Dalam 30 lô baoh durian di Viet Nam hu pablei tabiak negar langiu njom kandong kim loại trak cadimi glong jang tanut brei adat di gah pandap mbang salamat njauk Trung Quoc  bayar mai veik ye hu 4 D.N  di tỉnh Tiền Giang. Dom jabat chuyen mon di tỉnh  hu ngak bruk hoang 4 D.N ini, duah thau asal di baoh durian hu blei meng halei, duk iek ia, taneh di labik pala piah pasang iek, langyah. Hadei di tuk thau hu bruk nan, dom po bein pala durian di Tiền Giang biak haduh hatai. Ong Dương Văn Đây, po di 2,7 ha bein phun durian di xã Ngũ Hiệp, huyện Cai Lậy khan lac: “Ngan haong urang pala caong khin hu baoh siam ye plaik pandar dom janih jru oh hu brei adat, meyah pandar ban glai ban glo ye jru daok kandong dalam baoh. Ngan haong urang ngak nong hu tuk blei jru oh thau meng halei mai pruh meda ba mai khat lahik ka drei”.

Anak meta brei mboh lac, jaik abih dom D.N tuk blei baoh durian di po bein mai pataom tame gilang jeng brei njuk tame dom janih jru oh thau meng halei mai piah pacang halak, bimao saong ngak brei baoh durian tathak sumu gauk. Rilo menuac huac lac bruk ngak nan nyu jhak tal baoh durian tuk ba nao pablei di negar langiu. Ong Trương Thành Vinh, po sa doanh nghiệp bhian blei baoh kayau di  huyện Châu Thành bhian hu mboh bruk po gilang njuk ia jru, brei thau:“Taong abih dom labik blei durian pablei tabiak negar langiu jeng hu pandar jru nan, kayua labik tame paok blei di bein baoh praong sit, tathak kanjik katam oh sumu gauk…nan ye brei ba dom janih jru tame piah ngak brei tathak sumu gauk, pacang bimao. Hu dom baoh durian samo mau hijao atau mau katam nan ye brei ngak ka nyu tabiak sa mau yau gauk piah pablei tabiak negar langiu brei tram jru. Jru bo urang pandar lac meng negar langiu”.

Tui Vien phun mbang baoh Miền Nam, durian jeng yau dom janih baoh kayau karei brei hacih sa-at pandap mbang meng hu pablei tabiak. Caong khin ngak hu bruk nan brei salih jalan pala, pandar ilamo ky thuat  dalam pala, ngak. Daok bruk khik piah hadei di tuk paik baoh brei ngak njauk tui quy trinh di nyu, oh brei pandar jru hoa hoc, abih di nyu lac njuk baoh durian tame jru oh thau cambaic laic meng halei mai.  

Dalam tinh Tiền Giang hu jaik 22.000 ha bein pala sa janih phun durian, tal urak ini, hu 115 bein durian hu brei ma so bhum pala, 66 labik blei hu brei ma so labik tame paok. Tukvak tapa, gah  chuc nang oh ka mboh labik halei ngak suan bruk pala, ngak, pablei salih baoh durian. Nan ye,  bruk hu 4 D.N di tỉnh Tiền Giang hu asar kim loại trak yau ye panuac ieu kakei dahlau piah po bein, doanh nghiep brei ramik pasiam veik bruk nan. Ong Võ Văn Men, Chi Cuc pala drak – khik caga phun pala tỉnh Tiền Giang brei thau: ngan haong dom D.N dahlau di tuk ba durian pablei ka negar langiu brei dut iek samar dahlau, mek hu asar siam meng ba pablei. Daok gah chuc nang jeng brei langyah catang dom bruk ngak suan:“Bruk suai lavik Chi cuc brei pambuak haong karja palei pato pasram ka mikva ngak tui sa quy trinh pala, ngak; ka dua lac tuk pandar khak, jru khik caga phun pala ye brei hu tukvak padeih ka yaok janih khak, jru. Daok labik tame paok baoh durian ye kakei brei blei di dom labik pala hu brei ma so bhum pala. Urak ini, bruk njuk jru (baoh durian) lac ethophone hu dom taneh ia brei pandar. Bruk nan Chi cuc meda pambuak bruk dut iek”.

Durian lac janih baoh kayau dang akok di tỉnh Tiền Giang ka taneh pala saong kein laba gah kinh te. Kayua yau nan ye, bruk paglong asar siam, brei rilo baoh durian, lac bruk njauk caik hatai sangka di rilo gah, dalam nan po bein pala saong D.N pablei salih janih kaya nong ini brei ngak dahlau dalam bruk khik  angan je ka baoh durian piah ba gauk ngak kaya meda./.