Dang anak khau tin harei 30/4, 1/5 hu brei padeih 5 harei, diuk pasang saai Nguyễn Thị Kim Thanh, daok di Quận 8, B. HCM tut hatai brei salih labih jirah main dan haong dak tour Đô Thành – Cửu Trại Câu atau Ban raya Thượng Hải – Bắc Kinh (nagar Cina) brei ka abih gauk dalam sang. Saai Thanh khan brei thau lac, tuk camareip sang saai lac khin rup eing nao jirah main tasik jaik Ban raya HCM yau ye: Naik Mũi Né - Phan Thiết atau tasik Ban Nha Trang piah dauk pandiak dalam bilan bhang, kayua saneng lac masa padeih panak harei. Ini lac dui atah harei padeih, saai Nguyễn Thị Kim Thanh lac nao jirah main langiu nagar mboh lagaih jeng ye abih tukik jang yaom jien jirah dalam nagar:
“Dahlak khin si nao main jirah tui tour Cửu Trại Câu atau Thượng Hải - Bắc Kinh (Cina). Dahlak pilih nao main jirah langiu nagar kayua lac yaom jien harak tikait kapal haok dalam nagar glaong jang dut tui yaom harak nao main langiu nagar. Daok jirah main dalam nagar, akau nao main dalam masa panak tukik harei, tuk nao drei khin halei jang hu. Drei mboh yaom kaom jien tikait jirah main dalam nagar sahsah di dom nagar dalam Đông Nam Á”.
Ông Phạm Anh Vũ, akaok Kongty Dawah jrah Việt brei thau, meng hadei jit Covid-19 jalan jirah main nao langiu nagar di urang Việt cambac lac. Mbuan sanang si mboh di abih, dalam labaih 1.000 tuai damuai dak tour khik kakai di Harei raya jirah main B.HCM barau peih 4, hu labaih 70% tuai damuai jirah main pilih tour nao main langiu nagar. Tui ông Vũ, yaom tour nao main jirah tal dom nagar jaik taphia bhian dreih yau dom tour dalam nagar, min tapi tour langiu nagar chreih sambai kein bingi jang:
“Meng B.HCM nao Ban ine Hà Nội yaom tikait kapal haok bih 8 triệu đồng blaoh. Daok nao Taiwan haong masa yau gauk abih jien yaom 11 triệu jien đồng. Yau nan ye mboh labaih 70% urang nao jirah main tour langiu nagar. Ralo di nyu mboh nao Châu Âu, hadei di nan nao Japan, Korea, Taiwan jeng mboh ralo urang jirah Việt Nam”.
Wakil lambaok urang ngak mbang blei salih gah jirah main brei thau lac, dalam tuk dom kompani jalan kapal haok kaoh pakurang kapal par, patakik jalan par, urang main oh hu ralo jalan pilih par piah daong ba urang nap main jirah. Langiu di nan, bruk dom kapul jirah main dak tikait tui kapulan (hu yaom lap bingi jang tikait bhian biasa) jeng hana susah hasit. Dalam tuk mboh kan daman brei ka gah jirah main di dalam nagar, ông Nguyễn Minh Mẫn, Akaok jabat Dakwah - Marketing TST Tourist brei thau lac, labik ini daok padang dom janih ndapnda tour panak patut jang. Gam tui di nan, uak mbeik dom labik nao rivang jirah dalam danak dak yau habar ka lagaih tui hatai, tui yaom jien padai di urang jirah main:
“Kon dahalak hulin daok duah dom labik pambuak bruk, jeng ye pambuak tangin haong dom sang mbang huak restoran, sang daok padei hotel. Dalam dom bruk padang ngak dom ndap nda brei ka urang jirah main kon akau daok pambuak dom janih radaih kapal nao mai haong gauk yau ye: radaih jalan kakai, jalan raya, jalan pasei (radaih apui) pambuak haong jalan kapal haok. Njauk oh kalak jalan kapal haok min tapi ngak yau habar brei palagaih tui tuk wak masa urang jirah main salih tui abih biak ralo masa di angaok jalan”.
Rija, raya, tết ieu lac tuk wak masa ameh pariak brei ka pachreih jirah main, pachreih pasiam ekonomi. Min tapi, yaom jien tikait harak kapal haok dalam nagar “ndik kanyan” dalam tukwak masa ini, yau ye paga pacang khang, ngak ka jirah nao main dalam nagar oh lagaih. Urang bhap bini drei ye nao main jirah langiu nagar, daok gah jirah nagar daok kham marat pachreih njuk tuai damuai langiu nagar mai riwang main jirah./.
Viết bình luận