Tui iek prein yava uranaih hadei di tuk klauk jru

TS.BS Nguyễn Thành Nam brei thau lac, bruk klauk vaccine COVID-19 lac sa bruk njauk ngak piah pacang caga ruak ka uranaih umo meng 5 tal mala 12 thun. Min, dahlau di tuk klauk vaccine caga COVID-19 ka uranaih, amaik ame njauk tui iek, duah mboh dom bruk karei dalam rup di ranaih, yau ye pandiak, dom bruk pambuak tal jalan suak yava (patuk, suak yava samar...), pandik akaok, taglaoh ta-ok… piah khan ka urang jakar y tế thau tuk pasang iek, taong yaom ka ranaih dahlau di tuk klauk jru.

Abih di nyu nan lac,dom ranaih taom gaok haong urang njauk ruak SARS-CoV-2 saong atau mboh gam haong dom bruk suak yava ye njauk tui iek di sang piah caga ka uranaih hu njaom virus SARS-CoV-2 ka oh duah mboh, tuk nao klauk jru meda ngak pambak ruak ka uranaih karei.

Dalam saong hadei di tuk klauk jru njauk tui iek prein yava uranaih di labik klauk. Amaik ame njauk pambuak haong dom urang y tế, dom cei jru, nai gru tui iek prein yava uranaih, gam haong pachreih ba uranaih, plaih bruk uranaih haduh hatai, huac kanda.

Tui iek prein yava uranaih hadei di tuk klauk jru, yau ye: Salih karei jalan saneng; dom kadha gah jalan suak yava (suak yava samar, kan suak yava...); ndong rak ngu; ndaih baoh di kalik; patuh ia huak; tangin takai laar; taglaoh ta-aok, pandik hatung...

Jang yau tuk klauk dom vaccine karei, bruk klauk vaccine COVID-19 jeng hu dom phản ứng karei, yau ye: brah, pandik di labik klauk, katar di labik klauk; brah di dom labik dalam rup (yau cambuai, mata...), ndong rak ngu; kan suak yava, khò khè; pandik cada, var drei jan... pandik akaok, ndih miat; pandik hatung, taglaoh ta-aok, aih traoh. Trak lac mboh dom bruk yau ye kan suak yava, var drei jan, handaoh rup pabhap, patuh ia huak, ndong rak ngu, tangin takai laar, trun huyết áp....

Tuk mboh dom bruk karei di uranaih hadei di tuk klauk vaccine COVID-19 ye amaik ame njauk brei ka uranaih nao pasang iek prein yava di labik y tế piah hu langyah samar drah. Di Pasak Nhi khoa, Sang iek ruak Bạch Mai, dom bác sĩ brei thau lac bhian taduan dom uranaih mboh phản ứng hadei di tuk klauk ngan haong dom janih vaccine karei meng hanjul (mboh di langiu kalik), tal trak (yau ye handaoh rup pabhap, kan suak yava...) min jeng hu langyah samu saong ka oh hu biến chứng trak damak halei.

Rilo amaik ame jeng daok haduh hatai ka bruk hadei di tuk klauk jru, uranaih padeih padei hadom meng nao bac gilac veik? Tui bác sĩ Nguyễn Thành Nam, hadei di tuk klauk hu tui iek prein yava tani tanat di labik klauk jru uranaih meng nduac me-in, bac taa yau yaok harei. Min dom amaik ame jeng  patakik brei ka uranaih pahat rup rilo dalam 3 harei hadei di tuk klauk saong tui iek catang meyah mboh dom bruk karei di uranaih tuk main./.

Urang lang: Thu Thao – 21/04