Urang dang akaok dam dara abih hatai saong dom raidiuk kan kandah di Tien Giang

Tukvak jaik ini, di Tiền Giang mboh hu rilo kapul nyaom, menuac urang ngak pahla, tuk halei jeng sangka, neh rabha, daong ka dom urang kan kandah yam tagok dalam raiduk. Dalam nan, saai Võ Ngọc Minh Huy, chủ nhiệm kalup kapul “panyin bu melam” di uy mban Hôi Liên hiệp dam dara ban sit Mỹ Tho lac kreih camin hadah ka sa urang likei dam hu rik daong pren neh rabha kan kandah, ba bui sambai mai ka urang karei. Nhật Trường, urang vak di rayo sap ndom Viet Nam daok di bhum taneran kraong Cuu Long hu kadha vak brei thau ka urang likei ini:

 -Yaom lac barau 26 thun, min saai Võ Ngọc Minh Huy biak jar var saong bruk từ thiện xã hội saong bruk pato pakai. Kayua saai urak ini lac chủ nhiệm kalup kapul “ panyin bu melam” gam lac gru pato sap Anh di sang bac Tiểu học Tân Tỉnh, xã Tân Mỹ Chánh, ban sit Mỹ Tho.

 -Saai brei thau, meng tuk daok lac sinh viên di sang bac Đại học Tiền Giang, saai thau hu bruk glaih glan, rambah rambup di dom urang kan kandah ye: urang pablei vé số, uranaih lang thang, urang ruak kathaot… Kayua yau nan ye, thun 2012 tuk bac tamat, hu bruk ngak tani tanat, saai jak ba ayut, sinh vien padang kalup kapul “panyin bu melam”. Kalup kapul ngak bruk tui jalan lac jak ba jien padai piah tahanek lisaiy atau ngak bu brei saoh yaok adit sa mbang ka urang ruak kathaot di sang iek ruak  đa khoa trung tâm tỉnh  saong dom urang xã hội di dom libik công cộng pak nan.  

Urak ini, kalup kapul daok khik hu bruk lac yaok bilan 2 mbang brei saoh jaik 300 suất lisiay, bu. Taphia nan, saai Võ Ngọc Minh Huy  daok jak ba “ xã hội hóa” piah kalup kapul “ panyin bu melam” peih praong tabiak rilo bruk an sinh xã hội karei ye: padang baok sang ka sang urang đoàn, dam dara kathaot; ngak Tết trung thu ka uranaih, alin pandap Tết ka bhapnibi kathaot, peih ngak danakdak “ Daong pren bilan pakacah”. Bruk ini oh lac peih ngak dalam Tiền Giang bo daok peih praong tabiak dom tỉnh jaik taphia. Piah hu jien, saai Huy saong labaih 20 urang di kalup kapul hu pathau khan jak ba tapak atau tapa  Facebook, Zalo…Meng nan bruk di kalup kapul “ panyin bu melam” hu ngak gam gam saong hu urang daong. Ndom ka bruk từ thiện xã hội, saai Võ Ngọc Minh Huy khan lac: bruk  padang kalup kapul “ panyin bu melam” lac caong ba bui sambai ka menuac sia. Dahlak sahaneng lac tuk urang hu bui sambai ye urang hu pren piah diuk rai siam. Urang jia lac dalam raidiuk ini daok hu menuac thau sangka tal drei, brei ka urang sa paok pandap oh samu brei ka urang hu bui sambai. Dahlak  thau lac bruk ini kan kandah min oh ngak ye oh hu bruk nan rah tabiak. Yau nan ye, yaom lac bruk drei ngak akaok mereip kan kandah min livik livik harei nyu tagok khang, meyah drei ngak meng hatung hatian di drei.

Dalam 5 thun tapa, saai Võ Ngọc Minh Huy daok lac gru Tổng phụ trách Đội di sang bac Tiểu học Thủ Khoa Huân saong gru pato sap Anh văn di sang bac Tiểu học Tân Tỉnh. Yaom lac ngak bruk hagait, urang gru pato ranaih umo ini jeng ngak siam bruk hu jao brei. Abih di nyu nan lac, tuk pato sap Anh, gru Huy hu ngak rup cih, thaot binguk minh hoa piah dom adei takre bac jang. Langiu di nan, saai daok taduan pato pasram anek saih naih joi sap Anh di sang bac. Tapa nan, anek saih tut angan pakacah joi pakat ban, pakat tỉnh thun hadei rilo jang thun dahlau, hu urang dang akaok sang bac, gru pato taong yaom glaong. Gru Phạm Xuân Thanh, Hiệu trưởng sang bac Tiểu học Tân Tỉnh, ban sit  Mỹ Tho lac: dalam bruk xã hội, gru Huy ngak biak siam. Hu bruk hagait ye gru Huy abih hatai hu mbaok tame. Gru Huy jeng hu jak ba kapul di drei di akaok thun atau harei lễ, tet alin pandap ka anek saih. Gru Huy biak naih joi, ngak siam bruk hu jao brei.

Urang dang akaok “ panyin bu melam” – urang gru ranaih Võ Ngọc Huy daok ndua nong angaok rup 2 bruk lac: ngak bruk từ thiện xã hội saong ba akhar ka anek saih. Piah ngak siam dua bruk karei di gauk, ngan saong Võ Ngọc Minh Huy lac oh mbuan. Yau nan ye, saai oh padheih kham merat meng pren ranaih, hatai takre biak khang.

Dalam tuk taneh ia drei daok dalam tuk salih barau, hu oh takik kan kandah meng cơ chế thị trường , ye dom bruk ngak brei ka bhapbini di urang likei daok ranaih, urang  gru abih hatai Võ Ngọc Minh Huy jeng ye dom urang dalam kalup kapul “ panyin bu melam” di ban sit Mỹ Tho, tỉnh Tiền Giang hu brei mboh bruk diukrai siam mekre di urang likei dam. Bruk ini jeng brei mboh lac, dalam tukvak urak ini, urang đoàn, dam dara tuk halei jeng ba abih hatai, maong bruk bui sambai di urang karei lac haniem phuan di drei./.

Thúy Linh