Nyaom roya hu peih ngak biak prong prang dalam dom harei tapa 

  Amuk Lê Thị Kim Thu, Akaok Kapul urang kamei tỉnh Bà Rịa - Vũng Tàu, urang dalam Kapul tỉnh Bà Rịa – Vũng Tàu mbang akaok meti hu mbaok dalam Nyaom roya mbang 13 brei thau, Harak pathau khan chính trị mbang ini taong yaom ginup abih dom gah bo Việt Nam ngak hu saong jeng tacei tabiak dom tavak tavaiy, labaih kurang, kayua yau nan ye caong khin lac Nyaom roya meda ginum biai, ba tabiak dom sarak ka nyu njauk, daong ka taneh aia cak rok patagok. Ndom ka bruk menuac ngak, amuk Lê Thị Kim Thu caong khin hu bruk salih bahrau gah  jalan ngak, piah palih ruah hu dom urang naih gheih di abih:

Dahlak jeng yau dom urang jakar, urang Đảng saong bhap bani tỉnh Bà Rịa-Vũng Tàu biak caong khin saong caik rilo hatai jia, Nyaom roya meda palih ruah tabiak dom urang jakar dalam mbang bahrau lac dom urang siam hatung hatai, hu ilamu ngak bruk, hu angan je saong abih drei ka taneh aia, ka bhap bani piah daong ba Việt Nam dak harei dak cak rok patagok.

Gam haong bruk hadah mbaok metai mbang akaok meti hu mbaok di Nyaom roya Đảng pakat negar, sa-ai Hoàng Thị Thanh Thuý, Bí thư Tỉnh đoàn Tây Ninh, kapul urang lambaok tỉnh Tây Ninh brei thau, hu mbaok dalam bruk prong di taneh aia, sa-ai meda hu panuac brei thau dom caong khin, hatai saneng di dam dara Tây Ninh tal nyaom Roya. Hadei di Nyaom roya, sa-ai haong dom urang lambaok meda brei thau veik ginup abih ka Nyaom roya, dom sarak, dom asal kadha… piah daong ngak brei jayak Sarak di Nyaom roya. Abih di nyu lac, sa-ai Thanh Thuý caong khin Nyaom roya mbang ini daok tui bruk salih bahrau taong abih gah di taneh aia:

Meyah thun 1986 lac thun Nyaom roya Đảng di bruk salih bahrau, ye drei caong khin Nyaom roya mbang ini jeng daok lac Nyaom roya di salih bahrau min ba taneh aia  tapa vaktu bahrau, nan lac vaktu mbeik drei yam tame prong dalam jang haong dunya. Nyu lac dua vaktu prong saong drei caong khin rilo di abih tame bruk salih bahrau di Nyaom roya mbang ini.

Ninh Thuận lac sa dalam 3 tỉnh hu bruk cak rok patagok glaong abih thun 2020 ngan haong GRDP mek hu 12,17%. Thun blaoh, tỉnh ngak hu 14 dalam 15 bruk hu ba tabiak. Ngan haong jalan cak rok yau nan, kapul urang lambaok tỉnh Ninh Thuận tame Nyaom roya Đảng pakat negar mbang ka 13 caong khin Nyaom roya meda palih ruah tabiak dom urang hu angan je, hu hatai siam, ngak bruk naih jioy piah patui jalan ba taneh aia cak rok patagok dalam tukvak anak tal. Ong Trần Minh Nam, Akaok ban Tuyên giáo Tỉnh uỷ Ninh Thuận, sa dalam 17 urang hu mbaok di Nyaom roya caong khin jalan cak rok kinh tế taneh aia meng 6,8% yaok thun di mbang dahlau tagok 7% di mbang ini, jien mek tame kuhria tui akaok manuac hu patagok, meng 2.800 USD sa urang sa thun di mbang dahlau tagok 5.000 USD sa urang sa thun di mbang patui veik… Saong meyah caong khin mek hu yau nan, ye oh hu jalan halei karei nan lac njauk pandar ka nyu siam bruk cách mạng công nghiệp mbang ka 4:

Dahlak caong khin tapa Nyaom roya mbang ini, Đảng hu ba tabiak dom bruk ngak saong jalan ngak siam di abih, ngak habar khik hu taong abih quyền ngak po bhum taneh; an ninh chính trị njauk khik kajap;pacang caga biến đổi khí hậu biak siam... Khaol drei njauk pandar ka nyu siam bruk cách mạng công nghiệp mbang ka 4, ba taneh aia jeng negar hu bruk ngak công cak rok patagok bahrau.

Meng hadah mbaok meta hu mbaok dalam nyaom roya saong meng bruk njauk ngak di drei, dom urang dalam Nyaom roya Đảng mbang 13 kham merat abih drei, ngak hu dom danak dak bo Nyaom roya ba tabiak, njauk haong hatai jia bo dom rai urang đảng, bhap bani jao brei./.

Urang lang : Jasi -28/1