Kayua kathaot, yau nan ye diuk pasang sa-ai Sơn Cường saong sa-ai kumei Sơn Thị Hạnh haong dua anek sit daok di palei Hội Trung, ban sit Lịch Hội Thượng, huyen Trần Đề daok dalam baoh sang oh daok khang kajap, taik tahak meng rilo thun mai blaoh oh hu jien piah padang ngak bahrau. Dom duh hatai dalau oh daok tuk baoh sang di drei hu tak ton, daneing hu ngak kajap khang saong mblang dalam sang hu dak meng kiak men hacih sa-at, hu 45m² hu padang salah blaoh meng labaih 1 bilan. Iek sang bahrau, sa-ai Sơn Cường biak uan tabuan, chreih chrai, kayua njauk hatai caong takre meng lawik mai di baoh sang drei, di sa-ai, hu sang danaok jeng daong ka sa-ai sahanang hatai ngak mbang, sangka duah jien brei ka sang danaok di drei.

"Hu sang bahrau drei jeng takik daok duh hatai kayua dahlau daih sang drei daok taik tahak jaik abih, hajan angin rabuk mai diuk anek oh ndih daok hu. Urak ini takik duh hatai jang, biak bui sambai, urak ini brei khik ka hu rilo prein yava piah ngak mbang sangka ka baoh sang".

Dalam tukvak masa 2021 - 2024, Soc Trang hu jak ba daong padang 5.248 baoh sang danaok ka mikva kathaot, kan kandah brei ka sang danaok daok, hu gam haong taong abih jien labaih 280 ty dong. Daok bruk ngak danak dak pakat negar patagok kinh te – xa hoi bhum mikva bangsa takik saong bhum ceik, tinh hu daong sang daok ka 2.670 baoh sang. Oh lac sa janih tok padang sang piah ka mikva pacang pandiak, pacang hajan, ini daok ieu lac sa bruk daong prein piah ka mikva urang kan kathaot hu patagok bruk ngak mbang, tani tanat dalam raidiuk.

Ong Liễu Minh Giàu, Phaok Akaok UB Bhap bini ban sit Lịch Hội Thượng, huyen Trần Đề, brei thau bruk daong sang danaok daok brei ka dom urang kan kathaot hu karja bhum palei sangka. Cambaih laih lac dalam 3 thun tapa, ban sit Lịch Hội Thượng hu padang saong daong brei ka labaih 50 baoh sang ka dom urang kathaot haong jaik kathaot.

 "Meng phun jien di dom mat tran nagar, dom baoh sang jum pataom hu padang piah daong mikva, hu 15 baoh sang hu padang dalam 3 thun ini mai, samu haong yaok thun padang 5 baoh sang, hu jao ka mikva panduan tame daok, tapa di nan jeng daong ka mikva sahanang hatai piah patagok bruk ngak mbang dalam sang".

Bahrau ini, urang dang akaok Tinh uy Soc Trang pandar dom pakat uy, kapul ndang, karja, Mat tran Negar, dom kapul chinh tri – xa hoi pataom tame samar drah bruk peih ngak catang, samu gauk, siam lagaih dom pato tacei ka bruk jhul samar drah bruk brei oh daok sang taik tahak dalam taneh ia.

Kuhria dalam tinh Soc Trang hu daong bruk brei oh daok sang taik tahak ka labaih 7.000 baoh sang. Urang dang akaok Tinh uy Soc Trang pato tacei ka dom bhum palei brei samar drah padang jalan ngak cambaih laih, pato tacei saong jak ba rilo abih dom gah rik daong piah ngak bruk brei oh daok sang taik tahak di dalam tinh, khik karo kajap bruk ngak samu dil tukvak masa brei tabiak, njauk jalan ngak, siam lagaih, saong plaih bruk mbang jien, ngak palai jien atau dom bruk jhak karei. Bi thu Tinh uy Soc Trang Lâm Văn Mẫn ndom meyai lac:

"Thun 2025 brei ngak salah blaoh bruk brei oh daok baoh sang taik tahak di 3 danak dak. Ka sa ieu lac daong sang danaok daok ka urang hu ba prein yawa ka cach mang, ka dua ieu lac daong sang daok ka urang tui dom danak dak sarak karja negar, ka klau lac brei oh daok sang taik tahak ka rahra langiu di 2 kapul daong nan. Bruk ini ye taong abih pakat politik chinh tri ba gauk ngak haong hatai kham merat, ngak catang yau sa bruk mesruh metiak".

Tinh Soc Trang daok pato tacei pataom tame bruk peih ngak siam lagaih Danak dak pakacah “Ba gauk ngak bruk brei oh daok sang taik tahak dalam taneh ia tal thun 2025”, kham merat tal puac bilan 9 thun 2025, brei salah blaoh jalan ngak brei oh daok sang taik tahak dalam tinh piah salam uan Nyaom roya dom urang lambaok Ndang pakat tinh Soc Trang mbang ka XV, masa 2025 - 2030./.