Mai tal puk Tân Quới, xã Tân Lý Đông, huyện Châu Thành, tỉnh Tiền Giang – labik tamuh tabiak ruak kum A H7N9, kol dahlak mboh bruk ngak mbang, ngak huak, pablei salih jeng daok rahtabiak yau yaok harei. Abih di nyu nan lac di baoh sang ong Nguyễn Văn Tâm – lac sang pablei salih, sik ngak ralaow manuk ada daok di gah anak sang urang ruak Nguyễn Văn Đ, jeng hu mau manuk ada tapa dut iek mboh dương tính haong H5N1. Min, rahra pak ini jeng daok iek lap, oh cuk pataih pacang mbaok tuk taom gaok gauk. Dalam darak Tân Lý Đông bruk pablei salih ralaow manuk ada saong dom pandap ngak meng manuk ada biak sarau kadau, labik caik ralaow menuk ada pablei daok caik srau haong dom pandap panda karei. Dom menuac pablei salih saong urang mai blei jeng oh cuk pataik pacang mbaok piah khik caga.

Amuk Huỳnh Thị Mẫn, daok di puk Tân Quới, xã Tân Lý Đông, lac sang hu manuk ada njom ruak H5N1 brei thau, bahrau mahit lac hu urang ruak kum nan ye jeng haduh hatai min di pak ini mboh takik manuac cuk pataik pacang mbaok piah pacang jit ruak njom mbak:“Jit ruak bo oh hu thei cuk pataik pacang mbaok, mboh yau yaok harei, oh mboh thei huac hagait. Tabiak jalan ye hu tuk cuk hu tuk oh cuk. Urang ruak jeng lavik paje bo bahrau hu khan brei thau, jeng mboh huac”

Tui kanja palei, bruk pacang caga jit ruak urak ini biak kan kandah, kayua tukvak bo rahra njom ruak tal tuk thau lac njauk ruak kum A/H7N9 saong pathau khan tal puk palei lac jaik sa bilan, kayua yau nan ye, urang ruak hu nao biak rilo labik, taom gaok biak rilo menuac, bruk mbuan njom mbak ruak lac biak glaong. Ngan haong mau manuk ada di sang ong Nguyễn Văn Tâm tuk dut iek mboh dương tính kum A H5N1 ye sang ini hu pablei abih tapon manuk ada, nan ye bruk pacang caga ruak lac oh glaong. Langiu di nan, dom urang jakar ngak bruk pacang caga jit ruak lac biak takik; dalam nan tok hu sa urang jakar ngak gah thú y. Daok bruk pacang caga haong dua janih jit ruak gam sa tuk, ong Nguyễn Văn Sáu, Bí thư Đảng ủy xã Tân Lý Đông brei thau:“Đảng ủy hu pato tacei UBND xã, bilai y te xã ngak catang, pathau khan ka jit ruak hu rahtabiak. Y tế patagok bruk pasang iek dom baoh sang hu taom gaok, bhian dut iek nhiệt độ, mayah nhiet do biak glaong atau patuk pandiak ye bilai y te khik iek chip. Urak ini hu labaih 21 harei ka oh mboh hagait. Bruk kan nan lac ruak kayua Viện Pasteur  duah mboh, daok pak ini drei tok ngak bruk pathau khan min. Harei blaoh, drei hu mek mẫu dom manuk ada di pak ini, tok hu sa urang ruak H5N1 min. Dom harei ini tui iek dom menuac hu taom gaok urang ruak ka oh mboh hagait, tapon manuk ada njauk ruak jeng hu pablei abih paje oh daok”.

Urak ini hu oh takik rahra di huyện Châu Thành, tỉnh Tiền Giang daok randap raong, kareik manuk ada dalam sang daok, pablei manuk ada di labik hu rilo manuac… bruk mbuan njom mbak ruak kum manuk ada lac biak glaong, abih di nyu nan lac njom mbak tapa manuac. Dalam tuk nan, rilo urang pablei oh cuk pataik pacang mbaok, ndem lac cuk pataik kan suak yava lo:“Cuk pataik pacang mbaok ye lac kan suak yava, urak ini daok huac njom pambak hagait veik. Drei pablei hasit blaoh mai, pablei ka urang blei vil val ini sa harei dom drei min. Adei thau jit ruak paje, min cuk pataik lac kan suak yava lo”.

Anak bruk rahtabiak di jit kum manuk ada, Sở Ngak nong saong patagok palei pala tỉnh Tiền Giang hu harak ieu kakei UBND huyện Châu Thành samar drah peih bruk pacang caga jit ruak kum manuk ada; dalam nan paglaong bruk pruh jru pametai anek ruak; klauk jru vắc xin, tui iek bruk jit ruak, khik iek saong langyah catang dom urang pajeng ba, sik ngak ralaow, pablei salih manuk ada saong dom pandap ngak meng ralaow manuk ada oh njauk adat.

Tiền Giang hu bruk raong manuk ada cak rok patagok khang, tok taeng tapon manuk ada di tỉnh lac labaih 16 triệu drei. Kayua yau nan ye, bruk pacang caga jit kum manuk ada caong hu dom gah, dom pakat kanja saong rahra biak caik hatai sangka. Urang ruak kum A  H7N9 urak ini jeng daok hu taong ruak di Sang iek ruak Nhiệt Đới, TPHCM jeng lac bruk kakei tal yaok rahra ka bruk mbuan njom pambak ruak kum, ruak ini meng athur meda njom mbak tapa manuac, njauk samat drah pacang caga./.