Aih caraoh ieu lac sa janih ruak bhian rah tabiak rilo, min oh njauk thei jeng thau lac nyu meda mbak meng urang ini tapa urang diah, patui tame makna ngak jeng ruak. Thau tan tu tani tanat ka bruk njom mbak di ruak aih caraoh lac biak hu makna piah paccang caga khik prein yava bol bhap rahra.

Aih caraoh meda hu asal karei gauk, dalam nan kayua njom virus, anek ruak, halak haling atau srau dau dalam jalan tung pruac kayua njom nerak. Dalam nan, aih caraoh kayua njom nerak bhian meda ngak njom mbak ralo:

Virus: Norovirus saong rotavirus ieu lac dua janih virus bhian ngak ka aih caraoh saong biak mbuan njom mbak praong. Nyu meda pambak meng urang ini tapa urang diah, ralo abih di nyu hu lac dalam labik hu rilo manuac urang yau ye di sang bac, sang payua iek uranaih saong gilai haok radaih jirah rivang.

Anek ruak: Dom anek ruak yau ye E. coli saong Salmonella bhian pambak tapa ndap kaya mbang atau ia menyum njom nerak tachauk. Bruk langyah pandap mbang oh njauk lagaih atau bruk ngak pahacaih sa-at oh siam meda ba tal bruk njom mbak di dom anek ruak ini.

Aih caraoh jeng meda kayua meng halak haling ndam dalam rup ngak tabiak saong pambak tapa ia menyum atau ndap mbang njom nerak tachauk.

Karei ini nan, aih caraoh mãn tính bhian lavik hu pambuak tal dom ruak dalam tung hatian pruac srau dau, ruak barah baong hatian tung pruac atau ruak eliac bhian oh mbak.

Aih caraoh kayua njom nerak bhian mbak tapa jalan nao aih atau tapa pabah. Bruk ini rah tabiak tuk anek ruak, virus atau halak haling meng khak iah di urang ruak mbak tame pabah di urang karei tapa jalan: Guk gaok gauk tapak; Mek tangin atau gaok tame urang ruak blaoh oh rao tangin hadei di nan; Gaok oh tapak; Gaok tame dom pandap daok hu anek ruak ndam, blaoh ba tangin tagok gaoh pabah; Pandap mbang saong ia menyum njom nerak. Mbang dom ndap mbang saong ia menyum hu anek ruak dalam nan.

Tukvak sa urang meda njom ruak ka urang karei tui tame bruk ngak jeng ruak. Tukvak pa-auk pabam ruak: meng 1-7 harei, kuhria rah meng tuk virus njom tame rup pabhap.

Tukvak njom mbak: Dom bruk brei mboh di ruak aih caraoh nyu mai biak katuak. Tukvak njom mbak meda dui atah tal 3 adit, min bhian labaih 7-8 harei kuhria meng tuk bahrau tamuh ruak.

Piah kurang hu bruk mbuan njom ruak aih caraoh, brei ngak tui dom bruk yau ye:

Bhian rao tangin: Pandar sabon saong ia hacih piah rao tangin hadei tuk nao njuel drei, dahlau tuk mbang saong hadei tuk gaok urang ruak.

Pahacih sa-at ndap mbang: Tanek tathak tani tanat ndap mbang, rao hacih sa-at njam patam baoh karaoh saong plaih bruk mbang dom pandap mbang daok metah atau oh tathak brei ka tani tanat.

Pandar ia hacih sa-at: Khik kajap ia menyum saong ia pandar yaok harei brei ka hacih sa-at saong khik piah brei siam.

Pahacih sa-at labik daok: pahacih sa-at saong pametai anek ruak dom pandap drei bhian gaok, abih di nyu nan lac dalam baoh sang hu urang ruak.

Ruak aih caraoh meda njom mbak, njauk biak di nyu mai meng bruk njom nerak tachauk tame rup. Bruk thau tani tanat tantu ka dom makna ngak jeng ruak saong bruk njom mbak ruak daong ka khol drei pandar dom jalan pacang caga siam lagaih, pacang khik rup drei saong bol bhap rahra plaih caga truh di bruk mbuan gaok njom mbak ruak./.