Urang Dao bản Suối Khem tani tanat raidiuk meng pala tea saong raong glang.

     Suối Khem dom thun dahlau lac bản kan kandah di xã Phiêng luông, huyện Mộc Châu, tỉnh Sơn La. Meng khang hatai salih phun plaa, kaya raong, pandar alamu tame ngak mbang, raidiuk di bhapbini bản ini salih barau. Kadha vak di Triệu Biên, urang vak di rayo sap ndom VN daok di bhum Tây Bắc.

       Dom thun dahlau, raidiuk di mikva urang Dao bản Suối Khem biak kan kandah, luac thun ngak mbang glaih glan, min eik lipa, kathaot rambah daok ndam gam raidiuk mikva. Ngak hagait piah patruh kathaot tuk mikva daok hu pren ngak, daok hu rilo taneh. Bruk sahanneg nan jeng hu langyah tuk mikva mboh lac phun tea siam saong taneh riya saong lingik di ini. Hu karja puk palei ba jalan, jak ba, rilo mikva dalam bản hu coah taneh mbok piah pala tea, raidiuk jeng dak harei dak tani tanat. Saai Bàn Thùy Dung daok di bản Suối Khem,  xã Phiêng Luông, huyện Mộc Châu – sa dalam dom sang pala rilo tea abih dalam bản brei thau : Urak ini sang dahlak pala jaik 5 ha phun tea, jien mek tame yaok thun 70 – 80 triệu đồng. Meng tuk pala tea raidiuk hu paglaong, blei hu dom ka ya ngui duh ka raidiuuk yaok harei.

     Gam saong patagok phun tea, mikva dalam bản daok hu pala phun cam, quýt saong raong athur, menuk ada. Yau ye sang saai Bàn Thị Thanh lac sa sang nao dahlau dalam bruk nan. Pnadar dom taneh bein di sang, saai pala 100 goc cam, quýt saong chanh leo, taphia nan lac libik raong palao menuk ada saong pabui gam hu jien mek tame gam hu khak drak ka phun pala. Yaok thun, sang saai hu jien mek tame meng phun pala saong raong glang meng 65 tal 70 triệu đồng, hu jien raong anek nao bac ginup. Saai Thanh lac : Meng salih tapa pala cam, quýt, raong menuk, pabui yaok thun jien mek tame jaik 65 tal 70 triệu, ginup jien brei ka anek nao bac. Anek praong urak ini daok bac Đại học Công nghệ saong thương mại. Tui dahlak, bruk ngak mbang kinh te ini harei hadei dak patagok jang.

       Bản Suối Khem urak ini hu 118 sang ngan saong 475 menuac urang, rilo meng lac urang Dao Tiền. Tui akaok bản Triệu Văn Chung, mikva dalam bản rilo meng pala tea, tangei saong raong athur, menuk ada. Urak ini dalam bản Suối Khem hu jaik 50 hecta taneh pala tea, yaok thun mikva mek jien tame tani tanat. Kayua thau pandar alamu tame pala tea, raong glang, raidiuk di bhapbini dalam bản dak harei dak tagok ngan saong dom baok sang tôn bhong praong siam hu padang tagok. Dom pandap trak jien hu mikva blei duh ka mbang ngui yaok harei ye : tivi, tủ la ar, radaih patuh dak aharei dak rilo. Akaok bản Triệu Văn Chung brei thau : Meng dom bruk ngak hu, bruk ba tbaiak di thun 2017 bản peih praong tea saong rilo meng lac phun mbang baok, salih barau phun pala. Daok bruk daong ye oh ka hu sa công ty halei dang tabiak daong mikva pala tea, rilo meng lac mikva pala eng. Hu sa công ty min tok blei tea di mikva jeng oh ka pabak ginup caong khin. Dahlak caong khin hu sarak halei nan piah daong ka mikva khak drak jeng ye phun pajaih.

     Mikva urang Dao di Suối Khem bui sambai jang kayua raidiuk dak harei dak ginup meda. Nan lac pren khang pachreih yaok urang di ini dak harei dak jum pataom gauk, dak apdang bản siam mekre, bui sambai./.