Lac urang “ndom takik, ngak rilo”, urang kham merat “salih bahrau saong yam tame” tuk rik daong salih bahrau kinh tế Việt Nam, urang dahlau daih ngak Thủ tướng Rajaei daok caik hatai sangka tal bruk pato megru saong hatai caong lac bruk “pala menuac” di taneh ia dak harei dak kein laba. Dom rik daong saong bruk ba tabiak jalan ka gah pato megru di ong tal urak ini jeng daok tamo yaom glaong. Mỹ Dung, urang vak di rayo sap ndom VN daok di ban raya HCM hu kadha vak ka bruk “pala menuac” di ong Phan Văn Khải – urang dahlau daih ngak Thủ tướng dalam hatung hatian di dom urang ngak gah pato megru di ban raya HCM. Da-a mikva saong taong abih gauk tui pang:

        Luac rai ngak bruk di drei, di labik halei urang dahlau daih ngak Thủ tướng Phan Văn Khải jeng sahneng kuhria ngak habar ka bruk pato megru di taneh ia dak harei dak siam mekre jang. Ong caik hatai sangka praong tal bruk pato megru di ban raya HCM. Tiến sĩ Huỳnh Công Minh, dahlau daih ngak Giám đốc Sở pato megru ban raya HCM brei thau, cei Sáu Khải biak anit dalam hatung hatian di dom urang ngak gah pato megru, dom gru pato saong anek saih dom rai. Ong jak ba padang ngak hu rilo sang bac di bhum kan kandah piah ka anek saih nao bac hu mbuan lagaih jnag. Tiến sĩ Huỳnh Công Minh khan lac: “Ngak Thủ tướng ye biak jar var rilo bruk, min cei Sáu Khải tuk halei jeng caik hatai sangka tal bruk pato megru. Cei kakei kol dahlak pato pakai ka nyu siam. Dahlau di tuk pato akhar haroh njauk hadar pato ngak menuac. Nan lac dom kadha bo kol dahlak hadar miat ka hatung hatian, ka jalan sahneng di ong Thủ tướng dahlau daih Phan Văn Khải.”.

        Tuk daok diuk, ong Phan Văn Khải jeng caik hatai sangka biak praong tal bruk pato megru đại học. Hu mbaok zirah ong Phan Văn Khải, Phó Giáo sư, Tiến sĩ Huỳnh Thành Đạt, Giám đốc Đại học quốc gia ban raya HCM drut drui lac: ngan saong Đại học Quốc gia ban raya, wa Sáu Khải yau sa urang ame, sa urang đồng chí, urang sa-ai anit ranam. Wa lac urang tabiak rilo harak, nghị định, quy chế ka Đại học quốc gia. Wa daok lac Chủ tịch Danh dự di Kadung jien cakrok patagok Đại học quốc gia ban raya HCM piah ieu bhap bini ba gauk tame daong ngak brei patagok khang kajap ka sa đại học hu angan je di ban raya HCM. Tuk ngak bruk, wa hu kakei Đại học quốc gia ban raya  HCM kham merat roh duah ilamu khoa học piah duh ka taneh ia, ba công nghệ duh ka menuac sia saong ka xã hội. Phó Giáo sư, Tiến sĩ Huỳnh Thành Đạt ndom lac: "Kol dahlak mboh pandik harao lô. Urang jakar, urang pato, viên chức, sinh viên saong anek saih Đại học Quốc gia ban raya HCM kham merat abih drei piah padang saong patagok Đại học Quốc gia yau panuac wa Phan Văn Khải kakei.”.

        Tuk padeih hưu, ong Phan Văn Khải jeng oh padeih caik hatai tal gah pato megru ban raya HCM. Umo glaong pren takik min hu bruk ye ong rik jien saong jak ba menuac sia daong padang ngak sang bac, daong jien bac ka anek saih kan kathaot. Bloh mai veik Củ Chi, ong jak ba padang ngak sang bac Tiểu học Tân Thông piah ka anek saih kathaot palei drei oh daok “ngồi thúng” bac akhar yau ong dahlau daih. Ong payua jien tiết kiệm di gilang pariak bloh mek jien laba blei pandap tết, daong jien ka gru pato gaok kan kandah. Piah pabak veik hatai caong di ong Phan Văn Khải, tal urak ini, sang bacTiểu học Tân Thông hu jeng labik hadah gah chất lượng tuk jeng baoh sang bac akaok meti di ban raya peih ngak iek mô hình sang bac bahrau VNEN. Tapa rilo mbangtaom gaok, ngak bruk, ong Lê Ngọc Điệp, dahlau daih ngak Trưởng Phòng Giáo dục Tiểu học - Sở pato megru ban raya HCM biak pok meyaom jalan sahneng, jalan ngak di urang dahlau daih ngak Thủ tướng Phan Văn Khải brei ka gah pato megru. Bo kadha njauk caik hatai di abih lac jalan ndom puac biak bình dị, anit ranam di wa Sáu Khải tuk ndom tal dom gru pato, dom rai anek saih: Ngan saong bruk pato megru wa oh ndom kadha hagait praong. Wa tuk halei jeng ndom dom bruk sit, dom kadha di anak meta min dahlak mboh nyu pamoang tal jalan praong. Tuk daok ngak di Sở pato megru ban raya HCM dahlak tuk  tuk halei jeng kanal hadar. Njauk ngak habar ka uranaih bac da-a hu siam jang, raidiuk di gru pato hu siam jang saong jalan diukrai siam mekr di anek saih dak harei dak glaong.

        Ngak habar piah ka gru pato sahanang hatai kak kajap haong bruk  pato, ngak habar piah ka anek saih kan kathaot hu bac da-a tal labik tal dhua, ngak habar piah ka bruk pato megru oh dang di sa labik lac dom caong khin bo ong Thủ tương dahlau daih Phan Văn Khải tuk halei jeng ndom tal tuk ngak bruk haong gah pato megru dom puk palei. Bruk sangka, daong ba di ong hu daong ngak brei salih bharau khang dalam paglaong siam mekre bruk “pala menuac” di ban raya HCM./.