Hu 2 janih jru mek alak bhian gaok lac njauk jru mek alak Etylic (Ethanol) saong jru mek alak Metylic (methanol).

Tuk njauk jru mek alak, urang ruak mbuan laik tame bruk lac: oh daok thau hagait, oh hadar kanal hagait, trun saradang, handaoh rup pabhap, la-an rup saik, nhịp tim tuk samar tuk suai, taglaoh ta-aok gam gam ba tal lahik ia, khut gilo akaok, metai… Kayua yau nan ye, urang njauk jru mek alak njauk ba nao cấp cứu samar drah.

Tuk hu urang njauk jru mek alak, brei kham marat khik urang ruak daok la tapak. Mayah urang caong ndih, njauk caik patan di akaok saong bara glaong jang rup. Mayah urang ruak njauk gar labar, suak yava kan, var drei jan, brei ndih mbleing piah tuk takhaoh ta-aok oh takhalac (sặc). Mayah urang ruak oh ta-aok, meda duah jalan ngak brei ta-aok abih alak piah ba cồn tabiak truh abih tung pruac.

Brei ka urang ruak manyum rilo ia pandao piah plaih lahik ia saong ngak brei mbrang alak dalam rup saong par tathuak alak tabiak samar drah. Meda brei ka urang ruak manyum ia laya that, ia tea, ia kruac iak, ia baoh traong nde, ia kruac bhung,… piah giải độc alak (mayah hanjul). Urang njauk jru mek alak mbuan la-an rup saik, nan ye njauk khik pandiak meng matham phui, cuk ao kapal…, saong brei samar drah ba urang njauk jru mek alak tal labik y tế piah hu taong ruak chip.

Hadei di tuk manyum alak bo mboh thei hu dom bruk yau ye: mbaok mata hijao, gaok tame mboh laar (abih di nyu nan lac di labik kalik vil val cambuai, kakau tangin); oh thau hagait, tangan takai suai damuai, dang oh tapak atau oh dang hu; la-an rup saik; mạch, nhịp tim, suak yava oh tani tanat (atah di gauk di dom mbang suak yava meng 10 minit tagok) handaoh rup pabhap, taglaoh ta-aok, oh suak yava hu… jeng njauk ba urang ruak nao cấp cứu chip.

Jabat khik ramik bruk njauk jru mek, Mban khik ramik salamat pandap mbang TPHCM kakei lac, urang kumei matian jhui manyum alak, kayua manyum alak meda ba tal ndih tapui kurang bilan, ngak brei anek kamar lavang lavaih, glo akaok oh siam, gaok mai ngak brei anek kamar njauk jru mek.

Langiu di nan, hu 5 janih oh njauk manyum alak.

+ Oh manyum cồn công nghiệp saong alak hu methanol >0,1% kayua meda ba tal bhang mata saong metai.

+ Oh manyum alak hu nồng độ meng 30 độ tagok yam tapa tanut 30ml sa urang sa harei.

+ Oh manyum alak tram haong hala, gha kayau, tung pruac athur oh thau njauk jru mek hagait atau alak tram tui ilamo di manuac urang.

+ Oh manyum alak tuk oh thau lac alak hagait, oh thau asal di nyu saong tanut chuan chất lượng yau habar. Oh manyum alak tuk ka mbang hagait, daok glaih saong daok manyum jru taong ruak.

+ Ranaih umo mala 16 thun oh brei manyum alak mbia.

Jabat chức năng kakei lac, sa urang khang kadang oh manyum tapa 1 đơn vị alak sa harei, lac samu 30 ml alak khang (40-43 độ), 100 ml alak vang (13,5 độ), 330 ml mbia hơi (5 độ), 2/3 klaok 500 ml atau lon mbia 330ml (5 độ)./.