Dom harei ini, mai huyen bhum ceik Bác Aí, nao angaok dom jalan 705, 707 tui dom takei ceik meng xã Phước Trung tal dom xã Phước Chính, Phước Bình...mbuan taom gaok bhap bini daok kaoh mek asar pa-ok blait.

Bilan pa-ok blait thun ini, mikva paik suai jang thun dahlau jiak 2 bilan, tukvak phun pa-ok blait tabiak bingu gaok tuk langik pandiak khang, nan ye takik ndam baoh jang dut saong thun dahlau, min hu HTX Điều hữu cơ Truecoop blei yaom tani tanat, nan ye jien mek tame di mikva hu glaong tagok.

Sa-ai Pupu Thị Hạnh daok di palei Bạc Rây 2 khan lac: “Sang dahlak pala labaih 1.000 phun pa-ok blait di angaok 2,5 ha taneh tapen takai ceik. Dahlau diah, pala tui jalan klak, nan ye asar hu mneg 5 tal 6 tạ /ha/thun. Meng tuk hu HTX brei urang jakar ky thuat mai tacei pato jalan pala, iek glang phun pa-ok blait tui jalan hữu cơ, brei asar tagok jaik 7 tạ /ha/thun. HTX blei yaom meng 25.000 – 26.000 đồng sa kilo, jien mek tame tagok rilo.

Amuk Ngô Thị Cúc - Pho akok Jabat Ngak nong saong Patagok palei pala huyen Bác Aí brei thau: “Dalam huyen hu jaik 1.500 ha phun pa-ok blait, yaom lac oh njauk phun pala hu prein khang, min phun pa-ok blait daong ka mikva di dom xã bhum ceik hu jien mek tame ralo. Gam haong nan, phun pa-ok blait daok hu daong me-om hajao taneh klaak bilau, mbuan kalu, patagok bruk pala glai biak ralo”.  

Ninh Thuận hu labaih 5.000 ha phun pa-ok blait pala ala glai, dalam nan, HTX Điều hữu cơ TrueCoop hu pambuak bruk saong blei abih pandap ngan haong 1.800 baoh sang kuhria abih atih 3.980 ha, pala tui jalan hữu cơ, tui tanut chuan di Mỹ, Nhật Bản saong châu Âu.

Thun 2020, Hợp tác xã Ngak nong Jit vu tổng hợp Phước Chính, huyện Bác Ái peih bruk daong ka mikva paglong bruk brei rilo asar saong asar brah siam tapa jalan pambuak haong 30 baoh sang pala labaih 20 ha pajaih padai Đài Thơm 8 tui tanut chuan VietGAP. HTX daong pajaih padai birau, khak drak saong tacei pato jalan pala. Tukvak peih ngak, bruk nan oh lac daong brei rilo asar, asar brah siam bo daok lac ngak brei salih jalan sahaneng di bhap bini.

Tal urak ini, hu jaik 90 baoh sang tame, pala drak jaik 70ha sa vụ, ngak tabiak brah hacih pabah ka darak pasar  dom tỉnh labaih 50 tấn sa vụ, rik tame ngak jeng pandap karei di bhum palei,daong ka bhap bini paglong jien mek tame.

Bruk pambuak gauk, blei kaya nong hu daong ka urang nong pandar dom phun pala lagaih haong taneh riya bhum palei, tui nan peih tabiak jalan nao birau di huyen Bac Ai peih ngak brei patagok dom phun pala hu yaom kinh te glong, paglong jang bruk pala drak, daong ka bhap bini patrun kathaot khang kajap.

Yau ye HTX Ngak nong kong nghe glong Nam Miền Trung di palei Suối Đá, xã Phước Tiến duah jalan nao karei tapa padang ngak labik nong trại sang camin praong 2 ha, pambuak haong urang pala dưa lưới saong blei veik taong abih pandap ngak tabiak. Dom thun tapa, yaok thun pabak ka darak pasar  labaih 230 tấn dưa lưới baoh praong siam, jien mek tame meng 6 tal 7 tỷ đồng.

Bí thư Huyện ủy Bác Ái Mẫu Thái Phương brei thau: “Dalam huyen hu 14 HTX jit vu ngak nong daok ngak bruk haong 130 urang, abih tih phun jien lac labaih 20 tỷ đồng.  Bruk patagok dom bruk pambuak gauk ngak mbang pala drak pagam haong blei veik kaya nong hu daong paglong bruk ngak tabiak, kaya nong asar siam; pasiam bruk ngak tabiak daok sit sot, ba mbuan lagaih  pandar ilamo ky thuat  tame pala drak, ngak jeng bhum pala pandap tamo saong tani tanat  bruk pablei pandap ngak tabiak, hu ngak brei patagok  dalam bruk pala ngak kaya nong, gam daong ka urang ngak nong trun kathaot khang kajap bo daok rik tame biak praong dalam bruk padang ngak palei pala birau di bhum palei”./.