Oh hu taneh ngak mbang, pala drak, yaok piluh thun tapa, saai Nguyễn Thị Liên, daok di xã Bình giã, huyện Châu Đức jeng oh tabiak truh kan kathaot. Hu karja palei jak ba, meng thun 2019 saai meng hu mbaok tame bruk raong pabe. Meng 4 drei pabe pajaih hu daong tuk camriep, tapon pabe urak ini tagok hu jaik 50 drei. Saai Liên jeng hu masaiy 30 triệu đồng meng Gilang paraik sarak kanja piah buh tame ngak var ro, peih praong bruk raong glang. Tui saai Liên, meng yaom jien mek tame labaih 100 triệu đồng yaok thun meng bruk raong pabe hu daong ka sang saai tabiak truh kan kathaot, anek bhik hu nao mbang bac siam mekre: “Kein lagaih biak glaong, raong ye pabe manek blaoh lavang ye pablei, dahlak mboh raong biak hu laba. Anak tal, drei jeng caong peih praong bruk raong veik piah patagok jien mek tame ka sang, piah raong anek nao mbang bac hu tal labik tal dhua”.

Daok saai Nguyễn Văn Hiểu daok di ban sit Phú Mỹ khan lac, hu karja palei daong phun jien, urak ini bruk pala njam patam di sang daok hu siam lagaih saong hu labik pablei tani tanat. Dahlau deih, saai Hiểu tok pala njam di mblang taneh sit sot, jien mek tame oh glaong. Thun 2022, hadei di tuk hu daong phun jien meng danak dak bruk ngak negar ka patrun kan kathaot, gam haong phun jien dalam sang, saai khang hatai pah mblang taneh, peih praong  1ha pala njam mbang hala. 

Meng hu pato pasram ilamo, bruk ngak di sang saai Hiểu dak harei dak tagok. Tal urak ini, yaok bilan, bein pala njam mbang hala di saai mek hu labaih 30 triệu đồng saong ba bruk ngak yaok harei ka dua urang ngak dalam palei: “Dahlau deih sang dahlak biak rambah, meng harei hu kanja daong phun jien piah pala drak, peih praong bruk ngak ye urak ini, sang dahlak hu trun kan kathaot 80-90%.  Tal puac thun kham marat trun abih tih saong tabiak truh kan kathaot.”

Meng thun 2021 tal urak ini, tỉnh Bà Rịa – Vũng Tàu hu peih ngak jaik 10 bruk patrun kan kathaot, ngan haong labaih 320 baoh sang kan kathaot hu mbaok tame. Tapa bruk peih ngak danak dak hu jaik 3.000 urang hu pato pasram ilamo ka cak rok patagok bruk ngak mbang, pala drak, bac dom ilamo bahrau gah ilamu - kỹ thuật, ilamo pacang caga ruak kik, sangka iek glang tapon athur raong, phun pala. Taphia di nan, Mặt trận negar dom pakat dalam tỉnh jeng hu peih jaik 190 bruk ngak patrun kan kathaot, daong phun jien, phun pala, anek pajaih, pandap ngak ka jaik 500 baoh sang ngan haong phun jien abih tih lac jaik 5,3 tỷ đồng. 

Tui UBND huyện Châu Đức, bruk raong pabe daok tagok hu siam lagaih, meng dua baoh sang raong tuk camriep, urak ini dalam huyen hu yaok ratuh baoh sang raong labaih 80.000 drei, saong hu peih praong tabiak taong abih 16 xã, ban sit. Bruk pandar ilamo dalam raong glang jeng hu dom baoh sang iek praong, daong paglaong năng suất, chất lượng, daong patagok jien mek tame.

Ong Nguyễn Tấn Bản, Akaok UBND huyện Châu Đức brei thau, bruk jao pabe pajaih bo oh hu ilamo ye bruk ngak ini oh jak jeng, nan ye, huyen bhian peih dom tal pato pasram ilamo raong glang ka mikva: “Jao bruk ngak ka gah ngak nong pambuak haong Kapul urang ngak nong salih ilamo raong pabe, sangka iek glang pabe, daong ka tapon pabe praong siam, ba mai laba glaong. Njauk tui iek yaok harei hatai kham marat di sang kan kathaot, kayua tok jao pabe pajaih, jalan ngak mbang ka sang kan kathaot, min oh pato tacei, ba jalan, dui pachreih dom baoh sang kan kathaot ye meda lac bruk patrun kan kathaot ka oh hu siam lagaih”.

Meng ini tal thun 2025, kuhria rah tapa yaok thun Bà Rịa – Vũng Tàu meda buh tabiak labaih 3 tỷ đồng piah peih praong bruk patrun kan kathaot. Tỉnh daok brei peih ngak rilo jalan langyah haong gauk piah daong ka dom baoh sang kan kathaot. Dalam nan, pambak praong bruk patrun kan kathaot lagaih lac sa dalam dom jalan ngak praong piah daong ka dom baoh tabiak truh kan kathaot khang kajap saong plaih hu bruk kathaot veik. Bruk pambak praong patrun kan kathaot di Bà Rịa – Vũng Tàu hu rik daong ka dom baoh sang kan kathaot khang kajap, patakik bruk kan kathaot gilac veik. Danak dak hu ba kein lagaih piah ka dom baoh sang kan kathaot caga dahlau dalam bruk ngak mbang, pala drak angaok mblang taneh di drei, oh pagam pambak tame dom sarak daong di Kanja./.