Viet Nam samar pacang hu jit ruak Covid-19, hu dunya taong yaom glong, caik veik rilo siam mekre dalam hatai bhap bini, hu bhap bini jia tame bruk pan akaok ba jalan di Đảng, bruk tacei ba haong dom sarak njauk lagaih di Quoc hoi, Rajaei. Yaom lac yau nan, min bruk peih ngak sarak daong doanh nghiep saong bhap bini gaok kan kandah kayua jit Covid-19 jeng daok suai damuai. Dom urang Quoc hoi caong khin brei ngak cambaic laic tavak tavaiy di albik halei piah samar lang talaih, daong ka dom urang ngak oh hu jien bilan dalam tuk jit ruak Covid -19 hu taduan jien daong, trun meneing kan kandah dalam raidiuk. Ong Phạm Văn Hòa, urang di Kapol Quoc hoi tỉnh Đồng Tháp sahaneng lac dom doanh nghiệp, karja palei brei pambuak bruk khang kajap, padang angan dom urang ngak njauk tui adat ba tabiak piah daong ka sumu:“Jien dalam gilang pariak hu ye, daok cang harak angan hu mbaoh tangin lac brei jien tapak ka urang ngak. Radiuk di urang ngak daok gaok kan kandah bo oh ka taduan hu jien daong, dahlak mboh ini lac sa bruk bo khol drei brei pasang iek veik.”

Jeng hu hatai sahaneng yau nan, amuk Đỗ Thị Lan, urang Kapol Quoc hoi tỉnh Quảng Ninh lac, bruk suai damuai kayua doanh nghiep oh brei thau ginup dom asar kadha jeng yau makna piah urang ngak hu mbang tui. Amuk Đỗ Thị Lan daok brei thau lac, urang ngak jeng brei thau dom sarak bo drei hu mbang tui piah pambuak siam saong urang po pah ngak bruk khan brei cambaic laic. Langiu di nan, jeng hu dom doanh nghiep hu jien daong ka urang nan ye khin dui atah bruk daong piah plaih urang padeih bruk, khin khik takai urang daok veik ngak bruk…Kayua yau nan ye, urang ngak taduan mbang tui sarak oh hu rilo:“Tui dahlak, dahlau di abih njuak pasang iek veik dom tacei pato piah ngak dom sarak daong hu salih birau halei oh, ngak hu lagaih ha-oh piah dom jabat pambuak tal  pathau khan jeng yau urang ngak taom hu sarak halei oh. Ka dua, lac dom jabat khik iek di Karja saong dom jabat pambuak tal brei kham merat jang dalam bruk lang talaih dom kan kandah saong ba drei tame bruk padang angan saong abih di nyu lac duah thau tapak piah padang angan dom urang hu mbang tui hu samar drah di abih, langah sarak daong ka urang ngak hu siam di abih.”

Piah langyah hu dom bruk nan, Akok mentri Lao động Thương binh saong  Xã hội Đào Ngọc Dung brei thau: “ Urak ini, Rajaei jao ka Gilang pariak karja Viet Nam ramik veik cơ chế. Rajaei hu jao blaoh. Gilang pariak dang tabiak pambuak bruk brei pasiam veik dom tanut piah urang ngak saong doanh nghiep hu mbuan lagaih jang dalam bruk mesre dom paok jien daong brei mesre.

Yau nan, bruk pasiam veik dom tieu chi lac bruk njauk ngak piah sumu  daong ka urang ngak min brei daong njauk manuac, njauk urang, cambiac laic; tui iek tani tanat saong oh caik rah tabiak bruk urang pambak pagam tame sarak piah duah kein laba ka rup drei./.

Urang lang: Aí Nghiêm - 17/6/2020