Inem gluh bok kayua ia hajan jeng daok kandaong di ganing haluk sang; do talei paga betong jaleih, rilo paben sang njauk papaok; var ro manuk ada lamo kabao tayah tayac, hamu padai bein apuh khut khat; tu la-an, tivi gam haong kaya karei dalam sang khut abih … daok caik sa mbuan di sa labik mblang sang. Nan lac thaik thaot di palei Cam palei Lâm Giang, xa Hàm Thuận Bắc, tinh Lam Dong hadei labaih 10 harei rah tapa mbang ia sua praong.

Ong Thông Minh Đặng, daok di palei Lâm Giang, xa Hàm Thuận Bắc brei thau, jaik 4 sao padai jaik yuak urak ini ia sua ngak khut tayah abih, daok labaih 3 sao phun panat labaih 3 thun jeng njauk ia theik, lahik abih putih tangin.

“Labik ini khat lahik trak lo, paga jaleih, urak ini mikva jeng caong tame bruk daong di Karja hu dom thau dom piah samar drah tani tanat raidiuk.”

Jaik nan oh atah, diuk pasang ong Mã Chất saong amuk Mã thị Lạc daok jal val ramik dom mbuan paok khut tayah piah srap gap padang baoh sang bahrau. Dalam mbang hajan ia sua meng blaoh ngak ka sang danaok di ong amuk jaleih taong abih. Gam haong paok jien Karja daong, baoh sang ong buh tame veik piah ngak sang.

“Ia sua mai samar lo, drei caga oh samu.”

Ong Thông Minh Đồng, Akaok palei Lâm Giang, xa hàm Thuận Bắc, tinh Lam Dong brei thau, tapa kuhria di Mbang iek glang di palei hu 349 baoh sang khut tayah kayua mbang hajan ia sua meng blaoh (bruk kanjah jhak karei gauk). Dalam nan, hu labaih 80 baoh sang jaleih paga.

“Urak ini mikva jeng daok pasiam rah rah kanjah jhak hadei hajan ia sua.”

Dalam mbang hajan ia sua bahrau blaoh, dalam xa Hàm Thuận Bắc hu 7 baoh sang jaleih, rilo danak dak duh bruk daok dang di rahra njauk jaleih khut tayah yau ganing haluk paga, sang njuel drei, mblang sang… 25 jalan menyek, meng betong ximang di dalam xa njauk khut tayah, dalam nan hu 7 jalan njauk klaih klaoh, dom sang karei ye njauk haluh jaleih biak trak. Taneh ngak nong njauk khat khut labaih 2.000 ha; athur anek raong matai saong Ia sua theik labaih 10.000 drei. Kuhria taong abih khat lahik jien labaih 50 ty dong.

Ong Đặng Ngọc Long, Akaok jabat Kinh te xa Hàm Thuận Bắc brei thau, langiu bruk sangka di dom pakat karja daok hu daong di dom “urang ngak pahla” dalam saong langiu tinh piah pasiam kanjah jhak kayua hajan ia sua, samar drah tani tanat raidiuk rahra.

“Daok dom sang danaok di dom rahra njauk khut khat lahik yau ye: mblang papaok, talei paga jaleih saong dom ndap nda kaya karei… ye UB Bhap bini xa jeng hu pataom taong abih saong pathau khan haong So Ngak nong saong Alam langik pataom taong abih payua UB Bhap bini tinh piah dil samu daong ka rahra.”

Piah daong prein dom baoh sang njauk khat lahik kayua hajan ia sua, bahrau blaoh ong Phan Đình Trạc, Uy vien Mentri Politit, Bi thu Trung uong Ndang, Akaok Mbang Noi chinh Trung uong hu mai rivang tangi dom baoh sang di labik Binh Thuan klak. Ong Phan Đình Trạc jeng pandar dom pakat karja khang hatai ba tagok haong pakat angaok ka dom tavak tavaiy dalam luac jalan daong rahra, piah pasiam dil samu. Abih di nyu nan lac dom harak gal pambuak tal bruk gilang pariak brei kadun harei bayar jien, gaok mai lac klak jien laba…

Mbang ia sua bahrau blaoh hu ngak rilo baoh sang bangsa Cam palei Lâm Giang dalam nan hu rahra labik Binh Thuan klak laik tame bruk kan kandah di abih. Kayua yau nan, dom so, dom gah pambuak brei jhul samar bruk taong yaom bruk khat lahik, meng nan rabha kapul piah ba tagok pakat angaok samar drah daong ka mikva tani tanat raidiuk tuk thun jaik abih, Tet raya jaik mai./.