Hadei di COVID-19 di dom urang ruak hu mboh lac ngak kan kandah tal jalan suak yava

Bác sỹ Phan Minh Hoàng, Yam ndok Sang iek ruak Phục hồi chức năng TP Hồ Chí Minh brei thau, jaik abih kadha caik veik hadei di COVID-19 di dom urang ruak hu mboh lac ngak kan kandah tal jalan suak yava; hu dom kadha pagam tal tim mạch; dom janih ruak tabiak darah di glo akaok, stress, huac kanda duh hatai, ndih daok oh hu.

Tapa dom hagait hu mboh di Sang iek ruak Nhân dân Gia Định (quận Bình Thạnh) kuhria meng harei 1/12/2021 tal harei 10/1/2022, hu 1.021 urang ruak njauk COVID-19 abih ruak mai iek ruak di taong abih dom chuyên khoa. Jaik abih dom urang ruak mai iek ruak kayua mboh dalam rup glaih glar, kan suak yava. Dalam nan, labaih 510 urang ruak (samu meteh dom urang mai iek ruak) gaok kan kandah ka jalan suak yava.

Dom kadha hadei di COVID-19 oh njauk lac tok rah tabiak di urang ruak trak tame sang iek ruak atau urang prong thun dalam rup hu rilo janih ruak, bo daok hu dom urang umo daok ranaih, pren yava khang kadang saong hu njauk ruak njuan.

Bác sĩ Phan Minh Hoàng brei thau, urak ini sang iek ruak daok taong ruak ka labaih 1.000 urang ruak, dalam nan daok iek ruak dalam sang iek ruak lac 341 urang, daok veik lac taong ruak di sang. Jaik abih dom kadha caik veik hadei di COVID-19 di dom urang ruak mboh lac pambuak pagam tal jalan suak yava, tal baoh hatai, dom janih ruak ngak tabiak darah dalam glo akaok, stress, huac kanda duh hatai, ndih daok oh hu... Tui nan, bác sĩ Phan Minh Hoàng kakei lac, piah samar duah mboh dom kadha urang ruak njauk dom janih ruak hadei di COVID-19, urang ruak hadei di abih ruak saong hu âm tính haong COVID-19 njauk mai veik sang iek ruak piah iek ruak dalam tukvak meng 2-4 adit, njauk ngak dom xét nghiệm, chụp X-quang ka hatai piah taong yaom abih gah.

Tukvak anak tal, gah y tế TP Hồ Chí Minh meda pandar công nghệ thông tin tame bruk khik ramik, iek glang pren yava ka urang njauk COVID-19 abih ruak bloh; abih di nyu lac, meda padang jalan tacei pato taong iek ruak hadei di COVID-19 tui dom pakat taong iek ruak haong dom jalan ngak yau: y tế gah ala taduan iek glang nyaom urang ruak hadei di COVID-19 njauk ruak njuan; taom gaok, duah thau dom kadha pambuak tal pren yava; khik ramik, iek glang, tacei pato meng atah, gam haong nan lac taong ruak tui jalan mbang huak ndih daok, jalan iek ruak oh pandar jru tavao, pambuak y học bahrau harei ini haong y học meng kan./.

Urang lang: Jasi – 27/01