Châu Thành lac sa dalam dom labik hu rilo urang Khmer daok di tỉnh Sóc Trăng. Tukvak tapa, dom pakat ủy đảng, karja saong kapul nyaom kham merat ngak siam dom sarak di Đảng saong karja brei ka urang Khmer, yau ye daong ngak sang daok, daong phun jien ngak mbang, salih bruk ngak, pato bruk ngak, tacei labik ngak bruk, daong ilamu ngak mbang…

Sa-ai Danh Giang, daok di palei Phú Ninh, xã An Ninh lac sa dalam dom urang Khmer ngak nong naih joi. Meng sang kathaot, diuk pasang sa-ai kham merat yam tagok tabiak truh kan kathaot meng pala rilo janih njam patam pambuak haong raong lamo di mangaok taneh praong jaik 1 hecta, mek hu jien tame dom ratuh triệu đồng sa thun. Dahlau di tuk ngak bruk nan, sa-ai Giang hu gah ngak nong tacei pato ilamu, hu daong jien ngak sang halam saong jalan nding pruh ia automatic. Urak ini, sa-ai caik tabiak jaik 2.000 m2 taneh piah ngak sang halam pala njam hacih; jaik 4.000 m2 taneh sa-ai pala phun mbang baoh, taneh daok veik sa-ai pala hareik saong padang var ro raong lamo ralow.

Daok ong Liên Phol lac sang kan kandah dalam xã ye biak uan tabuan tuk hu palei pilih ruah daong padang ngak sang bahrau tui danak dak bruk ngak negar. Ong khan lac, dom anek jeng nao ngak mbang atah di Bình Dương, tết ini sang ong hu baoh sang bahrau piah daok tuk dom anek mai ravang palei:“Karja daong ka anek dahlak, dahlak uan tabuan lo, uan ka anek hu sang daok siam mekre, dahlak oh hu hagait piah daong anek, urak ini hu karja daong, dahlak biak thau dhar phor”.

Thau hu yaom glaong di jalan mbak palei pala, dom thun tapa, huyện Châu Thành hu rilo jalan ngak, rilo sarak jhul samar bruk padang ngak jalan mbak palei pala dak harei dak siam mekre, ngak brei mbaok meta puk palei dak harei dak hadah hadai. Dom jalan gluh baoh bhum atah bayah dahlau daih, urak ini hu salih meng jalan bê tông, jalan nhựa pambuak pagam dom puk, palei, dom xã, lagaih ka bruk nao mai, pajeng ba, pablei salih pandap panda. Ong Lâm Hiệp, sa dalam dom urang praong thun ngak padai lavik thun di xã Phú Tân tacei tangin nao gah jalan huyện bahrau padang ngak salah, hu tuh nhựa jangaih mekre, khan lac: “Dahlak mboh mikva daok pak ini bui sambai lo, hu gam mikva meng huyện Kế Sách jeng nao tui jalan ini piah tal Sóc Trăng atau nao ngak bruk di labik ngak kong gah daih. Yaok harei dahlak daok pak ini mboh biak chreih chrai, mikva nao mai biak rilo. Dua gah hu kraong saong hu mblang hamu. Tal bilan yuak padai, jalan ini mboh bruk salih karei biak cambaih laih.”

Bruk tacei pato peih ngak siam 3 Danak dak bruk ngak negar ka palei pala bahrau, patrun kathaot saong cakrok kinh tế, xã hội bhum urang bangsa takik di tỉnh hu daong ka phum sóc urang Khmer oh padeih salih bahrau mbaok mata. Ong Trương Quốc Điền, akaok UBND huyện Châu Thành brei thau, peih ngak danak dak bruk ngak negar cakrok kinh tế xã hội bhum urang bangsa takik tukvak 2021-2025, huyen hu ba tabiak ngak rilo danak dak sit, praong, samar daong tal tangin mikva urang bangsa takik piah mikva samar hu jalan lagaih cakrok bruk ngak mbang, rilo bruk ngak mbang duah jien, daong taneh daok, sang daok… Tal tukvak ini, bruk peih phun jien hu ginup abih tui bruk hu jao brei, daong dom sang kathaot urang bangsa takik dalam huyện trun khang. Huyện kham merat tal jhung thun ini, dom sang kathaot trun daok mala 4%. “Piah ka dom baoh sang kathaot trun hu mala 4%, meng akaok thun ini, huyện hu ba tangin tame padang saong peih ngak dom tanut ka huyện palei pala bahrau. Huyện Châu Thành jeng hu padang rilo jalan ngak, patabiak rilo harak tacei pato pataom tame ngak, abih di nyu lac peih ngak siam di abih danak dak bruk ngak negar cakrok kinh tế-xã hội bhum urang bangsa takik. Ini lac sa dalam dom prein khang biak praong piah buh tame daong ka mikva urang banhsa takik, jeng yau padang ngak jalan mbak palei pala.”

Dom danak dak bruk ngak negar, sarak bangsa daok peih tabiak sa raidiuk trei sir, ginup meda ka urang Khmer tỉnh Sóc Trăng jeng yau ka huyện Châu Thành,  phum sóc jeng meng nan salih bahrau maok meta tapa yaok harei./.