Ong Châu Quầy daok pak palei Bỉnh Nghĩa, (xã Bắc Sơn, huyện Thuận Bắc, tỉnh Ninh Thuận  kham merat yam tapa kan kandah ngak kaya meda angaok mblang taneh palei drei. Ong lac, khin tabiak truh kathaot saong yam tagok ngak meda khang kajap, brei kham merat, brei thau kuhri kuhria, khang hatai ba ilamu kỹ thuật tame bruk ngak mbang pala drak, paglaong năng suất phun pala, anek athur raong, duah tabiak jalan ngak mbang bahrau hu kein laba.

Sang ong Châu Quầy pambuak pagam haong bruk raong glang anek athur meng ralo thun ini mai. Urak ini, sang ong raong 120 drei pabo, 20 drei limo saong 70 drei pabe. Yaok 2 thun 3 mbang, yaok mbang pabe saong pabo menek meng 1 tal 2 drei. Ong pablei drei tano, khik veik drei binai piah menek, gam mek jien tame gam khik hu tapol athur.

Piah khik hu pandap mbang tani tanat ka tapol athur raong, abih di nyu nan lac dalam bilan pandiak bhang, sang ong caik sa binah mblang taneh pala drak piah pala dom janih hareik brei ka athur mbang. Meng iek glang siam nan ye dalam bilan bhang pandiak min mblang hareik jeng tamuh siam, yuak hu yaok harei. Mai meng nan, tapol athur raong jaik 200 drei dom janih tuk harei jeng praong siam, chất lượng drei pajaih siam jang, tagok kilo, khik hu tani tanat tapol athur tapa dom thun.

Langiu di bruk raong glang, ong Châu Quầy daok ngak 4ha padai aia, khik hu ginup aia tui meng kênh Bắc saong binek Sông Trâu, 1ha hareik saong njam patam saong ngak dịch vụ li-ua taneh ka mikva urang nong dalam palei. Kayua thau pandar ilamu khoa học-kỹ thuật tame bruk pala drak, chất lượng phun pala khik hu tani tanat, dalam nan padai mek hu 6 tấn meteh yaok ha sa vụ. Kuhria taong abih jien mek tame meng raong glang, pala drak saong dịch vụ ngak taneh, yaok thun sang ong mek tame hu labaih 200 triệu đồng, grap tanat rai diuk.

Oh lac ngak kaya meda ka baoh sang drei, ong Châu Quầy daok abih hatung hatai daong ka dom baoh sang kathaot dalam bruk ngak mbang pala drak, meng dom bruk ngak hu mboh di meta yau: daong ilamu kỹ thuật, daong ngak taneh, brei mesre phun jien, padai pajaih … ka ralo baoh sang kan kathaot; ba bruk ngak tani tanat ka  25 urang ngak dalam palei. Ong Châu Quầy khan lac: thau hu dom rambah rambup di urang kathaot nan ye mikva halei khin daong, dahlak jeng kham merat abih drei. Yau nan min, piah tabiak truh kathaot saong yam tagok ngak kaya meda khang kajap, mikva brei kham merat, thau kuhri kuhria, khang hatai ba ilamu  kỹ thuật tame bruk pala drak, raong glang, duah jalan ngak mbang meng hu siam lagaih. Tuk raong anek hagait, pala phun hagait njauk duah thau cambaih ka darak pasar, bac megru ilamu, iek glang siam… hu yau nan meng plaih hu khat lahik haong mek hu kein laba yau hatai caong khin./.