Công ty Thổ cẩm kayua amuk ngak yam ndok, ba bruk dom urang kumei kathaot duah hu jien tani tanat

Amuk Thuận Thị Trụ menek tabiak saong praong tagok di palei Mỹ Nghiệp, ban sit Phước Dân, huyện Ninh Phước, tỉnh Ninh Thuận. Ngan saong amuk, menyim khan bai lac bruk “amaik patoa ka anek”. Yau dom kumei dara Cam karei karei, meng tuk daok sit, amuk hu megru menyim meng amuk saong amaik di drei. Tuk umo 14-15 thun, amuk menyim hu blah khan piah jhik khan ao ka drei.

Dahlau daih, khan bai di urang Cam piah jhik khan ao saong piah pandar dalam bruk ngak adat dalam palei. Jalan ba amuk tal bruk ngak khan bai lac dalam sa mbang taom gaok dom tuai du lịch meng negar lingiu mai, hu ndom biai nao mai haong urang, amuk meng thau lac urang biak takre khan bai Việt Nam.

Thun 1992 hu maong lac thun diuk veik di bruk menyim khan bai palei Mỹ Nghiệp, tuk cơ sở menyim khan bai Cam di nghệ nhân Thuận Thị Trụ hu padang tagok. Bloh tal thun 2000, Công ty Thổ cẩm Inrahani tabiak rai kayua amuk ngak yam ndok, ba bruk ngak ka 200 urang kumei kathaot duah hu jien tani tanat. Urak ini Công ty daok ngak labaih 300 janih pandap meng khan baim yau ye: bóp, kadung bak, balô, khan ao, drap lagaih haong tuai damuai praong sit, taha meda.

Oh lac ba akaok nao dahlau dalam bruk patagok veik bruk menyim khan bai dalam palei, amuk Thuận Thị Trụ daok lac urang buh prein tabiak duah pataom hu labaih 30 bingu la di khan bai Cam klak daok mbuan si lahik nao saong tui nan amuk ngak hu 50 bingu la karei. Urak ini, khan bai angan Inrahani oh lac dang hu di darak pasar dalam negar, bo daok hu rilo taneh ia angaok dunya thau tal tapa dom mbang nyaom darak pasar parang iek praong di Thụy Sĩ, Pháp, Bỉ, Nhật Bản, Singapore, Malaysia…

4 Huy chương ameh nyaom darak parang iek dalam taneh ia brei ka dom pandap di Công ty khan bai Inrahani, abih di nyu lac Plak tangin ameh kayua Liên minh Hợp tác xã Việt Nam pok brei lac brei mboh ka bruk naih gheih saong kham merat oh thau glaih glar di urang kumei Cam ini.

Lingiu di bruk naih gheih dalam ngak mbang, pablei salih, amuk Thuận Thị Trụ daok hu sap daoh bingi pang saong daok lac urang tamia gheih hu angan dalam bhum. Amuk jeng hu ngak rilo bruk xã hội daong ka puk palei, ka bhap bini Cam yau ye dom bruk: alin hadiah tapuk ka gilang tapuk, alin pandap meyaom ka anek saih, daong jien ka urang jaoh jo, daong bruk blac raih meta ka urang taha di huyện Ninh Phước…. Abih di nyu nan lac, nghệ nhân Thuận Thị Trụ daok hu daong padang jalan pabak ia hacih saong sang mẫu giáo ka mikva palei Cam Mỹ Nghiệp, huyện Ninh Phước, tỉnh Ninh Thuận./.

(Urang lang : M.Phương – 29/03)