2 thun dahlau, huyện bhum ceik Tây Giang, tỉnh Quảng Nam brei padang  Pasak Xúc tiến đầu tư song patagok du lịch Tây Giang. Meng di tuk padang pasak, urang Cơ Tu palei ni sahaneng tabiak jalan ngak du lịch biak gheih.

      Tây Giang hu dom inum krung sajarah CM, dom labik mekre hu angan yau Khu di tích địa đạo Axòo, palei lan am Knoonh, hamu bậc thang Chuôr, kali R'cung...Huyện jeng hu padang dom palei meng kan ndung bak ilamu Cơ Tu yau palei Cơ Tu di pasak huyện, palei Pơ'ning (xã Lăng),, palei Tà làng (xã Bhalêê)... Dom palei ni dak harei dak hu rilo rilo menuac thau tal song dak harei dak hu rilo tuia du lịch, abih di nyu nan lac tuai dunya.

        Akaok bilan 4/2014, 3 boh sang Cơ Tu di palei  Voòng, xã Tr'hy hu padang kalup kapul “Nyaom boh sang du lịch sinh thái Tr'hy" kayua ong  Clâu Hạnh dang akaok nyaom, haong phun jien buh tame ngak tuk camereip labaih 500 triệu đồng. Ong  Clâu Hạnh brei thau, dahlau deih, tabung ceik Quế lac labik padeih takai di urang jakar, bhap bini di bhum taneran tuk tagok 4 xã bhum ceik ngak bruk atau rivang gauk gar. Labik ni dahlau deih hu sa boh sang meng krein ala kayua dam dara xã Tr'hy padang ngak, lavik harei jeng labik main sambai. Hu rilo tuia damuai mai ni, dalam nan hu tuia dunya meng Hội An tagok.

        Khu du lịch sinh thái Đỉnh Quế daok di labik glong  jiak 1.400 m dut song mbaok ia tasik. Labik ceik glai  Trường Sơn ni liar bingi luac thun. Abih tih labik nan praong jiak 2 ha, hu 7 boh sang. Dalam 7 boh sang ye hu sa boh sang piah mbang huak, sa labik pablei pandap tạp hóa, 5 sang padeih padei ka tuai damuai.  Ong Bling Apú, urang dalam kalup kapul brei thau, pandap piah ngak dom baoh sang ini hu mek meng glai. Kayau ye mek dom phun kayua jaleih, kreim laa hu mbiah, tabung tauk ye pandar hala cọ song hala tăng pak veik. Langiu dom janih pandap mbang yaok harei, tuia damuai daok hu mbang dom janih pandap mbang di urang Cơ Tu yau lisei lam, rilaow am, ikan thu kho song rabung glai, bei plom am nding, ếch nướng ống; menyum alak  ba kích, alak  đẳng sâm, atau  alak  tr'đinh....Langiu  pandap mbang huak ndung mbak ceik glai ye ni lac labik biak siam piah padeih padei song lac labik piah thaot binguk. Tuai damuai dok hu mong iek dom lagu tamia tơ tung da dá, pang dom lagu doh bhap bini Cơ Tu.

        Saai Nguyễn Thị Lan Hương, sa urang tuai mai meng Hội An, mboh tatuak drei ka labik mekre song bruk rap ar tuia damuai di bhap bini di labik ni: “Langik li-ar bingi. Tuk nao meng gah la deih tagok ni, hulin mboh biak li-ar bingi, hacih sa-at, mong hu biak atah, dang di labik ni meda mong mboh hu vil val. Hulin dok hu iek dom lagu tamia di mik va Cơ Tu, dom ilamu biak siam biak gheih.

       Ong Ploong Plênh, Phó giám đốc Pasak  Xúc tiến đầu tư song patagok du lịch Tây Giang, brei thau: karja huyện Tây Giang tong yaom glong mô hình kalup kapul “Nyaom boh sang du lịch sinh thái” di xã Tr'hy. Ni lac jalan ngak gheih njauk pambak prong di dom palei karei hu pren patagok du lịch. Taphia bruk tagok hamu apuh, urak ni bhap bini bhum glong Tây Giang daok hu jien mek tame piah salih bharau rai duik meng bruk ngak bahrau, bruk ngak du lịch sinh thái pak di palei./.