Dom harei ini, langiu di bruk ngak salah blaoh dom baoh gaok glah dak blei dalau payua nao rilo tinh, ban, bhap bani urang bangsa Cam di palei ngak gaok glah Hamu Craok daok rami ramik labik parang iek, labik ngak lan piah taduan raok tuai damuai mai jirah rivang ma-in.

Hop tac xa ngak gaok glah Hamu Craok gam hu labaih 30 urang daok ngak bruk abih pren, ngak tabiak biak rilo ndap nda duh ka bruk blei pandar du tuai damuai saong dom harak bruk pablei salih pandap dalam tukvak masa raya Tet Nguyen dan.

Thun ini, rup anek asaih hu ralo urang blei takre pandar sangka rilo jang tal dom janih lan am bhian pandar karei. Athaih oh lac thaik binguk pambuak pagam haong thun thak athaih bo daok hu makna ba brei patuah jamo, pren khang, trei sil saong jak jeng siam mekre.

Rilo urang gheih tangin di Hop tac xa lan ngak gaok glah Hamu Craok brei thau, rup anek asaih kan si ngak jang dut tui dom anek nesak karei kayua lac njauk brei mboh abih hu thaik dang, thaik nduac, rup bhap khang kadang min jeng njauk laman lamuac gheih ghang. Dua tangi, pak gah takai atau meta mong di anek athaih jeng njauk mong iek ka nyu tani tanat piah ngak jeng suan yava ka ndap nda anek saih.

Ong Phú Hữu Minh Thuần, akaok Hop tac xa ngak gaok glah lan am Cam Hamu Craok brei thau, jaik 5 thun mai tal ini, ngak gaok glah lan am Hamu Craok hu rilo urang duah mai blei, hu tukvak masa oh hu ndap nda kayua hatai caong khin tapa bruk pabak brei. Tuai damuai mai jirah rivang sirah palei ngak gaok glah lan am dak harei dak rilo, patui di nan daok hu lac ndap nda pablei tabiak jeng hu rilo jang, dalam tuk nan urang ngak oh hu rilo (tok 30 angaok 45 urang) nan ye anak tal jeng hu tal jalan duah jang urang ngak piah pabak bruk ngak tui vaktu, abih di nyu lac tukvak harei roya, harei Tet.

Ngan haong hatai caong khin meyaih khan, pacang khik ilamo Cam, abih di nyu lac ilamu ngak lan, ong Vạn Quan Phú Đoan (urang daok di palei Hamu Craok dak padang Hop tac xa Ngak tabiak, pablei salih saong jit vu lan Hamu Craok, pambuak pagam bruk ngak tabiak – rivang ma-in bhap bani.

Gam haong bruk ngak tabiak dom janih ngak gaok glah lan am my nghe, ong Đoan daok padang ngak gilac labik ngak gaok glah lan am tui yau meng kan di sa baoh sang ngak lan. Baoh sang gak, daning haluk gah dalam sang la-ar, ala tabung trai sang, dom amuk, dom sa-ai daok tapat haluk mbeik lan. Labik ngak lan Cam hu padang ngak gilac hu daong ka tuai damuai thau cambaih jang ka bruk ngak gaok glah lan am di labik ini.

Sa-ai Phạm Thị Thu Vân, mai meng ban Đà Nẵng brei thau, sa kadha hu khan veik meng thaik binguk min ba mai ka tuai damuai urang jirah mong iek biak chreih chai. Ini lac sa jalan ngak bo urang ngak gaok glah lan am palei Hamu Craok khik ramik, patagok yaom biak karei di bruk ngak lan saong janih biak karei di ilamo Cam.

"Drei thau rilo jang ka jalan ngak tabiak ndap nda yau habar. Meng nan adei mboh biak chreih chai saong ranam ndap nda ini jang. Adei hu mong iek veik dom thaik binguk hu padang ngak gilac ini, adei meda saneng hu tal rai diuk di urang Cam meng kan yau habar."

Patui nan, tuai damuai jirah hu dom urang ngak lan tacei pato tapat haluk gluh, ngak tabiak ndap nda lan am. Tuai damuai urang jirah dang tabiak ngak lan meng tangin di drei, mong iek duah thau hu ka ilamo Cam saong vaktu masa dak padang bruk ngak lan ba mai ka tuai damuai rilo sambai chreih.

Tui ong Vạn Quan Phú Đoan, Akaok Hop tac xa Ngak tabiak gaok glah lan am, pablei salih saong jit vu lan am palei Hamu Craok, yaom lac bahrau dak padang hu labaih 2 thun, min HTX jeng hu kham merat peih ngak bruk meyaih khan ndap nda nao tabiak negar langiu yau Idian saong dom taneh aia di chau A. Di puk palei, sa-ai Đoan peih ngak dom bruk ngak ilamo bhap bani di urang Cam piah duh ka tuai damuai mai rivang zirah...

Palei ngak lan Hamu Craok urak ini hu 2 hop tac xa, sa cong ty saong labaih 30 labik ngak tabiak pablei salih ngan haong jaik 300 baoh sang ngak lan. Tuk vak Tet Nguyen dan thun thak athaih 2026 nan lac tuk piah ka palei ngak meng kan ini meyaih khan tal tuai damuai dalam saong langiu negar dom janih ndap nda biak karrei di bhap bani Cam. Rilo ndap nda hu takre chreih saong palih ruah rilo yau bimon Cam, tanuak gom, bilaok kluak bingu… saong abih di nyu lac ndap nda lan am drei athaih.  

Urang pal akaok UBND xa Ninh Phuoc, tinh Khanh Hoa brei thau, urak ini, puk palei daok caik tabiak 4 ha taneh piah peih prong bruk ngak lan brei ka dom urang ngak saong pabak hatai caong khin blei pandar lan Hamu Craok. Gam haong nan, gah rivang ma-in jeng hu dak padang rilo tour, tuyen mai rivang sirah dom palei ngak, abih di nyu lac palei ngak lan Hamu Craok.

Nao tapa yaok rituh thun, bruk ngak lan di bhap bani Cam palei Hamu Craok, xa Ninh Phuoc, tinh Khanh Hoa jeng daok khik hu dom yaom ilamu akaok mereip. Thau hadom rai rah urang ngak ngan haong hatai saneng duah di drei daok bluh suan yava tame taneh saong khik apui ka bruk ngak ngak gaok glah lan am yau mukkei meng kan.  

Dom harei ini, dom labik ngak gaok glah lan am urang Cam tuk halei jeng bhong apui. Manuac urang gam gam dak talei tame tabiak, dom janih lan hu ngak salah blaoh hu ba tagok radaih nao trun dom tinh, ban. Thaik binguk nan brei mboh ka bruk cak rok patagok gilac biak khang kadang di palei ngak yao klak abih di Asia Tanggara Ndong Nam A.