saai Chau Van Huynh sa urang Chăm nao palih ruah dalam chreih chrai 

Dalam dom harei ini, dalam dom palei Cam di tỉnh Ninh Thuận mboh biak chreih chrai. Hala dok khan bai, băng rôn hu tuan bak dom jalan palei, caga ka harei pilih ruah 23/5.

            Cử tri Châu Văn Huynh daok di palei Cam Văn Lâm 2, xã Phước Nam, huyện Thuận Nam brei thau, yaom lac hu rilo mbang nao buh phiếu, min oh ka mbang halei sa-ai mboh chreih chrai yau mbang ini. Meng hala phiếu di drei, sa-ai meda pilih ruah dom urang naih gheih, siam hatung hatain, abih drei ka bruk ngak di urang lambaok ka bhap bini. Dahlau di nan, sa-ai Huynh jeng hu caik tukvak piah duah thau ka dom urang hu ba tabiak piah pilih ruah, piah thau pilih ruah urang halei dalam hala phiếu di drei. Cử tri Châu Văn Huynh caong lac:

            "Bruk pato sap Chăm ka anek kamuan Chăm ka oh tal labik tal dhua, ....."

            Daok di ban sit Phước Dân, huyện Ninh Phước – sa huyện hu rilo urang Cam di tỉnh Ninh Thuận, bruk chreih chrai jeng hu mboh di rilo labik meng rilo harei tapa. Hala dok khan bai, blah rup cih jak ba hadah tagok di dom jalan meng pasak huyện haong dom xã hu rilo bhap bini Cam.

            Sa-ai Bá Minh Truyền – sa cử tri daok di palei Cam Hữu Đức, xã Phước Hữu, huyện Ninh Phước khan lac, drei jeng yau dom rahra karei, caong lac dom urang hu pilih ruah meda ngak njauk tui dom bruk, dom danak dak hu sanya haong cử tri. Mai jaik rahra jang, piah thau dom hatai caong, caik hatai tui pang caong khin di mikva, piah meng nan ba tabiak jalan langyah ka nyu siam jang. Cử tri Bá Minh Truyền brei thau, meng dom bruk daok rah tabiak di palei Cam drei daok, caong lac lingiu di bruk tani tanat yaom kaom kaya nong, abih di nyu lac yaom padai, karja palei njauk sangka jang tal rai diuk, bruk mbang ngui daok dang, labik me-in bui sambai ka uraniah.

            "Dom urang tabiak mbaok di Quốc hội, HĐND dom pakat brei sangka jang tal rai duik bhap bini..."

Oh lac hu bruk chreih chrai di cử tri Cam, bo dom urang Cam hu ba tabiak  piah pilih ruah jeng mboh hadah mbaok meta tuk hu lambaok ka bangsa drei, saong brei mboh hatai kham merat abih drei meyah hu plih ruah, pok ngak urang lambaok ka bhap bini.

            Amuk Đàng Thị Mỹ Hương, lac urang Cam saong lac urang QH 3 mbang (XII, XIII, XIV), urak ini daok hu ba tabiak piah pilih ruah ka QH mbang XV brei thau, tapa 3 mbang ngak urang QH, amuk mboh drei hu rilo mbuan lagaih, hu thau rilo, pataom hu rilo ilamu, urak ini mboh bhian randap haong bruk ngak di QH.

            Brei panuac di dom mbang taom gaok cử tri piah jak ba pilih ruah, amuk Đàng Thị Mỹ Hương ndom lac: “Meyah hu cử tri pilih ruah, hu pok ngak veik urang QH mbang XV, dahlak hu jalan piah patagok dom ilamu hu blaoh, daok patui dom bruk hu ba tabiak, hu ginum biai blaoh dalam QH mbang XIV; dom bruk hu Sarak QH mbang XIV ba tabiak, hu patui jalan pasang iek Rajaei nhiệm kỳ bahrau”.

Ninh Thuận hu 10 urang hu ba tabiak piah pilih ruah ka QH, dalam nan hu 2 urang hu TW ba mai; 89 urang hu ba tabiak piah pilih ruah ka HĐ bhap bini tỉnh; 400 urang piah pilih ruah ka HĐ bhap bini pakat huyện saong 2.863 urang piah pilih ruah ka HĐ bhap bini pakat xã. 

            Ong Trần Hải, Yam ndok Sở Nội vụ tỉnh Ninh Thuận brei thau:

            "Tapa dom mbang taom gaok, jaik abih dom cử tri jeng njauk hatai haong dom menuac hu ba tabiak piah pilih ruah di dom pakat. Meda lac mikva biak njauk hatai saong caong khin ngak habar dom urang nan, tuk hu pilih ruah, meda ngak njauk panuac sanya di drei. Abih di nyu lac meng bruk hu mbaok nan, hu jalan lagaih, blaoh meng nan taom gaok, ndom biai haong jabat dom pakat piah daong ka mikva hu tani tanat, jhul khang patagok KTXH di tỉnh dalam tukvak anak tal"

            Hu thau, dalam tỉnh Ninh Thuận hu 523.256 cử tri nao buh phiếu pilih ruah di 460 labik.

Meng hatai jia tame hala phiếu angaok tangin di drei, cử tri Cam Ninh Thuận caong lac dom urang hu ba tabiak piah pilih ruah, tuk hu pilih ruah dalam mbang ini, meda lac talei pambuak bruk, rik daong langyah dom caong khin di cử tri./.  

Urang lang: Mousaphuong- 23/5