Harak daok ngak brei ka dom janih dak kadha palih ruah anek saih saong ilamo pakat cao dang gah pato megru mam non uranaih di Mentri Pato Megru brei adat, anek saih brei hu tut angan rilo abih 10 caong tame dom danak dak pato pakai, dom sang bac karei gauk min brei ramik dom caong takre meng glaong trun biar. Dom danak dak pato pakai tok brei palih anek saih tut angan di dom caong takre hu meng 1 tal 3. Mentri Pato Megru brei mboh bruk salih ini piah khik kajap bruk samu gauk, tantu cambaih laih; khik kajap kein lagaih di urang hu mbaok palih ruah; paglaong asar siam akaok tame; patakik jien buh tabiak saong patak pataom brei ka bhap bini rahra…

Dang Anak kuhria bruk salih ini, rilo anek saih puac pakat bac hu mbaok tame kacah tamat bac saong palih ruah anek saih tame univesiti thun ini duh hatai, min jeng hu dom panuac njauk hatai. Adei Nguyễn Tấn Dũng, bac tal 12, Sang bac THPT Hàn Thuyên, tinh Bac Ninh brei thau:

"Kamuen kuhria tame dom gah ilamo ky thuat, kong nghe khau tin. Kuhria thun ini meyah Mentri Pato Megru tok brei mek 10 caong takre ye mboh takik, kamuan khin hu tut angan rilo sang bac jang, kayua caong di kamuan jeng glaong yau nan ye jeng daok huec daok kanda."

Meng thun 2017, adat dak palih ruah anek saih di Mentri Pato Megru brei adat ka anek saih tut angan dom caong takre saong dom sang bac jeng hu tuk hu mbaok tame palih ruah. Phan mem palih ruah di Mentri daong piah anek saih meda njauk palih ruah chreih takre tui danak hu caik dahlau. Bruk anek saih tut angan dom jeng hu ka caong takre ba tal taong abih caong takre palih ruah dalam sa bilan palih ruah biak praong. Kayua yau nan, bruk Mentri Pato Megru pok tagok brei patakik caong takre tut angan palih ruah di anek saih lac bruk mbuan si paham thau.

Min, tapi dom urang ilamo pato megru saong gru pato ndom mayai lac, bruk patakik caong takre tut angan palih ruah ngan haong anek saih lac oh ka biak lagaih, kayua di thun umo ini, dom adei jeng kan si thau bih ka prein bac di drei piah tut angan tame njauk sang bac, gah bac lagaih. Gru Trần Mạnh Tùng, ban ine Ha Noi ndom meyai lac:

"Patakik caong takre jeng brei mboh bruk kan kandah di gah ky thuat di Mentri Pato Megru. Dahlak hulin mboh lac, bruk nan jeng lac bruk caik dahlau, jeng brei mboh lac khol drei oh pasang iek hu ye khol drei kak kajap. Dalam jaman ilamo khoa hoc ky thuat lac hu njauk hu siam jang, brei ngak bruk peih tabiak ka anek saih ye maong tapa mboh lac ngak tui bruk ini ye Mentri ba tabiak bruk kan kandah tame amaik ame saong anek saih ye drei mboh bruk ini oh ka biak thau tanat ka dom adei anek saih."

Dom panuac karei jeng ndom mayai lac, dalam bruk majam dom labik pato pakai pakat university rabha tal, pakat dak harei dak tantu, bruk rilo dalam dom gah pasang iek palih ruah, bruk oh patakik caong takre daong ka anek saih khang hatai, tut angan caong takre dom jeng hu blaoh oh duh hatai huac ka laik druh univesiti. Kayua yau nan, Mentri brei maong iek veik, meda tagok tanut 15-20 caong takre piah anek saih hu kein lagaih njauk palih ruah rilo jang tame dom sang bac dai hoc./.