Thun  1969 Wa palang lihik,  piah pahadar  saong khik kajap hatai jia ka dom urang lin cách mạng, pakat angaok brei ba thaot binguk di WA ka dom  đơn vị daok mesruh metak,  song  ong Hiền hu jao bruk khik piah blah rup thaot. Meng di tuk nan, blah rup thaot di Wa tuk halei jeng daok tapen ong, hu tuk caik dalam ba lô, hu tuk dok dalam thung phao, ong mong iek yau sa drap ar prong. Jeng meng blah rup thaot ni bo ong sahaneng tal bruk ngak pathi Wa:

 “ Dahlau deih bhap bini drei oh hu taneh riya, tong abih lac di địa chủ, drei ngak mbang pah min. Tal tuk hu cách mạng, hu Wa  pahadah jalan  urang kan jeng hu  taneh riya, ngak po di angaok mblang hamu bein pala di drei. Dar phol di Wa biak prong, nan ye hulin iek prong Wa yau ong muk amaik ame di drei. Song piah brei mboh hatai thau  dhar phor, hadar tal Wa yaok thun hulin hu ngak talam lisei pok tagok Wa. Dalam  mesruh metak, talam lasei biak  đơn sơ, thei hu hagait ba tui nan, pandap mbang bhian lac ikan am, jaluk ia bai song boh kayau piah pok tagok.

 Pathi Wa hu ong Kim Phước Hiền ngak meng thun camereip Wa lihik mbiah tal urak ni. Ong Hiền brei thau, pandap mbang menyum piah ngak talam lisei ngak pathi ka  Wa hu salih karei yaok thun, min pacuk ia danyau lac oh kurang hu, kayua gam lac adat cambat gam lac hatai cong khin pok tagok Wa dom janih pandap mbang  đặc sản, dom pandap mbang hu angan je di mik va bangsa drei.

Amuk Nguyễn Thị Nhơn – duik di ong Hiền brei thau, 2 haduik pasang ong urak ni umo jiak 80 thun, pren yava oh daok khang kajap, oh thau metai lihik tuk halei nan ye mboh duh hatai ka bruk khik ngak talam lisei pathi Wa hadei di ni.

 “Yaok thun ong Kim Phước Hiền jeng ngak talam lisei pok tagok Wa. Hu mbang ong ndom lac, hadei ni hulin taha ye, habar ngak hu tra. Min biak patuah, dom thun jiak di ni, anek taluac dalam sang jeng caik hatai sangka, dong bruk pok kakuh ka Wa. Dom harei ong muk taha oh dok di sang, nyu jeng iek glang bruk  am cuh gilau, papan kakuh Wa song dom saai nyu jeng yau nan. Meyah hulin song pasang oh dok duik  tra, anek di hulin nyu patui ngak  ”.

 Duik pasang ong Hiền hu 8 urang anek. Urak ni tong abih 8 urang anek jeng hu bruk ngak tani tanat, hu duik hu pasang song dok karei abih. Meng di tuk rai duik hu ginup meda, duik pasang ong Hiền biak kham merat rik dong, jak ba padang ngak puk palei. Tuk ngak pathi ka Wa Hồ, dom urang dahlau deih ngak bol lin, dom đồng đội di ong jeng hu mbaok, ba gauk hadar veik bruk cách mạng meng kan... Nan lac dom kreih camin hadah brei ka anek taco maong tame, bac megru tui. Ong Kim Phước Hiền brei thau:

 “ Hulin tuk halei jeng bac megru song ngak tui jalan hadah krah siam mekre di Wa, kayua Wa lac sa lãnh tụ kiệt xuất, hu pato ka khol drei jeng menuac siam, thau patak pataom . Ngan song anek taco dalam sang , bruk sangka camereip di hulin nan lac đạo đức, khiêm tốn, thau akaok thau iku, yau anek ngak  bác sĩ, hulin bhian kakei nyu bui sambai haong urang ruak. Kayua urang ruak biak cong hu sangka iek glang, panuac ndom nyai siam mekre piah akaok sahaneng hu chreih chrai, iek ruak hu siam lagaih jang”.

 Ong Huỳnh Văn Ngoan, Phó bí thư Đảng ủy xã Tân An brei thau, ong Kim Hiền lac sa urang abih hatai dalam bruk jak ba mik va padang ngak palei pala bahrau song bac megru ngak tui jalan hadah krah di Wa  Hồ:

 “Meng thun  1970 mbiah tal urak ni , wa  Kim Phước Hiền jeng hu ngak pathi Wa. Tapa bruk ngak biak hu makna yau nan,  xã jeng hu pathau khan ka urang jakar, urang đảng song bhap bini piah ngak tui jalan hadah krah di Wa. Tapa  pathau khan atau tapa ngak pathi Wa yau nan, nyu hu pren pambak prong  dalam xã”.

  Ngan song boh sang ong Kim Phước Hiền, bruk ngak papan kakuh song ngak pathi  Wa Hồ jeng sa bruk ngak yaok thun. Yaom lac sit sot, min bak hatai anit ranam, nyu tabiak meng hatai iek prong saong thau dhar phol. Ni jeng lac tuk piah ka  abih gauk mong iek veik rup di drei, piah duik rai ka nyu siam jang, oh padeih bac megru, ngak tui jalan hadah krah siam mekre di Wa./.