Ngan haong mikva di palei B’Dơng, xã Quảng Khê, huyện Đác G’Long, tỉnh Đác Nông ye angan K’Sớ oh daok atah bayah. B’Dơng nan lac palei biak kan kandah hu 194 baoh sang, labaih sa ribau urang di dalipal bangsa daok haong gauk. Akaok palei B’Dơng K’Sớ, urang bangsa Mạ lac kareih camin khin saneng khin ngak, ba akaok nao dahlau dalam bruk ngak mbang kinh tế, hu jeng sa triệu phú nông dân saong yaom jien mek tame yaok thun labaih meteh tỷ đồng. 

Akaok palei K’Sớ khan lac: "Dahlau diah, sang hu ralo urang anek caong yam tagok tabiak truh kan thaot nan lac biak kan, ndom hagait tal bruk ngak meda. Taneh riya hu ralo, min bruk pala dom janih phun katut harei oh hu kein laba hadom ". Thun 2008, dalam tuk daok gaok ralo kan kandah ka phun jien, gam haong phun jien patak pataom hu dalam sang, ong hu Gilang pariak Sarak karja daong brei mesre 10 triệu đồng, K’Sớ khang hatai nao blei 6 drei limo binai mai raong. Thun akaok mereip tapol limo di ong cakrok patagok biak siam  saong menek hu 6 drei la-oi, bloh yau nan dak thun dak caih menek. Urak ini, trang trại limo di sang ong tagok tal 40 drei, dalam nan hu 30 drei limo binai menek. Yaok thun tapol limo menek hu jaik 20 drei la-oi, kaoh abih phun jien buh tame blaoh, sang ong mek tame hu labaih 400 triệu đồng yaok thun. Rai diuk sang ong dak harei dak tagok, padang hu sang danaok siam mekre, khang kajap, blei hu rilo pandap panda pandar dalam sang. 7 urang anek di ong ye 4 urang hu diuk hu pasang blaoh saong thei jeng hu sang danaok daok karei, 3 urang daok nao bac.

Tukvak tapa, lac urang hu angan je, urang đảng, Akaok palei B’Dơng, ong hu ngak siam bruk pathau khan, jak ba mikva ngak tui jalan ba di Đảng, sarak hukum di Karja, tah klaak dom adat cambat tanarakun oh daok laghaih haong saman ini, ong K’Sớ hu daong ba mikva tapa truh kathaot yam tagok ngak meda. Ong hu klah rabha dom kan kandah haong mikva dalam palei tui jalan: daong ka baoh sang kathaot abih dalam palei sa drei limo, 5 baoh sang karei ong pablei limo lap samu meteh yaom pablei di darak pasa; tacei pato ilamo raong limo ka mikva dalam palei. Ong K’Sớ jeng hu pok panuac tagok xã Quảng Khê brei padang Kapul pambuak bruk raong limo, pato pathram ilamu  raong limo piah ka mikva hu labik bac megru ilamu raong glang, pacang cakak jit ruak, khang hatai pambak prong tapol limo, raong glang tui jalan trang trại, ba mai kein laba glaong jang. Langiu di nan, ong jak ba mikva peih prong bruk raong limo, oh lac hu laba tuk limo menek bo anak meta daok hu kein laba tra nan lac pablei khak limo ka urang buh phun cà-phê, njam patam. Baoh sang K’Sớ hu klau ha cà-phê, min dom thun ini mai oh daok nao blei khak hóa học yau dahlau diah. Khak van ro hu rik daong biak ralo tame bruk patagok năng suất cà-phê, ngak ka phun cà-phê that hijao, baoh prong, pacang caga tua riya pandiak bhang siam… yaok thun mek tame hu labaih 12 tấn cà-phê, jien mek tame yaok rituh triệu đồng. Sang ong daok hu thau tal lac baoh sang ba akaok nao dahlau dalam bruk ngak mbang kinh tế naih jioi, lac labik piah ka mikva bac megru ilamu iek glang phun cà-phê, cakak dhal, buh khak, pruh aia… pasiam veik năng suất phun pala. Ong K’Sớ bahrau hu pok ngak urang điển hình lambaok ka dom kareih camin ngak mbang naih gheih di tỉnh Đác Nông./.