Sóc Trăng : Urang Đảng patak pataom jien 10.000 đồng sa bilan daong gauk patruh eik patrun kathaot.

        Pathau mikva saong grauk yut ! Tui bruk bac megru saong ngak tui jalan hadah krah siam mekre di Chủ tịch Hồ Chí Minh, Đảng bộ Phường 3, thị xã Ngã Năm, tỉnh Sóc Trăng hu pathau khan, jak ba yaok urang Đảng patak pataom 10 rabau đồng sa bilan piah rik jien daong gauk patagok kinh te, patruh eik patrun kathaot, yam tagok tani tanat raidiuk dalam đảng bộ. labaih 3 thun peih ngak, bruk ini mboh hu siam lagaih. Kadha vak di Thạch Hồng urang vak di rayo sap ndom VN daok di bhum taneran kraong CL :

           Lac urang đảng sang kan kandah, takik taneh pala drak, akaok thun ini, saai Nguyễn Văn Sen di khóm Mỹ Thanh hu daong 5 triệu đồng meng phun jien patak pataom di urang đảng dalam đảng bộ phường 3 piah patagok kinh tê sang. Saai Sen hu raong 100 drei menuk nòi palao dalam bein. Hadei di labaih 3 bilan, saai Sen pablei lứa menuk akaok meti hu labaih 8 triệu đồng. Jak jeng mbang camereip daong ka saaai Sen  khang hatai peih praong bruk ngak, urak ini sang saai hu labaih 100 drei menuk nòi ralo saong yaok bilan pablei hu jaik 200 drei menuk pajaih duah hu labaih 2 triệu đồng sa bilan. Saai Sen daok brei thau lac: Urak ini, sa bilan menuk caih tabiak jaik 4 mbang anek pajaih, yaok mbang tame sruh jaik 200 baoh, tui bruk hao hụt ấp baok meng 10 tal 12 %, , yaok mbang hu 170-180 drei; Urak ini urang  đặt 1 drei 15.000 đồng bo oh hu menuk piah pablei ka urang tra.

       J eng lac urang hu iek daong phun jien 5 triệu đồng meng jien patak pataom di abih urang đảng dalam đảng bộ phường, sang amuk Lưu Thị Mỹ Dung, urang đảng khóm Vĩnh Tiền hu pilih ruah bruk raong ikan kan ralin dalam danao. Meng taneh raong jaik 200 mét vuông, sang palao 70 kg ikan pajaih; labaih 2 bilan hadei, ikan raong di sang trak meng 10 – 15 drei sa kg. Amuk Dung khan lac, labaih 2 bilan tra meda mek pablei, meyah siam lagaih ye jien mek tame meng 5 – 8 triệu đồng. Ikan urak ini jeng daok praong siam; meng 2 – 3 bilan tra pablei jeng duah hu 15 triệu , blaoh biyan jien njauk  tukvak piah ka urang đảng nyim piah patagok veik.

          Urak ini, Đảng bộ phường 3, ban sit Ngã Năm hu 294 urang đảng . Labaih 3 thun peih bruk urang đảng rik 10.000 đồng/sa bilan sa urang, tal urak ini, jien patakl pataom hu abih tih jaik 100 triệu đồng. Yaom jien ini hu daong oh kuhria laba piah padang 8 mô hình patagok kinh tế ka urang đảng, tui tanut daong meng 5 – 10 triệu đồng sa urang đảng; dom bruk ini jeng ba mai kein laba.

            Piah ngak siam bruk ini, Đảng ủy hu khan brei thau cambaih laih tal yaok urang đảng saong pilih ruah dom urang đảng abih hatai, kham merat ngak mbang piah daong. Hadei di nan pambak praong tabiak. Bruk njauk uan tabuan lac dom urang đảng hu daong jeng pandar paok jien hu kein laba. Ông Dương Văn Thum, Urang jakar Tuyên giáo Đảng ủy Phường 3, ban sit Ngã Năm brei thau : Bruk brei ka urang đảng nyim jien piah patagok kinh te nan lac njauk saong raiduk. Urak ini daok ieu yaok sang urang đảng hu bruk patagok kinh te. Saong mboh lac phun jien ini hu daong ka urang đảng patagok hu kinh tế sang, sa bruk tra lac ba mbuan lagaih ka urang đảng hu sa bruk piah ba tabiak bloh hadei di nan pambak praong ka bhapbini siam jang. Dalam Ban chấp hành Đảng ủy meyah mboh bruk raong pabui atau limo ye daong 12 bilan, daok urang halei raong menuk, dom pajaih katut harei ye daong brei 6 bilan.

         Anak meta mboh lac, phun jien daong ngak mbang yaom lac oh rilo, min hu daong ka urang đảng kan kandah hu jalan patagok kinh te, yam tagok dalam raidiuk. Lingiu di nan, Đảng bộ Phường 3, ban sit Ngã Năm, tỉnh Sóc Trăng hu khan brei thau cambaih laih tal abih urang đảng di Đảng bộ tui bruk bac megru saong ngak tui jalan hadah krah siam mekre di Chủ tịch Hồ Chí Minh dalam raidiuk, nan lac daong gauk yaom lac bruk sit di abih, piah meng nan tani tanat raidiuk ka urang đảng saong daong ka urang karei yam tagok dalam raidiuk./.

Thúy Linh