Bhian randap oh klak hu, page halei, ong Trần Minh Trí daok di quận Phú Nhuận, ban raya Ho Chi Minh menyum sa ly caphe saong sa cavar ia te saong ayut sahabat blaoh meng thi ngak hagait blaoh ngak. Menyum caphe yaok pluh thun ini mai, min ayut sahabat jeng yau ong oh thei thau lac caphe biak atau ja. Saong takik urang caik hatai tal caphe drei menyum yaok harei nyu mai meng halei. Ong Trí lac:

 "Ngak habar thau lac caphe biak atau ja. Dahlak bhian menyum caphe rah jalan. Bhian urang lac caphe tamo ye dahlak menyum oh thau nyu tamo atau oh, tuk halei urang jeng ngak meluh. Yaom lac caphe chai anak meta min oh thau asar caphe baik atau oh. Menyum daok menyum, kayua bhian randap page mai menyum caphe."

Caphe nan lac ndap menyum hu ralo urang likei atau kumei di ban raya takre. Di Ban raya Ho Chi Minh, caphe daok ala, caphe jalan hu ralo urang takre. Meng quan tabika jalan atau bein bingu, urang mbuan duah hu rilo caphe pablei lap  meng 5.000 tal 15.000 đồng. Birau ini, mboh hu caphe ba nao, caphe dạo, jhul radaih. Urang pablei brei hu sasruh radaih patuh atau radaih juah saong sa thùng ia patau, caphe juk hlai blaoh padang bing praong tuk hu manuac blei ye tuh tabiak ly sit, buh hasit saradang, atau hasit ia tasau limo, tawai buh ia khar ia patau labaih 2 minit hu sa ly caphe. Yau nan min ngak habar thau lac caphe meluh, hagait dalam nan. Ralo urang menyum oh hu tukvak piah pasang iek caphe mai meng halei, siam halei oh, yau nan ye menyu nao maik tui randap jeng yau ong Trí angok nan.

Jiak abih langiu kanduh ao papaok caphe meluh, jru mek nan hu dom cih vak lac pandap caphe siam tamo. Min hu hadom caphe oh hu brei thau cambaic laic, mai meng halei saong dom asar hagait karei hu buh tame kadauk thit.Amuk Phạm Thị Phương, po quan caphe tapen jalan di phuong Bình Trưng Tây, quận 2, Ban raya Ho Chi Minh klhan lac bhian blei caphe di darak, atau urang ba mai pablei tui rilo yaom, meng 40 ribau tal 150 ribau đồng sa kilo. Quan amuk Phương blei caphe yaom meng 90 tal 120 ribau đồng. Amuk lac oh hu angan je, min dom janih caphe ini pahe, menyum bingi, urang blei menyum oh thei lac hagait ye amuk blei tame suai lavik. Amuk Phương lac:

 "Dahlak blei caphe di darak, dahlak saong tuai damuai mai menyum randap ye dahlak blei tame janih ini. Urang menyum mboh bingi, dahlak menyum jeng mboh bingi. Drei blei pak di darak nan randap paje dahlak nao nan blei."

Tui roh duah birau ini di Kapul tanut chuẩn saong khik caga urang blei Viet Nam (Vinatas) di 4 tỉnh, ban raya brei mboh, jaik meteh mẫu caphe hu duk iek hu baik takik caphe, ala 1 gam dalam sa lit. Abih di nyu, hu 5 mẫu oh hasit caphe halei. Ini lac thông tin ngak having akaok ngan saong dom urang takre menyum caphe. Caphe oh hu caphe, yau nan urang pablei saong urang menyum nan lac hagait? Adit kreh bilan 7 tapa, kapul urang thanh tra dom gah Ban raya Ho Chi Minh saong dom jabat chức năng tame pasang iek saong duah mboh dom labik hana caphe di quận Bình Tân saong huyện Bình Chánh. Dom cơ sở ngak caphe nan meluh ratak đậu nành saong ia mesir, gam rilo hương liệu, phẩm màu piah ngak caphe. Langiu di nan, dom labik nan daok taduan ngak pandap caphe meluh pablei ka rilo labik, yaom biak lap: 1.500 đồng sa kilo. Thei dang tabiak khik caga prein yawa ka urang menyum dom janih caphe yau ini.

Anak dom khaw tin ka pandap oh hacih sa-at, dalam nan hu caphe, urang menyum haduh hatai anak bruk oh siam ka prein yawa. Ong Trần Văn Hai, daok di quận Tân Bình, Ban raya Ho Chi Minh brei thau, di darak pasar hu rilo janih caphe yaom pablei karei di gauk, min ka thau pandap biak atau ja. Lac urang takre caphe  yau nan ye ong Hai duah blei caphe hu angan je saong thau cambaic laic mai meng halei piah menyum. Ong Trần Văn Hai lac:

 "Pang mehit lac hlai tamne caphe yau tangei, đậu nành, jru hóa chất…Huac ruak lo oh khin menyum. Mehit urang lac rilo yau nen ye oh khin menyum, dahlak ba caphe mai meng palei tok sahanang hatai. Ly caphe oh hu hadom bo menyum ba ruak tame rup luac rai."

Urak ini, urang menyum caphe baik kan thau lac caphe ja atau biak saong dom kanjiak ka prein yawa. Yau nan ye, dom jabat khik iek di Karja saong jabat chuyen mon njauk tame ngak bruk piah duah thau, duk iek asar pandap, daong urang blei pandar palih ruah caphe hacih. Jeng yau, pakhang bruk taong phạt dom labik ngak caphe ja, caphe meluh piah khik caga prein yawa urang pandar. Amuk Lê Thị Tám daok di quận Bình Tân lac:

"Hu Jabat chức năng daong saong pasang iek thei ngak caphe ja. Urang nao ngak mbang apah bo menyum gaok caphe ja tamuh ruak, mboh anit ka urang”

Caong khin di amuk Lê Thị Tám jeng lac dom sahaneng caong khin di urang blei pandar khin menyum pandap caphe hacih sa-at, pandap menyum bhian randap oh kurang hu di yaok urang daok di meraong negar./.