Meng Ban Quy Nhơn (Binh Dinh) tame TP.HCM bac megru, Lê Khánh Quỳnh, saih bac thun 4 sang bac Đại học Khoa học – Xã hội saong Nhân văn (Đại học Negar TPHCM) brei thau, asal kadha harak ve radaih Tet tuk halei jeng ieu lac sa bruk duh hatai di drei saong adei sa-ai, jeng daok ngak bruk di TPHCM. Yaok mbang jaik tal Tet, abih urang dalam baoh sang lac ramik tukvak piah blei harak ve radaih apui, harak ve radaih samar drah. Kayua, meyah blei suai ye oh hu harak ve saong yaom di nyu bhian tagok glaong:

“Meyah drei blei harak ve radaih suai, mbuan ka abih harak ve. Tuk nao sang ye rilo urang nao sa mbang, radaih bhian ganik katian kayua rilo urang jeng khin nao sang. Yau nan ye harak ve Tet bhian tagok yaom meng 2-3 mbang dut haong harei biasa bhian bhian karei. Kayua tuk nan hatai caong glaong tagok, meyah po radaih tagok yaom ye drei jeng njauk hatai tui. Yaom lac yaom jien gam tagok bo gam gaok bruk oh blei hu harak ve”.

Ini lac bruk thei jeng gaok di saih bai univesiti, urang ngak daok di bhum Kreh, Tay Nguyen… daok ngak bruk di TP.HCM. Dom harei jaik si Tet, yaok chruh radaih di dom po radaih nduac jalan tabiak nao bhum Kreh, Tay Nguyen tok brei nduac takik abih 2 lac 2 mbang harei kayua jalan nduac atah, dalam tuk tuai blei harak tagok rilo samar drah.

Di Mblang Radaih mien Đông klak (quan Bình Thạnh), rahra mai blei harak radaih piah nao sang mbang Tet Nguyen dan biak samar drah. Sa-ai Nguyễn Thị Hà blei hu harak ve nao sang di Dak Lak brei thau:

“Yaom harak ve jeng tagok dut haong harei bhian karei, min blei harak ve radaih ye oh hu kan. Kayua urak ini oh ka tal Tet saka ia harei bo rilo urang blei harak ve ka Tet Nguyen dan paje. Thun ini po radaih brei blei harak ve samar drah nan rilo urang ramik tukvak blei harak ve samar drah piah plaih bruk duh hatai. Blei harak ve suai ye yaom glaong jang dut haong urak ini. Bhian dahlak nao sang yaom mbhiah 250.000 dong, Tet ye tagok labaih 350.000 - 400.000 dong”.

Tui rilo po gah radaih, tal ini harak ve pablei tabiak dalam harei Tet saka ia harei oh ka glaong min harak ve Tet Nguyen dan rilo meng lac di dom harei meng 23 - 27 bilan 12 hu tuai blei dahlau. Sa-ai Cường, po radaih Thanh Thủy nduac jalan Krông Nô (Dak Nong) nao TP.HCM brei thau, urang blei harak ve harei raya Tet Nguyen dan mek hu 50% dom tuai damuai dut haong dom thun dahlau.

“Yaom harak ve tagok 60% dut haong harei bhian saong patui harei bo tagok meng 20 – 60%, brei tagok yaom piah gac akaok, piah paklah tuai di mala ini. Harei Noel gah po radaih biak rilo min Tet saka ia harei oh ka mboh thei blei harak ve. Tet Nguyen dan ye bruk blei harak ve 50%; urang blei dahlau sa bilan.”

Ong Bùi Hoà An, Phaok Yam ndok So Jalan mbak Pajeng ba TPHCM ndom mayai lac, Ban raya brei pabak ginup radaih piah duh ka hatai caong khin di rahra ka harei Tet Nguyen dan. So Jalan mbak Pajeng ba Ban raya meda duh ka jaik 164.000 labik haong 4.800 radaih daok nduac; dom mblang radaih di ban raya meda taduan labaih 20.000 radaih yaok harei. Kayua nan haong bruk kuhria labaih 90.000 mbang tuai damuai nao mai dalam tuk tabung glaong, Ban raya khik kajap prein duh hatai caong khin di rahra. Ong Bùi Hòa An brei thau:

 “Urak ini So Jalan mbak Pajeng ba brei padang saong peih jalan ngak bruk duh siam ka hatai caong nao mai di rahra, khik kajap bruk salamat jalan mbak dalam harei Tet Nguyen dan saong harei roya bal pataih Ula Lanaih puac thun 2024 haong bruk khik kajap jalan mbak hu salamat, oh klaih klaoh, pabak ginup hatai caong nao mai, siam mekre ka bruk pajeng tuai damuai. Kayua nan kol dahlak ndom lac oh kurang radaih.”

Lambaok dom mblang radaih praong dalam bhum jeng hu ndom mayai, haong kuhria ka dom tuai damuai haong prein ngak di dom mblang radaih, khik kajap bruk duh ka hatai caong di rahra. Ngan haong bruk srap gap tani tanat, gah jalan mbak pajeng ba ban raya HCM ndom lac oh luai ka thei oh nao sang mbang Tet hu kayua oh hu harak ndik radaih./.