Bein medrum di ong Đinh Mạnh Đới, daok di palei 1, xã Dân Chủ, huyện Hoành Bồ, tỉnh Quảng Ninh urak ini hu angan dalam bhum oh lac hu rilo baoh, pahe bingi bo daok kayua ong nan lac urang dahlau daih ngak bol lin joi ngak kinh tế. Dalam kadha kreih camin palei negar harei ini, daa mikva saong taong abih gauk pang kadha vak angaok harak báo bhap bini khan ka kreih camin joi ngak kinh tế ini:  

Daok dalam bein praong jaik 2 ha nan lac baoh sang dua tal, tapen mblang bein lac labik caik baoh medrum di dom harei paik baoh. Kol dahlak hu gaok ong Đinh Mạnh Đới, oh thei sahneng lac ong umo 70 thun, ong khan lac: piah hu yau harei ini ong njauk tuh ia hauk, tuh pren yava saong oh thau hadom tâm huyết. Oh lac urang di palei ini, ong Đinh Mạnh Đới, bangsa Tày daok di palei  Pắc Đoắng, xã Đạp Thanh, huyện Ba Chẽ, tỉnh Quảng Ninh. Jaik 10 thun, hu mbaok tame bruk mesruh metak di Quảng trị, thun 1973, hadei di tuk phục viên, ong Đới ba diuk anek mai huyện Hoành Bồ saong padang mbang ngui di labik ini..Ngak ralo bruk duah jien bo oh ginup mbang, ong khang hatai buh pren tame ngak mbang angaok mblang taneh di drei. Tukvak camereip, ong pala kandiuk, oh hu kein laba, ong salih tapa pala vải. Jeng hu dom vụ camereip, hadei di nan vải nyu laik yaom, abih di nyu nan lac tuk vải tasak ralo, yaom lap, njauk paik pablei thaik abih kayua mepiah tapa dom harei, vải nyu bruk, khut. Kuhria mboh oh jeng, ong jah klak labaih 200 phun vải, salih tapa pala medrum. Hadei di tuk duah thau ilamu pala medrum lê brei rilo baoh, ong Đới khang hatai buh jien, buh pren tame ngak. Ong Đới khan lac, sa thun, meyah iek glang siam meda paik hu tal dua vụ praong nan lac bilan 5, bilan 6 saong bilan 11, bilan 12 tui saka ia bilan, vụ sit nan lac bilan 7, bilan 8 yaok thun.

Urak ini, langiu jien mek tame meng bein darum praong dua ha saong dom bein darum sit vir taom dar, ong Đới daok chiết 5000 dhar pablei kai dua tuai damuai daok di tỉnh Yên Bái saong Bắc Giang. Ong khan lac, tukvak chiết dhar ralo meng lac bilan pandiak tuk phun tabiak katak. Hadei di 3 tal 4 bilan, tuk mboh gha tabiak ralo yau merai men mang di langiu bầu nan lac tuk cakak hu. Ini lac ilamu bo urang pô bein darum umo 70 thun mek hu hadei di 3 thun chiết dhar ngak pajaih. Bruk chiết dhar ngak pajaih saong raong menuk ada, limo kubao dalam bein drum jeng mai meng hatung hatian di urang dahlau daih ngak bol lin angan Đinh Mạnh Đới caong khin pambak praong bruk ngak piah ba gauk tabiak truh kan kathaot./.