Lahik ia lac makna ba tal mebuk pandiak di bilan hè pandiak, pa-uh. Rup pabap brei hu ginup ia piah ngak bruk siam. Piah pacang lahik ia, mebuk pandiak, brei hadar menyum ginup ia, jhui cang tal tuk mahu ia meng manyum. Min tok menyum ia la-an saoh lac oh ginup kayua bilan pandiak, ia hauk tabiak rilo tapa ngak bruk di labik pandiak, nan ye siam di abih brei menyum ia lai mbrang sara - saradang (oresol) piah gam pabak ia, gam pabak điện giải lahik nao tui ia hauk.

Pabak ia oresol biak lap, biak lagaih, 1 paok oresol meda lai hu sa lit ia, ba tui menyum tuk tabiak gah langiu, biak siam piah pacang srau kadau điện giải, lahik ia tapa ia hauk. Yaok harei, urang praong njauk menyum pabak meng 2 tal 3 lít ia atau rilo jang meyah langik pandiak khang tuk nao tabiak gah langiu atau ngak bruk di mala langik pandiak.

Dalam labik pandiak pa-uh, tabiak ia hauk rilo, langiu di bruk menyum ia la-an, brei pabak ia karei daong ka rup ginup ia. Dom janih ia baoh kayau siam ka rup pabhap dalam bilan pandiak lac: Ia iak baoh tamun ia, tamekai, dưa lê, pa-ok, ia bạc hà, ia iak cần tây, dom janih ratak v.v… Taphia dom janih ia meng langik tasik, ia trun pandiak eng drei riak, ngak, angaok darak pasar daok hu rilo janih ia tame klaok hu prein pabak ia, pabak điện giải, siro pabak ia...

Min dom janih ia tame klaok blaoh bhian hu rilo saradang, hu dom chất bảo quản meyah menyum rilo oh siam ka prein yava. Tuk menyum, kol drei brei caik hatai sangka tal labik ngak nyu, tukvak pandar, hàm lượng saradang, chất bảo quản… plaih blei njauk dom janih ia oh thau asal di nyu, meda ngak brei njauk jru mek. Langiu di nan, piah pacang plaih mebuk pandiak, njauk ngak bruk di tuk langik lahơi.

Dom harei langik pandiak glaong, njauk rami ramik mon ngak bruk tuk langik lahơi, brei ka urang ngak dom bruk hanjul jang, takik tabiak ngak bruk di langiu langik. Oh ngak bruk tapa prein, oh ngak bruk biak lavik ala langik pandiak atau ngak bruk dalam labik pandiak khang, plaih ngak dom bruk trak tapa prein.

Hadei di 45 minit atau sa mon ngak bruk di labik pandiak pa-uh, njauk daok la padeih padei di labik la-an lahơi meng 10 – 15 minit. Tapa nan nyu daong pabak veik prein khang piah ngak bruk hu siam. Tuk halei jeng caga ka urang ngak hu ginup dom pandap pacang pandiak tuk ngak bruk langiu langik pandiak yau ye khan ao bảo hộ lao động, tamo praong jhih, kreih camin mata.. Pilih ruah khan ao lagaih: tuk ngak bruk langiu langik pandiak brei cuk khan ao lapih, lahơi, njuk ia hauk saong hadah sambo.

Jhui menei ia chip hadei di tuk nao pandiak mai, kayua ini lac tuk tabiak rilo ia hauk, rup daok pandiak bo la-an chip lac oh siam, mbuan ba tal đột quỵ. Njauk nao tal chip dom bilai iek ruak meyah mboh: cambuai saong dalah thu, pandik akaok, abih prein, having akaok, glaih glar, ia me-ik takik saong sambo mbak jang yaok harei, khin taglaoh ta-ok... Atau mboh glaih glar, abih prein jeng brei nao chip tal dom bilai iek ruak.

Daok meyah mboh trak jang di bruk lahik ia lac: aih craoh rilo atau mbiah dalam 24 mon tagok; khak hu darah atau khak jhuk, oh daok thau cambaih laih atau mboh glaih glar rilo, takik nao me-ik, cambuai, kalik thu rilo, suak yava samar, baoh hatai nduac samar, meta dalam tame... lac biak kan kandah mbuan ba tal matai lahik nan ye brei ba nao cấp cứu samar drah./.