Pathau mikva saong taong abih gauk! Mbiak capi tính pambuak saong rai diuk di bhap bini bangsa Thái daok di Tây Bắc. Rilo thun tapa, nghệ nhân Điêu Chính Lả daok di bản Nghe Toỏng kham merat ngak saong pato pandar capi tính. Ngan saong ong, mbiak capi tính lac ayut sahabat piah klah rabha dom bui sambai jang yau bruk duh hatai dalam rai diuk. Kadha vak di Nguyễn Trang, urang pambuak bruk saong rayo sap ndom VN ndom ka ong:

Thun 1973, ong Điêu Chính Lả (xã Mường Giàng, huyện Quỳnh Nhai, tỉnh Sơn La) hu ngak dom mbiak capi tính akaok meti. Tal urak ini, ong ngak hu labaih 1.500 mbiak capi. Piah ngak hu mbiak capi, camereip abih lac palih ruah dom baoh kadoh mbiah mbiah, kuah hacih gah dalam bloh pambu thu dalam dom harei. Bầu đàn paluh 4 gilaong piah khik âm ka nyu samu gauk. Mbaok capi paluh 5 gilaong sit, hu ngak meng phun vông. Cần capi ngak meng kayau phun hoa sữa hu ngak ka nyu jangaih. Khóa capi pandar kayau phun hoa sữa piah khóa capi, tuk tagok talei capi ka sap nyu chuẩn abih. 

Nghệ nhân Điêu Chính Lả brei thau: “Dahlau daih, mbiak tính tẩu urang ngak akaok tapak oh mbeik cong yau urak ini, min tui darak pasar urak ini mbiak capi brei mekre, nan ye dahlak meng cải biên”. Umo jaik 60 thun, bruk bo ong Lả duh hatai nan lac oh ka hu thei dalam bhum ngak hu mbiak capi tính hu sap mbak carak ilamu Thái yau ong daok ngak. Ong kham merat pato veik ka dam dara dalam palei dom ilamu ngak saong me-in capi. Saai Hoàng Văn Duy, daok di bản Nghe Toỏng, lac: Tuk halei lahe dahlak jeng tapa labik ong piah bac megru, duah thau bruk ngak capi yau habar”.    

Oh lac pato ka dam dara dalam palei, ong daok pato capi tính ka dom urang di gah ilamu tỉnh Sơn La tapa dom mbang pasram megru. Tui ong, sa urang ngak capi naih, langiu tangin gheih daok brei hu hatai thau cảm thụ âm nhạc. Ong tacei pato cambaih ka urang bac yaok công đoạn chế tác saong angan ieu di yaok bộ phận angaok mbiak capi tính.  

Meng mbaik capi ini, ong mek hu ralo giải thưởng, yau giải A Harei pataom daoh then – capi tính dom bangsa Tày, Nùng, Thái Việt Nam mbang ka V di Tuyên Quang thun 2015; giải khuyến khích mbang pakacah thiết kế mẫu hàng lưu niệm saong pandap alin du lịch Sơn La dom thun 2011, 2016...Ong hu akaok negar pok brei angan Nghệ nhân ưu tú kayua ngak hu rilo kadha praong dalam bruk khik ramik saong patagok inem krung ilamu di bangsa VN./.