Palei Pacam, ban sit Lạc Tánh, huyện Tánh Linh, tỉnh Bình Thuận hu 348 sang, jaik 1.500 menuac, lac labik daok meng kal mai di urang Cam. Mikva Cam daok pak ini rilo meng ngak hamu, pala padai, pa-ok blait saong cao su. Urak ini dalam Palei Cam hu labaih 200ha padai, 150ha cao su saong 150ha pa-ok blait.

  Dom thun dahlau, mikva Cam daok pak ini hu Mban Bangsa tỉnh daong pajaih pa-ok blait ba mai pala piah patagok bruk ngak mbang di sang. Min, tok hadei sa tukvak, kayua langik tasik oh lagaih, phun pa-ok blait oh daok ba mai kein laba kinh te, nan ye mikva salih tapa pala phun cao su. Dom thun camereip, cao su pala njauk, pablei hu yaom, mikva Cam pak ini hu jien mek tame glaong nan ye raidiuk ginup meda jang biak rilo. Yaom lac urak ini yaom cao su oh daok glaong yau dom thun dahlau min dom sang pala cao su jeng daok hu jien mek tame tani tanat meng phun pala ini kayua cao su brei tukvak mek katak suai dalam thun. Ong Đồng Sơn, Akaok mban bruk ngak mặt trận Palei Pacam, ban sit Lạc Tánh, huyện Tánh Linh, tỉnh Bình Thuận brei thau:

“Thun ini padai brah ye hu yaom dut haong thun dahlau, hu lagaih ka mikva. Ka dua ye tapa gah cao su, thun ini lac cao su yaom jang gap gap, anek kamuan, adei sa-ai, mikva jeng hu bruk ngak lagaih jang dut haong thun dahlau. Yaom gap yau bhian min bo hu jien mek tame. Padai brah ye yaom glaong dut saong thun blaoh, palei dalak maong yau hu lagaih, padang sang blaoh pasiam veik sang, mikva biak uan tabuan.”

   Ngan haong mikva Cam pak ini, phun padai lac phun pala rilo abih meng rilo thun ini mai. Dom thun dahlau daih, tuk yaom padai daok biar, jien buh tame glaong, bruk pala padai takik hu laba. Dua thun ini yaom padai dak harei dak tagok glaong jaik dua mbang dut haong dom thun dahlau, mikva pala padai thei jang chreih chrai kayua jien mek tame tani tanat jang. Sang ong Đồng Thanh hu 7 sao padai ia, ong biak uan tabuan kayua 2 thun jaik ini yaom padai jeng tagok glaong, daong ka sang ong hu jien mek tame tani tanat. Ong Đồng Thanh, halau janeng Palei Pacam, ban sit Lạc Tánh, huyện Tánh Linh lac:

“Dom sang jeng ngak padai, padai urak ini lac tame bilan yuak vu 2. Hamu jeng praong gap gap, daok dom taneh ini mbiah 5-6 sao min piah pala cao su. Pala cao su ye jien mek tame jeng tani tanat. Maong padai hu yaom yau ini mikva palei pala biak uan.”

  Oh lac tagok bruk pala ngak, mikva Cam pak ini daok patagok bruk raong limo kabao, blei jamraik mac moc ngak yit vu ngak nong, tuk halei jeng thau gul pataom patagok siam bruk pambuak gauk, daong gauk dalam raidiuk, ngak mbang, kham merat hu mbaok tame dom bruk ngak di palei. mBan khik ramik palei saong dom kapul, nyaom pambuak gauk jak ba mikva diukrai hu ilamo, gul pataom, ngak njauk tui jalan di Ndang, hukum di Karja, rik prein haong karja palei khik ramik an ninh siam mekre, khik kajap palei pala “hijao – hacih – mekre”, daong khik kajap dom asal kadha palei pala bahrau, ndo thi ilamo. Palei Cam urak ini daok salih bahrau yaok harei, jaik abih dom jalan dalam palei hu tuh bê tông praong gheih, hacih sa-at, sang danaok jeng hu padang ngak khang kajap, raidiuk hu glaong tagok jang. Ong Đồng Sơn, Akaok mban ngak bruk mặt trận Palei Pacam, ban sit Lạc Tánh, huyện Tánh Linh daok brei thau lac:

“Dom thun ini hu ky thuat, hu pato pakai, rilo kapul mai pato gah phun pala athur raong pandar tui ky thuat. Pajaih bahrau, ky thuat bahrau mikva ngak biak tani tanat. Sa thun pak ini lac 3 vu, tui yaok labik hamu, labik Amuk Chiem ini ngak tal Tet urang padeih, labik Amuk Taha lac ngak 3 vu. Yuak hu meng kuhria rah tapa lac 600-700kg sa sao. Dalam palei negar jalan mbak biak tani tanat,jalan menyek, jalan betong, oh daok jalan haluk veik tra.”

  Mai palei Pacam, ban sit Lạc Tánh harei ini, thei jeng mboh tatuak drei ka dom salih bahrau dalam raidiuk di mikva Cam. Dom bein cao su praong, dom mblang hamu hijao, dom baoh sang hu padang praong dak harei dak tamuh tagok rilo, anek kamuan hu nao tal sang bac, hu bac ta-a tal labik tal dhua, palei Cam kathaot harei halei urak ini hu trei sir, ginup jang, jeng sa dalam dom palei cakrok patagok di ban sit Lạc Tánh./.