Kapul rajabol Lữ đoàn Vận tải 659, Cục Hậu cần Quân khu 9 brei 3 baoh kapal hu jamaraih njuk ia, pakuang padang ia tame bruk brei ia ka rahra bhap bini di labik thu lagu tua raya daok di xã Biển Bạch, huyện Thới Bình; xã Khánh Thuận, huyện U Minh dan haong xã Khánh Bình Đông, huyện Trần Văn Thời, tỉnh Cà Mau. Langiu daong ia hacih oh mek jien brei ka bhap bini, labaih 20 urang jaka, rajabol Quân khu 9 gam haong kapul rajabol, kapul di palei brei yaok rituh baoh pakuang, kan padang ia, ka urang kathaot, urang kan hu ndap nda padang ia piah pandar. Thượng tá Nguyễn Phú Khang, Akaok Chính ủy kapul Lữ đoàn Vận tải 659, Cục Hậu cần Quân khu 9 brei thau lac:

"Chip dalam malam, kapul Lữ đoàn Vận tải 659 kon kau sami samar jaga manuac urang, ndap nda, blei caga dom janih ndap nda brei padang ia piah subuh awal tagok jalan pajeng ia taba nao daong mikwa. Mayah bruk kurang ia daok hana daok susah, mikwa daok caong khin ye hu Po akaok Bộ Tư lệnh Quân khu, jaka, rajabol kapul Lữ đoàn Vận tải 659 tuk halei jeng caga ganap prein yawa paganap ndap nda, manuac urang tame bruk".

Tui Sở Ngak nong haong patagok bhum palei tỉnh Cà Mau, dalam tinh hu labaih 2.600 sang daok kurang ia saong oh caga hu ia taba piah pandar, dalam nan hu labaih 1.700 baoh sang biak kan taduan mek hu ia kayua oh hu ia bingun, kênh ribaong thu lagu, jalan nao gluh baok, oh lagaih.

Dalam nan mboh di xã Biển Bạch, huyện Thới Bình, dalau di Tết Akaok thun mbiah tal ini hu labaih 300 baoh sang kurang ia pandar, ralo abih hu palei Thanh Tùng haong palei 18. Tua raya biak khang, ia pandar biak susah biak kurang, ralo urang rah ra bhap bini oh daok ia pandar, njauk pandar ia mbak jeng ye bih jien ralo piah blei, salih ia meng di gilai kapal yaom abih meng 40.000 tal 50.000 đồng/m3. Kayua yau nan ye, bruk reing daong dom asar ia laan hacih saat di urang kapul rajabol Quân khu 9 biak drah samar, gam haong pakat ủy, karja palei daong khik karo raidiuk mikwa bhap bini.

Ong Trần Văn Tuấn, Akaok UBND xã Biển Bạch, huyện Thới Bình, tỉnh Cà Mau khan brei thau lac, hu Quân khu 9 caik hatai ieik glang sangka ba gilai kapal mek ia meng labik karei mai daong brei ka mik wa pandar dalam harei harei:

"Daong brei hu ka mikwa dalam bruk hu ia pandar, yang ka dua tra daong ka mikwa hu ia si manei si papah. Tal ini mikwa di palei khin hu kuria brei daong pakuang raya padang ia piah pandar di anak mata, daok brei ka atah dhua kon drei njauk brei kuhria padang ngak pakuang atau padang ngak pakuang dalam taneh piah padang ia pandar tuk thu lagu tua raya".

Hu taduan dom pakuang kan ia laan tuk kan daman hu urang rajabol ba mai tal sang, ralo mikwa oh pacang hu drut druai. Nai Nguyễn Thị Đậm, xã Biển Bạch, huyện Thới Bình, tỉnh Cà Mau brei thau lac, ia pandar di mikwa ralo abih mai meng ia hajan, tua raya thu lagu dui atah mikwa susah ia pandar. Langiu di nan, ia bingun oh pandar hu kayua mbak kayua njom lakhun. Nai Nguyễn Thị Đậm khan:

"Kurang ia bih blao 3 bilan paje, meng masa Tết mbiah tal ini, bruk ngak hrei hrei biak kan daman, ia blei mala ghe brei pandar di dalam sang. Biak uan tabuan, bui sambai, drut druai, oh thau ndom mayai yau habar ka abih. Dhar phol urang jaka rajabol jeng ye urang daong".

Langiu pajeng ia daong oh mek jien, dom urang rajabol kapul Lữ đoàn Vận tải 659, Cục Hậu cần Quân khu 9 daok gam haong karja palei prai yaih dom ilamu cara sangka rami ramik khik caga padang ia hacih, caga prein yawa sihat, caga alam, jeng ye ieik caga langik tasik oh karo yau ye jaman ini./.