Nao ravang xã Phước Nam,  huyện Thuận Nam dalam dom harei bilan 3 ini, kol dahlak hu mboh di anak meta bruk chreih chrai dalam tuk ngak bruk di kapul dam dara pak ini. Yaom lac langik pandiak khang, ia hauk tabiak pathah ao min dom urang dam dam dara jeng halan hatian gam saong bhapbini palei Văn Lâm 1 tuh haluk, tuh be tong jalan tame palei atah 150m. Dom bruk ini piah sumu tukvak ngak blaoh bruk dam dara di bilan 3 ini. Ini lac bruk tuh be tong jalan tame palei yaka 4 kayua urang doan, dam dara xã Phước Nam dang tabiak ngak. Thun 2013, dam dara huyện Thuận Nam halan hatiani rik daong jiak 100 harei ngak bruk gam saong bhapbini Cam di 3 palei Nho Lâm, Văn Lâm 1 saong 2 peih bruk tuh bê tông jaik 1.000 mét jalan nao mai di palei; daong ngak ka jalan nao mai di palei pala xã Phước Nam hu laneng lanoi, daong ka mikva urang nong mbuan lagaih dalam bruk pablei salih, cakrok kinh te baoh sang.

Gam saong bruk pakhang pasiam jalan nao mai di palei, bruk khik ramik pasiam jalan, tatua, cong, khik caga siam mekre ka bruk nao mai, abih di nyu nan lac dalam bilan hajan ribuk jeng hu dam dara xã Phước Nam pataom tame ngak siam. Saai Phạm Thông, Phó bí thư xã Đoàn Phước Nam, huyện Thuận Nam brei thau : “Barau ini, dalam taong abih dom tieu chi padang ngak palei pala barau, urang doan, dam dara sangka dahlau di abih lac bruk tuh be tong jalan nao mai. Meng bruk nan, urang doan dam dara halan hatian gam saong palei rik daong pren yava ngak dom canah jalan. Tapa tukvak ba tabiak bruk ka urang doan dam dara dalam xa pataom tame ngak, mboh ba ngak hu siam lagaih. Dahlau di abih nan lac ba mai kein laba ka bhapbini jeng ye puk palei, rik  daong ka bruk padang ngak palei pala barau, dua tra veik lac ngak blaoh blai dom canah jalan piah ka mikva hu raidiuk siam mekre jang” 

Tukvak tapa, pachreih tui bruk padang ngak palei pala barau, rilo urang doan, dam dara di dom puk palei dalam huyen Thuan Nam pataom tame ngak rilo bruk kayua huyen doan ba tabiak yau : ramik pasiam 2,3 km jalan nao mai di palei pala, tuh pasamu labaih 60 mét haluk, kuac 1.500 mét kraong, ribong nội đồng ; Khik caga moi truong hajao, hacih saat, gheih mekre, cakrok kinh te, paglaong bruk ilimo saong khik caga an ninh trat tu di palei pala…Dalam nan, bruk pataom tame tuh be tong jalan nao mai di palei pala, kuac ribong, kraong noi dong mek hu rilo kein laba, rik daong ba mai ia mbaok barau ka palei pala, abih di nyu nan lac dom bhum atah, bayah. Saai Nguyễn Thiện Quang – Bí thư huyện đoàn Thuận Nam, tỉnh Ninh Thuận brei thau : “Thau lac bruk negar padang ngak palei pala barau nan lac Danakdak praong, nao dahlau, meng tuk huyen ba tabiak ye mban thuong vu huyen doan hu ba tabiak khan brei taong abih urang doan, dam dara dalam huyen thau,  dalam nan sangka tak bruk pathau khan jak ba, dahlau di abih lac urang doan, dam dara pachreih tui bruk padang ngak palei pala barau, ba gauk peih ngak dom Danakdak  bruk ngak di dam dara padang ngak palei pala barau, pagap yau bruk pataom mbaok rik pren yava ngak jalan nao mai di palei pala, ribaong kraong noi dong, ngak hacih saat môi trường…”

Meng hatai chreih chrai ba akaok nao dahlau di urang doan, dam dara huyen Thuan Nam hu ba tangin tame saong bhapbini padang ngak palei pala barau saong meng pren yava dam dara nan, nyu pambak khang tal bol bhap rahra, ngak brei salih barau praong dalam akaok sahaneng di bhapbini puk palei ka bruk pataom tame padang ngak palei pala barau./.

Thúy Linh