa ha. Jien laba urang ngak nong mek hu meng mblang hamu ngak tui bruk ngak jaik 35 triệu đồng sa ha, tagok labaih 11 triệu đồng sa ha dut haong mblang hamu ngak iei daih, samu brei taong yaom tagok jaik 47%.

          Kuria brei taong abih mboh bruk pala drak ini daong ka rahra brei patrun 30% jru pacang khik phun padai, 15% khak drak. Padai pajaih pandar jeng trun hu meng 120kg sa ha trun daok 80kg sa ha. Dalam nan lac, meng bruk ngak taneh, drak padai pajaih, drak khak, yuak padai…jeng hu jamraik salih ka prein menuac. Ong La Văn Hành daok di xa Trường Long Tây, huyen Châu Thành A, tinh Hậu Giang, urang ngak nong hu mbaok tame ngak bruk ngak ini bui sambai brei thau:

 “Kluk blaoh hu haok kapal drak, haok kapal buh khak, blaoh tal 10-12 harei patame ia tui ia blaoh drak khak, tal 20-22 harei drak khak mbang ka 3, bloh tal 45 harei drak khak tuk phun tabiak asar padai. Drak khak, pruh jru, drak pajaih… meng jamraik abih. Dut haong bruk pala drak meng kal ye jien buh tame ngak mboh trun, padai rilo jien laba tagok”.

          Ong Ngô Minh Long – Yam ndok Sở Ngak nong saong Patagok palei pala tinh Hau Giang brei thau:

          “Padai Thu Đông ini ye Sở Ngak nong saong Patagok palei pala jeng hu pambuak haong dom kapul piah peih ngak, tal tukvak masa ini ye dom bruk ngak iek daok hu padang peih ngak labaih 50ha taneh. Meng camereip taduan hu jak jeng biak lagaih. Padai di mblang hamu cakrok patagok biak siam. Tinh Hau Giang tut angan haong Mentri labaih 15.910 ha ye gah ngak nong tỉnh daok brei ngak gam gam di mbang padai Đông Xuân masa anak tal. Tapa bruk ngak ini ye kol dahlak jeng ieu da-a dom urang ngak mbang, dom kapul hu bruk ngak lagaih bahrau, khik kajap hatai caong patakik tathuak nerak pambuak haong tinh Hau Giang piah peih ngak danak dak dalam tukvak masa meng anak tal.”

          Tui taong yaom, bruk ngak ini hu ngak tabiak sa jalan pala padai krah hadah ilamu barau, ganap meng akaok tal iku, meng kapul pabak pandap panda ngak, tal bruk pabak dom jalan ngak ky thuat, ba tabiak dom bruk kuan trắc, dut ieik, pathau khan bruk kuhria tathuak nerak sang kreih camin, daong atak klak dom kan daman ka bruk patakik tathuak nerak, patrun jien buh tame ngak, parilo padai saong patagok jien laba./.