Pơ Loong Nai ngak sap cim glai saong langyah lac: “ Sap nan hu meng kan, oh lac eng ame dahlak bo thei jeng ngak hu. Njauk pasram, pasram iew sap cim, dom janih cim brim. Diah cim mai ye, nan lac sap cim Nhồng, piah iew cim Nhồng mai”- Pơ Loong Nai peih akaok bruk ndom biai ka glai saong khol dahlak yau nan.

Meda lac, tok hu dom urang anit glai, kak kajap haong glai yau urang likei Cơ Tu ini, meng thau cambaih sap ieu di yaok janih cim glai. Palei Pazich, xã ATing, huyen Đông Giang, hu 72 baoh sang urang bangsa Cơ Tu, ye hu tal 64 baoh sang khik iek glai di bein negar Bạch Mã. Pơ Loong Nai, umo 45 thun, lac urang dang akok di 1 dalam 4 kapul khik iek glai. Yaok adit, Pơ Loong Nai saong dom urang dalam kapul ba gauk tagok glai.

Dalam dom mbang nao yau nan, ong saong mikva dalam palei duah mboh saong pacang cakak hu rilo mbang jah tak glai meng di tuk urang daok kuhria ngak. Saong hu sa mbang, sa-ai njauk kol jah tak glai nyu taong jaik metai.

Pơ Loong Nai hadar veik tuk nan: “ Kol nyu kacao takoi, kacao mbuk, mek to ndok sik takoi dahlak. Kol nyu kachok. Dahlak labuh trun, kol nyu taong urang nduac abih. Dahlak oh daok thau hagait tra kayua sraiy lahik rilo darah. Mbiah tal 4 tuk page, dân quân saong anek dahlak tame cakong, thei jeng lac ong Nai njauk kol jak tak glai pametai. Tal 9 tuk dahlak meng mai tal trạm y tế”.

Bruk nan khan veik biak mbuan, min yau panuac mikva palei Pazich, nan lac bruk diuk metai di sa anek menuac. Tok hu patuah jamo meng daong hu Pơ Loong Nai klah di metai. Pơ Loong An - anek likei kacua di Pơ Loong Nai thun ini umo 20 thun khan veik: “ ame njauk kol jak tak glai taong. 5tuk page khol dahlak tame glai duah ame, kayua dom urang daih thei jeng nduac klak abih, daok eng ame dahlak dalam glai. Ba ame tame sang iek ruak Đại Lộc, kayua ame oh daok prein tra. Dahlak saong amaik salih ka ame nao khik glai”. Sa-ai Clâu Chế patui panuac di anek lac: “ meng tuk pasang ruak ye dahlak nao khik miat salih ka ong nan”

Hadei di mbang jaik metai nan, thei jeng sahaneng lac urang likei Cơ Tu nan huac ye,  min ong Pơ Loong Nai oh klak glai bo daok khang hatai khik caga glai. Biak patuah, dalam bruk mesruh khik iek glai, Pơ Loong Nai oh ta-eng drei bo hu rilo mikva dalam palei daong pren. Sa-ai Clâu Lét lac sa dalam dom urang tuk halei jeng nao gam saong ong Pơ Loong Nai piah khik iek glai khan lac:” Meng rah tabiak bruk nan njauk brei kham jang, mikva oh daok huac, taduan khik glai ye njauk kham merat”.

Taha palei A Lăng Phương mboh hadah mbaok meta kayua palei Pazich di ong hu rilo urang kham khik glai. Ngan saong urang bangsa Cơ Tu palei Pazich, glai oh njauk lac phun kayau, cim brim saoh bo glai nan yau ralo darah kak kajap haong raidiuk mikva labik ini meng dom saman ini mai. Glai yau tamuh gha mbang tame dalam raidiuk, dalam adat cambat, ngak jeng jalan diuk rai saong khik ramik ilamu di bhap bini labik ini./.