Bruk menyim khan bai di palei Phủm Soài, xã Châu Phong, ban sit Tân Châu, t. An Giang

Duk saong dom bruk ngak karei, meda lac jien duah hu meng palei ngak meng kan oh samu, min tuk mehit dom urang dalam palei ngak  brei thau, meng mboh lac khik bruk ngak meng kan di ong amuk amaik ame caik veik nan lac bruk biak hadah mbaok meta.

Dahlau daih, palei Phủm Soài (xã Châu Phong, ban sit Tân Châu, t. An Giang) lac labik hu rilo sang tui bruk menyim khan bai meng kan di mikva bangsa Cam. Min tui thun bilan, bruk menyim daok takik nao saong urak ini daok hu dom sang menyim min.

Yau nan bo nao bac saong nao ngak bruk di negar lingiu yau sa-ai Saphynah (anek kumei taluac di ong Mohamad – po labik menyim khan bai Cam Mohamad) khang hatai mai veik palei piah cakrok bruk ngak meng kan haong sang drei.

Sa-ai Saphynah lac: “Dahlau daih amaik ame biak glaih kayua ngak taong abih meng tangin takai min jien duah hu biak takik, kan pablei nan ye drei oh khin tui bruk ini. Min hadei di dom mbang mai ravang sang, hu taom gaok, ndom biai nao mai, hu yaih khan dom pandap menyim meng kan brei ka ayut sahabat, ka tuai dalam saong langiu taneh ia thau, drei mboh hu hatai sahneng karei. Tuk ini, drei mboh lac njauk patui bruk ngak di ong muk, amaik ame, rik daong haong puk palei khik ramik bruk ngak meng kan di bangsa”.

Urak ini, dom kik menyim hu caik di sang bhap bini piah urang menyim mbang pah, daok veik hu caik di cơ sở piah menyim brei tuai iek tuk urang mai ravang me-in. Sa-ai Saphynah khan lac, tuai damuai – abih di  nyu lac tuai taneh ia lingiu urang biak takre dom pandap hu ngak meng tangin takai.

Menek tabiak saong praong tagok di palei gai puh bông sậy Cồn sit (xã Phú Bình, huyện Phú Tân, t.An Giang), urang likei dam angan Nguyễn Ngọc Nhân hu pilih ruah bruk ngak di palei drei piah padang mbang ngui. Ngọc Nhân urak ini lac pô sa cơ sở bahrau, ba bruk ngak ka 20 urang ngak saong ba pandap ka urang ngak gai puh di sang, yaok harei pablei tabiak darak pasar meng 1.000-2.000 mbaik gai puh.

Daok ayut Trần Hoa Ni (Bí thư xã đoàn Phú Bình, Phú Tân) hu kak kajap haong bruk ngak gai puh di sang drei. Hu 2 thun gam, palei ngak gai puh hu raok anek saih mai maong iek, duah thau, Hoa Ni lac menuac dang tabiak peih bruk, da-a dom urang ngak gai puh naih joi lavik thun tacei pato dom adei ngak.

Hoa Ni ndom lac hu ngak yau nan meng hu makna ka 2 gah, meyah anak tal daok khik bruk ini, ayut abih hatai daong brei. Dom ayut jeng brei thau dom hatai caong piah ka dam dara, anek saih hu hatai anit puk paga, anit bruk ngak meng kan caik veik, hu rilo jalan lagaih jang atau yaih khan dom urang jak jeng haong bruk ngak meng kan piah ka dom ayut hu bruk pilih ruah ka nyu lagaih.

Bruk “duah thau palei ngak” lac sa dalam dom bruk siam gheih dalam bilan hè ba mai bui sambai ka abih urang đoàn, anek saih saong dom nghệ nhân. Ini lac danak dak hu Huyện đoàn Phú Tân, tỉnh An Giang peih ngak yaok thun dalam tuk padeih hè piah pato pakai urang đoàn, dam dara, anek saih duah thau ka dom palei ngak meng kan, khik hu hatai caong khik ramik ilamu mekre di puk palei.

Di yaok labik nao tapa, kadha dom adei bac hu oh lac hu maong iek, hu ba tangin tame ngak… Praong jang hadei di yaok mbang taom gaok haong bhap bini palei ngak, lac dom adei mboh takre dom pandap meng kan, takre bruk ngak lavik rai di palei saong ba gauk daong khik ramik, patagok.

Nghệ nhân Nguyễn Thanh Hòa daok di palei “tranh kiếng” xã Long Điền B (Chợ Mới, An Giang) biak bui sambai tuk hu taduan raok 67 adei anek saih meng huyện Phú Tân mai ravang iek.

Dom menuac ngak dalam xưởng hu daong ka ong kuhria caga pandap mẫu, sambo màu kim tuyến, keo, .labik daok….meng biak aval piah ka tuai cih rup cih. Taong abih rup cih ngak iek nan hu alin brei dom adei ba nao sang ngak pandap lưu niệm piah yaih khan brei ayut sahabat saong gauk gar thau. Yaom lac rilo meng daok di palei pala min rilo anek saih oh ka thau tal angan “tranh kiếng”, oh sahneng lac bruk ngak nan nyu abih rilo tukvak, prein yava saong tani tanat yau nan. Kayua yau nan ye, tuk hu nghệ nhân yaih khan, tacei pato cih sambo màu angaok bản mẫu, dom adei mboh biak takre.

Di palei ngak gai puh Phú Bình (Phú Tân), anek saih jeng hu peih bruk brei ngak dreih yau nan, lac pang yaih khan ka palei ngak, dom pandap piah ngak, jalan ngak jeng sa mbaik gai puh, darak pasar pablei urak ini saong dom adei hu papaok iek gai puh.

Lac sa dalam takik bruk ngak meng kan daok tagok khang, palei ngak gai puh bông sậy daok patuah jang tuk hu rilo urang daok ranaih umo daok tui ngak saong hu labik pablei mbuan lagaih.

Meng kein laba mek hu, yaok thun Huyện đoàn Phú Tân khik ramik bruk ngak ini, peih bruk brei ka dom adei nao ravang iek palei ngak meng kan daok dalam saong langiu huyện yau palei rèn Phú Mỹ, palei ging haluk Phú Thọ, palei gai puh Phú Bình, palei tranh kiếng Chợ Mới...

Tui bruk saong patagok palei ngak meng kan dalam saman ini lac sa cuang kandah. Kayua jaik abih dom pandap meng kan jeng duh ka sa binah tuai halei min, atau piah ravang iek, duah thau du lịch. Min ngan saong dom ayut daok ranaih umo, abih di nyu lac dom urang anek hu menek tabiak, praong tagok pak di palei ngak, bruk khik ramik bruk ngak gam lac bruk njauk ngak, gam lac bruk hadah mbaok meta./.

Urang lang: M. Phương – 30/08