Sa-ai Nguyễn Tấn Vương daok di xã Lâm Sơn, huyện Ninh Sơn, tỉnh Ninh Thuận biak takre sambo mau jeng yau pahe di bingu lan yau nan ye sa-ai pala rilo janih lan glai yau ye: Long tu, Kim điệp, Thủy tiên, Hồng nhạn, Đuôi cáo, Hải yến, Hỏa hoàng…saong dom janih lan Dendro, Vanda hlai…Hadei di nan, mboh lan dã hạc hu yaom kinh tế, hu rilo urang me-in lan duah blei nan ye sa-ai peih bruk pala lan. 

           Dom harei camereip pala saong iek glang phun lan, sa-ai Vương gaok oh  takik kan kandah kayua oh thau cambaih bruk pala lan yau habar, nan ye lan metai saong khut  ralo. Meng tari taring, kham merat, gam ngak gam bac megru nan ye hadei di 3 thun, sa-ai thau hu bruk pala lan, thau pabam pajaih lan saong thau ngak brei lan tabiak bingu tui hatai urang blei. Meng nan, bingu lan di sa-ai hu rilo menuac di angaok mang xa hoi thau tal. Dom janih lan dã hạc takik hu, sa-ai pablei ka dom urang main lan hu yaom labaih 100 trieu dong, daok dom janih bhian mboh  jeng pablei hu dom trieu dong sa phein. Sa-ai Vuong khan lac: “ Dahlak sahaneng lac, piah padang mbang ngui hu jak jeng, camereip abih drei brei hu hatai takre, dua tra kham duah thau ialmu ky thuat ba tame bruk ngak di drei, ka klau tra drei duah darak pasar piah pablei pandap di drei .”

           Urak ini dalam bein lan di sa-ai hu labiah sa rituh janih lan dã hạc hu yaom dom trieu tal sa rituh trieu dong sa phein. Meng thau pala lan patui gauk nan ye sa-ai hu bingu pablei gam gam, tui nan, sa-ai Vương laba hu labaih kurang 100 trieu dong sa thun. Sa-ai Vương brei thau: bruk pala lan saong iek glang biak mbuan, njauk thau ilamu pala nyu saong duah hu labik pablei  ye lac meda padang mbang ngui hu meng bruk pala lan. Amuk  Nguyễn Thị Hải, Phó Bí thư Đảng ủy xã Lâm Sơn, huyện Ninh Sơn-Ninh Thuận khan lac:“ Vương tari tarieng duah thau blaoh blei di dom labik karei mai pambak praong bruk ngak mbang. Tuk Camereip phun jien di Vương biak takik, hadei ini hu karja palei daong brei mesre hu jien Vương buh tame ngak.”

 Lan dã hạc lac janih lan quý, piah ka phun brei bingu mekre meta urang pala njauk duah thau janih lan ini nyu yau habar, dahlau di tuk pala brei ngak bein ka nyu siam di abih. Bein lan di sa-ai hu ngak meng mejam piah tuan lan tagok, atah di mbaok haluk meng 1,5 – 2m, gah angaok hu halam pacang halui. Sa harei pruh sa mbang ka phun, min pruh gap mbiah, njauk ngak kuang halang ia dahau di tuk nyuk ia pruh. Bruk njauk biai nan lac, dahlau di tuk ngak brei lan dã hạc tabiak bingu brei raong phun ka nyu khang kajap meng bruk buh khak ginup, gam caik hatia sang ka tui iek halak halin ngak brei lan metai.  Hatai takre bingu lan di sa-ai Vương hu ba mai ka sa-ai bruk jak jeng. Rilo dam dara, ayut sahabat mai bac megru bruk pala lan di sa-ai Vương. Sa-ai Hà Thị Thu Hằng, Bí thư Huyện Đoàn Ninh Sơn, Ninh Thuận ndom lac:“Hu dom dam dara hu dom bruk ngak biak lagaih piah padang mbang ngui ka drei. Meng bruk ngak nan nyu pachreih dam dara urang đoàn padang mbang ngui. Anak tal, khol dahlak  brei daong dom ayut dam dara khin padang mbang ngui yau sa-ai Vương”

 Tukvak anak tal, sa-ai Vương daok buh jien tame ngak saong peih praong bein lan, gam pabam dom pajaih lan dã hạc quý takik hu  piah khik ramik janih lan nan  anak bruk mbuan si lahik abih. Sa-ai Vương daok lac urang yau kreih camin hadah piah ka dom dam dara Ninh Thuan bac megru saong kham ngak kaya meda tui di bhum taneh palei drei./.