Urang đảng tuk halei jeng ba kaok nao dahlau dalam taong abih bruk ngak di puk palei

Umo jaik 70, ong Lê Văn Đông gam lac po di sa ha bein phun mbang baoh, gam lac urang dang akaok Kapul urang taha umo xã Bàn Long nan ye biak jan van haong bruk sang, bruk puk palei. Ong Đông brei thau, thun 1987, hadei di tuk padeih ngak Chủ tịch UBND xã, hu padaih hưu, medhil sahaneng lac hu padeih padei, min tapa jak ba di pakat ủy, Kaja puk palei saong bruk anit ranam di urang đảng Chi bộ ấp Long Trị, urang đảng ini daok hu rilo nhiệm kỳ ngak Bí thư chi bộ saong lac urang dang akaok dhar kapul pachreih bac di palei. Tal thun 2015, ong Lê Văn Đông salih tapa ngak urang dang akaok kapul urang taha umo xã Ban Long. 

  Meng bruk ngak di sa urang đảng, ngak bruk hagait ong jeng ngak siam bruk di drei. Abih di nyu lac dalam 12 thun ngak Bí thư Chi bộ ấp Long Trị, xã Bàn Long, ong Lê Văn Đông hu rik daong biak rilo saong siam mekre tame bruk pal akaok ba jalan dak padang puk palei, cakrok patagok hạ tầng palei pala, iek glang rai diuk di bhap bani, dak padang Chi bộ dak harei dak khang kajap. 5 thun jaik di ini, tuk daok lac urang dang akaok kapul urang taha umo xã Bàn Long, meng bruk ngak saong angan je di drei, ong kham merat paglaong  chất lượng bruk ngak di Kapul, pasang iek tal rai diuk di urang taha umo. Tal urak ini, Kapul urang taha umo xã hu labaih 1.000 urang, yaok thun, jeng hu tỉnh, huyện pok brei harak meyaom. Thun ini, kapul hadah mbaok hu TW Kapul urang taha umo pok brei harak meyaom ka bruk ngak biak siam gheih. 

Lac urang jakar, urang đảng, ong tuk halei jeng ba kaok nao dahlau dalam taong abih bruk ngak di puk palei, abih di nyu lac bruk patagok kinh tế baoh sang piah ngak kareih camin ka urang đảng saong bhap bani mblah tui. Tal urak ini, tapa patak pataom hu dalam ngak mbang, ong Lê Văn Đông hu blei veik, peih prong bein phun mbang baoh hu 01 ha. Jaik di ini, piah lagaih haong biến đổi khí hậu saong bruk di darak pasar, ong salih tapa pala dua janih phun pala nan lac panat saong la-u. Meng pandar ngak siam dom ilamu saong khik hu halau aia taba piah pruh nan ye bein di ong tuk halei jeng that siam, brei rilo baoh. Kaoh abih phun jien buh tame, yaok thun, bein phun mbang baoh brei laba labaih 300 triệu đồng. Ong Lê Văn Đông brei thau:  “Hadei di tuk ngak bruk di Kapul urang taha umo, drei hu ilamo di urang dang akaok jeng yau rami ramik bruk sang danaok, bruk halei ngak dahlau, bruk halei ngak hadei saong iek glang Kapul di drei. Dahlak mboh jeng oh hu hagait tavak tave, mboh biak siam. Dom thun gam ngak bruk di Kapul urang taha umo ye dahlak hu ngak siam bruk di gah angaok jao”.

Tui bhap bani puk palei, ong Lê Văn Đông biak kham merat ngak mbang, tari tareng roh duah, bac megru ilamo pala phun mbang baoh, duah tabiak dom phun pajaih bahrau hu chất lượng, laghaih haong taneh riya di puk palei piah pala. Meng dom kham merat yam tagok oh padeih, urang  nonhg Lê Văn Đông hu tỉnh Tiền Giang, Thủ tướng Raja-ei pok brei rilo Harak meyaom. Jeng meng thun blaoh, ong hadah mbaok hadah meta hu Akaok  negar pok brei Huân chương Lao động pakat klau kayua ngak siam bruk ngak di urang Nong pakacah gauk ngak mbang – pablei salih naih jioy. Ong Nguyễn Văn Tuấn, akaok UB bhap bani xã Bàn Long brei thau: “Njauk ndom lac ong Lê Văn Đông nan lac sa dalam dom urang baik naih gheih. Dom bruk kan kandah di xã yau: jak ba bhap bani alin brei taneh piah ngak dom jalan điện, jeng yau peih prong dom canah jalan gaok tal bein phun mbang baoh bo xã caong khin ye sa-ai Đông abih hatai daong ka xã saong mek hu biak rilo siam mekre. Ndom ka kinh tế bein di ong ye brei jien mek tame biak glaong”.

  Ong Lê Văn Đông brei thau, lac urang đảng tuk halei jeng njauk ba akaok nao dahlau, abih drei haong bruk ngak di baoh sang saong bol bhap rahra, daok pren yava lac daok ngak, daok rik daong piah dak padang puk palei dak harei dak siam mekre, kaya meda./.

Urang lang: Jasi – 05/09